Read Zokam Thuhilhna 7 Bible Online

Thuhilhna 7 - Zokam bible

Thuhilhna 7

¹Paknamtui hoih sangin minpha hoihzaw a, suahni sangin sih ni hoihzaw hi.

²Mi khempeuh tawpna, sihna hi a, a nungta laite in a lungsimah ciamteh ding ahi manin pawibawlte inn a hawh sangin a dahte inn a hawh hoihzaw hi.

³Nuihna sangin dahna hoihzaw hi, bang hang hiam cih leh lungtang adingin dahmai a hoih hi.

⁴Mipilte lungsim a dahte inn ah om a, ahi hangin mihaite lungsim nopna inn ah a om hi.

⁵Mihaite lasak ngaih sangin, mipil khat hong taina thusim hoihzaw hi.

⁶Beltaw nuai-a lingkung puak zuahzuah bangin mihaite nuih puak zuahzuah hi. Hih zong a mawknapi mah ahi hi.

⁷Amaan lo-a ngahna in mipilpa haisak a, golhsum in lungsim nawngkaisak hi.

⁸Thu khat a kipatna sangin a tawpna hoihzaw a, kiphatsakna sangin lungduaina hoihzaw hi.

⁹Mihaite lungtang ah hehna teng ahi manin na hehna zah dongin lungtom kei in.

¹⁰"Bang hangin tanglai mite, hihte sangin hoihzaw hiam?" ci kei in, ahang in, hih bang dotna pilvai lo hi.

¹¹Gouluah khat bangin pilna hoih a, ni a mute a hampha ahi hi.

¹²Sum in hong liah bangin pilna in hong liah hi, ahi hangin theihna a hoihzawkna in: pilna in a neipa nuntakna hutsak hi.

¹³Pasian nasepsate ngaihsun dih in: a kawisaksate kua in mamsak thei ahi hiam?

¹⁴Hun a hoih ciangin, lungdam in; hun a siat ciangin ngaihsun in: Pasian in ni khat le nidang khat a kibanga a bawl ahi hi. Tua ahi ciangin mi khat in a mailam thu ding bangmah a mukhia thei kei hi.

¹⁵Hih a mawknapi a ka nuntak sungin, hihte gel ka mu khin hi: a thumaan mi a thumaanna ah mangthang a, a gilo mi a gilosapi mahin sawtpi a nungta hi.

¹⁶Thumaan lua kei inla lah pil lua kei in - bang hangin nang le nang kisusia ding na hi hiam?

¹⁷Gilo lua kei inla lah hai kei in - bang hangin sihhun ma-in si ding na hi hiam?

¹⁸A khat lencipin a khat pen zong khah tuan loh ding hoih hi. Pasian a kihta peuhmah in a uanglua khempeuh pel uh hi. a[6]

¹⁹Pilna in, khuapi khat sunga gam-uk sawm sangin mipil khat vangliansak zaw hi.

²⁰Leitungah a maana gamta a mawh ngei lo a thumaan mi kuamah a om kei hi.

²¹Mi thugen peuhmah thusim pahpah kei in, tua hi kei leh na nasempa hong hamsiatna na za kha ding a -

²²na lungsim sungah nang zong midangte tamveipi na hamsiat lam na thei hi.

²³Hihte khempeuh pilna tawh ka sittel hi-a, "Pil ka sawm hi," ahi hangin hih in kei theih zawh loh ahi hi.

²⁴Bangbang ahi zongin pilna gamla lua a, a thuk penpen ahi hi - kua in mukhia thei ding ahi hiam?

²⁵Tua ciangin theihtelna lamah ka lungsim ka hei a, pilna le nate ngimna le kheltatna a telhakna le haina a haihuaizia telkan ding le a zongkhia dingin ka lungsim ka hei hi.

²⁶Thang nam khat ahi numei, a lungsim thang kamsa hi-a, a khut sikkhainiang ahi numei, sihna sangin a khaat zawk lam ka phawk hi. Pasian a lungkimsakpa numei panin suakta dinga, ahi hangin mawhneipa tuanu thangah a awk ding hi.

²⁷Siapa b[7] in, "En un, ka muh khiat hih ahi hi: Nate a ngimna theih nadingin na khat tungah adang khat ka gawma -

²⁸ka zonzon lai mahin ka mu tuan kei hi - pasal tul khat lakah a thutang khat ka mu a, numei khempeuh lakah numei thutang khat zong ka mu kei hi.

²⁹Hih bekbek ka mu hi: Pasian in mite a thutang dingin bawla, ahi hangin mite in ngimna tampi a zongkhia uh hi.