Read Zokam Thuhilhna 9 Bible Online

Thuhilhna 9 - Zokam bible

Thuhilhna 9

¹Hihte khempeuh ka ngaihsun kikkik a, thumaante le mipilte in a sep khempeuh Pasian khutsuak hi-a ahi hangin amau tuah ding itna hiam muh dahna hiam cih kuamah in a theih loh lam a tawpna ah ka mukhia hi.

²Mi khempeuh - a thumaante le migilote, a sia d[11] le a pha, a nin le a siang, biakna a pia le a pia lote in a kibangin mong a nei ciat uh hi. Mi hoihpa tunga tung bangbang mawh neipa tungah tunga a kiciampa tunga tung bangbang a kiciam ngamlo pa tungah tung hi.

³Sunni nuai-a a piang peuhmah gitlohna ahi hi: tuate khempeuh a mong uh kibang ciat hi. Tua tham loin mihing lungtang gitlohna vive hi a, a nuntak lai mah un a lungsim uh hai-a tua nung ciangin sihna lam zuan uh hi.

⁴A nungta laite laka a om peuhmah in lametna e[12] nei a - humpinelkai sisa khat sangin a nungta lai ui khat nangawn hoihzaw hi!

⁵Ahang in, a nungta laite in a sih ding lam uh thei a, ahi hangin a site in bangmah thei lo hi; amaute in pahtakman nei nawn lo uh a, amaute kiciamtehna nangawn kimangngilh hi.

⁶Amaute itna, amaute muhdahna le amaute hazatna beimang khin ahi nungsang; sunni nuai-a a piang peuhmah bangmah a tangkha nawn kei ding uh hi.

⁷Pasian na nasepna hong angvanna ahi manin: pai in lungkimtakin na an ne inla lung nuamtakin na zu dawn in.

⁸Puanpak silh den inla na lu sathau nilh tawntung in.

⁹Pasian hong piaksa sunni nuai-a a mawknapi na nuntak hun sung - a mawknapi na hun khempeuh, na it na zi tawh a nuam theithei in zang in. Hih in na nuntak sunga na lawhtak hi-a, sunni nuai-ah gimpi-a na thalawhsa ahi hi.

¹⁰Na pai nading hankhuk f[13] ah sep ding om lo, geel ding om lo, theihna pilna lah om tuan lo ahi manin khuta sep ding na muh peuhpeuh na tha neih zahin sem in.

¹¹Sunni nuai-ah adang pawlkhat ka mu lai hi: Tai kidemna ah a manlangte in zo kim lo a, a thahatte in gal zo kim loin tua mah bangin a pilte in an kham kim lo uh a, a teite hau kim loin lai siamte a ki-angvan kim kei hi; ahi hangin, amaute khempeuh tungah ahunlem hunin a tung kim hi.

¹²Tua banah, ama hun tun ding kuamah in a thei kei hi. Len gilo-in ngasa a kimat bang, thangin vasa a kimat bangin gitloh hunah mite awk a, lamet loh laitakin amau tungah a tung hi.

¹³Sunni nuai-ah ka lungsim hong khoih mahmah pilna gentehna khat zong ka mu hi:

¹⁴Khatvei lai-in mi tawmkha a tenna khuapi neu khat om hi. Tua khua a do dingin kumpi vanglian khat kuana, a kimkotah galkap tampitak a umcihsak hi.

¹⁵Tu-in tua khuapi sunga teng khat zawng napi pila ama pilna hangin tua khuapi a hu zo hi. Ahi hangin tua mizawngpa kuamah in a phawk kha kei hi.

¹⁶Tua ahi ciangin, "Hatna sangin pilna hoihzaw hi," ka ci hi. Ahi hangin mizawngpa pilna kisimmawh a, ama kampaute a kithu simsak nawn kei hi.

¹⁷Mihaite ukpa kikona sangin a gingkhia lo mipilte kampau thusim zawk ding ahi hi.

¹⁸Galhiamte sangin pilna hoihzaw a, ahi hangin mawhneipa in na hoih tampitak a susia hi.