Read Zokam Zailate’ Zaila 1 Bible Online

Zailate’ Zaila 1 - Zokam bible

Zailate’ Zaila 1

¹Solomon zailate’ zaila.

²Ka zunngek in a mukin hong tawp hen aw mubang nong ngaih ningzu sangin cilzaw e.

³Na duang zunna gimsi nam in duangtham zen e, na sakmin theibang ka lawh leh paknamtui gimsi hong laang ve e. Lianute’n mubang hong ngaih mah ding hi e!

⁴Uaikai loin kaitui bang hong zawl inla Vaimang in a zaalna saunuam sung hong tun hen aw. Na khavang in sinlai tangbang damsak e; mubang nong ngaih ningzu sang’n pakzaw nu’ng e. Sengual’n lambang hong paak pawh lailawm nah e!.

⁵Jerusalem lianute aw, ka sakmel puanbang dum tahal, Kedar limbuk le Solomon puankhai bang ngaihbaang hiuhiau lai hi’ng e.

⁶Ka sakmel puanbang dum tahal, nuihsiamin hong lel kha na cia, tangni kata dum hi’ng e. Ka tun vontawi tang laizomte’n ka kungtung lungsit uh e, lenghuante hong zunsak uh e; keima kungtung duang kizun la’ng e.

⁷Hong lel dih aw, duangzen zunngek aw, na tengkhawite koikuam sawlbang hei hiam aw, sunkim tangni a kat lai-in na tuute tawh koi kuam tullim na bel hiam ci’ng e. Na tanggualte tengkhawite siangah zehzum lianu zil ding ka hiam aw?

⁸Lianu zatam lai-a duang kikhaipen aw, na thei kei leh tengkhawi tuute nuaciang sulbang na zui inla, tuucingte limbuk siangah na lengkeel note tawh bual ve aw.

⁹Ka zunngek aw Pharoah lengkai kolsa-la khat pianzil siam hong sa’ng e.

¹⁰Na bengbah in na laangmai etlawmsak e, na ngawng le awhkhi nunsan kilawmkhawm e.

¹¹Na bengbah ding kham tawh buhbang bawl le’ng a, a zep nading ngun khainiang in khil le’ng e.

¹²Vaimang in laikuang a um lai, ka duang zunna gimsi leng’n kuamteng zel e.

¹³Ka sannemno, anglai nunkhum nihgel kala ka sannemno myrrh thawl khai dungzil sa’ng e.

¹⁴Ka sannemno ka kungtungah En Gedi lenggui huana henna pallai dungzil sa’ng e.

¹⁵Ka ngaihno duang kikhai ningniang aw! Duang kikhai kim zo sam cia! Na maimit in khuva maimit pianzil hi e.

¹⁶Ka sannemno, sakduang kikhai kim si cia! Etin lawm si cia! I laikhun zong khawhlo bang dum dildial e.

¹⁷I saunuam innkamte aw tamtak gil aw, takcim innsun kizungtuah san singseng e.