Read Zokam Isaiah 11 Bible Online

Isaiah 11 - Zokam bible

Isaiah 11

¹Jesse bulpi panin hiang khat selkhia dinga, a zungte lak pan a Hiang khat in gah a gah ding hi.

²Ama tungah TOPA Kha om dinga- pilna Kha le theihtelna Kha, lamlahna Kha le vangliatna Kha, theihna Kha le TOPA kihtakna Kha a tungah om dinga -

³amah in TOPA kihtakna nuam a sa ding hi. A mita a muhna bangin thu khen loin a bila a zak bangin thu khen lo dinga;

⁴ahi hangin a tasamte tungah thumaanin a thu uh khensakin leitung mizawngte adingin thutangin thu a khensak ding hi. A kama cianggolh-in leitung sat dinga; a muk pana husanin migilote a that ding hi.

⁵Thumaanna kawnggakin nei dinga, muanhuaina dialpek a kawng kimkotah a vial ding hi.

⁶Keivom le tuuno omkhawm dinga, keel tawh gialbem lumkhawmin bawngno le humpinelkai le kumkhat a pha ganhingte c[32] omkhawmin naupangnote in tuate a makaih ding uh hi.

⁷Bawngpi tawh vompi gamta dinga, a note uh lumkhawmin, humpinelkai in bawngtal bangin buhtu a ne ding hi.

⁸Thangtom kua gei-ah naungeekte kimawl ding uh a, naupangnote in ngan bute a sawk ding uh hi.

⁹Tui in tuipi a tuam bangin TOPA theihna leitung dim ding ahi manin amaute in ka mual siangtho tungah bangmah liamsak loin a susia kei ding uh hi.

¹⁰Tua ni ciangin mite dialkhai bangin Jesse Zungpi ding dinga, minam khempeuh in amah beelin ama khawlna mun a minthang ding hi.

¹¹Tua ni ciangin Topa in Assyria pan, Egypt khanglam pan, Egypt d[33] saklam pan, Cush e[34] pan, Elam pan, Babylonia f[35] pan Hamath pan, le tuipi tuikulhte panin a baanglaite a kinusia ama mite a ngah kik nadingin a nihveina a khut a zankhia ding hi.

¹²Amah in minamte adingin dialkhai khat khai dinga, Israel saltangte a kaikhawm ding hi; amah in a kithehthang Judah mite lei kiuli panin a kaikhawm ding hi.

¹³Ephraim’ hazatna bei dinga Judah’ galte a[36] kibeisakin; Ephraim in Judah haza nawn loin Judah in Ephraim a galbawl nawn kei ding hi.

¹⁴Amaute in nitumna lam Philistia mualdungte ah duang lensuk ding uh a, nisuahna lama om mite a lawk khawm ding uh hi. Amaute in Edom le Moab tungah a khut uh nga ding uh a, Ammon-te in a thu uh mang ding uh hi.

¹⁵TOPA in Egypt tuipi-gek kangsak ding hi; Euphrates Gun b[37] tungah huihsa tawh a khut a van ding hi. Mite in khedapkaih tawh a kantan theih nadingun lui sagih-in a khenkham ding hi.

¹⁶Egypt pan Israel-te a paitoh lai-un a hih bangin Assyria pana kinusia a baanglaite adingin lam lianpi a suak ding hi.