Read Zokam Isaiah 13 Bible Online

Isaiah 13 - Zokam bible

Isaiah 13

¹Amoz tapa Isaiah in Babylon tawh kisai thusuak a muhna:

²Mualdawn kui ah dialkhai khat khai inla, kongpi-ah uliante a lut nadingin otsan-in amaute khutvan un.

³Ka misiangthote ka sawl khin hi; ka thangpaihna a suahkhia dingin ka gualzawhna nuam a sa - ka galte ka sam khin hi.

⁴Mualtunga mihon tampi gamlumna tawh a kibang ngai dih un! Ngai un, kumpi-gamte laka kikona minamte kikaikhawm tawh kibang veh! Thahatpen TOPA in gal sim dingin galkap kaikhawm hi.

⁵Vante mong pan - gamlapi-a gamte panin TOPA le ama thangpaihna galhiamte tawisa in gambuppi susia dingin amaute hong kuan uh hi.

⁶TOPA ni naita ahi manin kap vangvang un; Thahatpen c[38] pana suksiatna hong tung ding hi.

⁷Hih thu hangin khut khempeuh zaw dinga mihing lungsim peuhmah tuisuak khin ding hi.

⁸Lauthawngna in amaute man dinga, lunggimna le a na valval in amaute mekcip ding hi; amaute numei nausuahnat thuak a bang ding uh hi. Lamdang sa-in khat le khat kisal gega ding uh a, a mai uh a san lela ding hi.

⁹En in, thangpai lua-a hehna tawh leitung gamkhing suaksakin a sunga om mawhneite a susia dingin TOPA ni - a gilo ni hong tungta hi.

¹⁰Vantunga aksite le amau vuklamte a tang kei ding uh hi. Nisuak kimlai kimialsak dinga khapi zong a tang kei ding hi.

¹¹Leitung-a tatsiatna hang le migilote mawhna hangin dan ka thuaksak khawm ding hi. Mi kiphasakte’ ki-uatsakna beisakin, mi gamhtatte kisaktheihna ka niamkhiat ding hi.

¹²Keimah in kham citak sangin a ciimzaw, Ophir kham sangin a citawmzaw in mihingte ka bawl ding hi.

¹³Tua ahi ciangin Thahatpen TOPA thangpai a, ka hehna a kuan ciangin vante ka lingsak dinga leitung a omna munah a kilok ding hi.

¹⁴A kidelh sanang bang le a cing om lo tuu bangin mite, amau mipihte kiangah ciah kik ciat ding uh a, amau pianna gam ciatah a tai ding uh hi.

¹⁵A kiman peuhmah kidawtlet dinga, a kikhutmat peuhmah namsau-in a puk ding uh hi.

¹⁶A tangeekte uh amaute muhin kidengzan dinga; a innte uh kiluhsakin a zite uh a kibuansak ding hi.

¹⁷En un, amaute do dingin ngun a thudon lo, kham a lungkimpih lo Midia-te ka hanthawn ding hi.

¹⁸A thalte un khangnote khatuk dinga; naungeekte lainat loin naupangte a khuatuah tuan kei ding uh hi.

¹⁹Kumpi-gamte’ suangmanpha Babylon, Babylon-te a[39] kisaktheihpih minthanna, Sodom le Gomorrah bangin Pasian in a lawnthal ding hi.

²⁰Ama sungah kiteng ngei nawn loin khang tawntung kuamah a teng kei ding hi; Arabia-te in tua lai-ah a puanbuk uh lam loin, tua lai ah a tuu uh a khawlsak tuucing a om kei ding hi.

²¹Ahi hangin sehnel gam ganhingte tua lai-ah lumin, se-al in a bu a dimsak ding hi; tua lai-ah simbute giakin sathakte a diang ding uh hi.

²²Gam-uite a kua muanhuai sunguah kual ding uh a, se-alte amau kumpi inn nuam sungah a kual ding uh hi. Tuanu hun nai mahmah a, ama nite a kisot nawn kei ding hi.