Read Zokam Isaiah 14 Bible Online

Isaiah 14 - Zokam bible

Isaiah 14

¹TOPA in Jacob khuatuah dinga, Israel khatvei teeltuam lai-in amau neihsa gamah a tengsak kik ding hi. Pemtate in amaute pawl ding uh a, Jacob innkuan tawh kigawm ding uh hi.

²Minamte in amau gamah amaute a puak ding uh hi. Israel innkuante in minamte tang ding uh a, TOPA gam ah sila-numei le sila-pasal in a khawi ding uh hi. Amau a mante salin khawi ding uh a, amau a nengniamte a uk ding uh hi.

³Note thuakna, buaigawpna le khelbawlgawpna panin TOPA in hong suahtaksak ni-in

⁴Babylon kumpi tungah hih bangin na khelcih ding uh hi: Mi nenniampa bangci bei mawk a hia! A hehna b[40] a bangci bei ai tam!

⁵TOPA in mitatsiate ciangkhut le gam ukte ciangkhut -

⁶a heh uh cianga mite a satsatna uh a haksatna a khiap hetlohna uh sutan khina, hehsa-in minamte nasiatakin thuzawh khin hi.

⁷Gam khempeuh kilemin tawlnga a, la sasa ta uh hi.

⁸Lebanon a taksingte le tam taksingte nangawn in, "Tu-in nang hong kiphukpai zo a, kote phuk dingin kuamah hong kuan nawn kei ding hi," ci-in lungdam hong ko uh hi.

⁹Nuai-a hankhukte c[41] khempeuh nang vaitun a dawn dingin a kising kheukhou uh hi; nang hong muak dingin a paisa leitung makaite khate kiphong a, a kumpi tokhom ciat panun a kithosak hi - amaute a vekun minamte kumpite vive ahi uh hi.

¹⁰Amaute in nang hong hopih in, "Ko mah bangin nang zong na thakia ta hi; ko tawh na kibang ta hi," hong ci ding uh hi.

¹¹Na harp awte tawh na galkap honpi khempeuh hankhuk ah kipuaksukte; na nuai-ah tangtel kiphah a, than in hong pumtuam hi.

¹²Phalvak tapa zingsol aw, van pan bangci kiatsuk na hiam, khat vei lai-a minamte a niamkhiatpa lei ah hong kikhiasuk mawk hi lo maw!

¹³Na lungsim ah, "Van ah ka kahto ding hi; Pasian aksite tunglam ah ka tokhom ka sangkhan ding hi; mual siangtho d[42] sanpenna mun mihonpi kikhopna vum tungah ka kumpi tokhomin ka tu ding hi.

¹⁴Meiite tunglam pekah ka kahto ding hi; kei le kei Sangpen Pa in ka kibawl ding hi," na ci hi.

¹⁵Ahi hangin hankhuk sung, gum thukpi sungah nang hong kipuaksuk ding hi.

¹⁶Nang hong mute in hong sal gega kawmin na pianzia ngaihsunsunin, "Leitung a lokgawppa, kumpi-gamte a lingsakpa,

¹⁷leitung sehnel-gam suaksak a, a khuapite a lawnthalpa le a saltangte inn a, a ciahsak nuam lopa hihpa hi lo ahi hiam?" ci ding uh hi.

¹⁸Minamte kumpite khempeuh amau han sung ciatah a lum hithiat uh hi.

¹⁹Ahi hangin nang na hankhuk pua lamah a kideih lo singhiang bangin hong kilawnkhia-in; namsau-a kisunlet suang dum sunga a tuaksuksa misi luangte in nang hong khuhcip uh hi. Khe a kituancil mi siluang bangin

²⁰amaute tawh na kivui khawm kei ding hi, ahang in, na gam na susia a, na mite na that hi. A tatsiate suan-lekhakte a kilo kha nawn kei ding hi.

²¹A pute uh mawhna hangin a tapate uh kigawh nading mun bawlkhol in; a leitang uh a luah ding le a khuapite un leitung a tuam dingin amaute a tho kei ding uh hi.

²²"Amaute langkhatah ka pang ding hi," Thahatpen TOPA in cikhia hi. "Tuanu min le a omlaite, a ci a nam le a suan a khakte, Babylon panin a kikhenkhia ding hi," TOPA in a cikhia hi.

²³"Tuanu, simbute giahna mun le nawngpi lak ka suaksak dinga, siatna tawh ka phiatsiang ding hi," Thahatpen TOPA in cikhia hi.

²⁴Thahatpen TOPA kiciam khin a, "Ka gensa bangin piang dinga ka sehsa bangin a kho takpi ding hi.

²⁵Ka gam sungah Assyria mite ka gawizan dinga, ka mualte tungah ka tuancilgawp ding hi. Ka mite panin ama hakkol kilakhia dinga, amau liangko panin a van a kihemkhia ding hi," a ci hi.

²⁶Hih in leitung buppi ading ngimna ahi hi; hih in minam khempeuh tunga kizankhia khut ahi hi.

²⁷Thahatpen TOPA sehsa ahi manin kua in khaktan thei ding ahi hiam? A khut zankhia khin hi, kua in dok kik thei ding ahi hiam?

²⁸Hih in Kumpi Ahaz sih kuma thusuak ahi hi:

²⁹Philistia-te khempeuh aw, no hong kisatna ciangkhut a kitan manin lung nuam kei un; tua gul zung panin ngan hong mengto dinga, agah a lengthei gulpi gupha hong hi ding hi.

³⁰A zawngte lak pana a zawngpente in lonona mu ding uh a, a tasamte lungmuangin a lum hithiat ding uh hi. Ahi hangin kialpi tawh na zung ka susia dinga tua in na suahtaksakte a that ding hi.

³¹Kongpi aw, kap vangvang in! Khuapi aw, ku vangvang in! No Philistia-te khempeuh aw tuisuakmang un! Leilu panin meikhu meii-in kai-a a gualguala tangkai a om kei hi.

³²Tua minam kamtaite tungah bang a kici dawn ding hiam? "TOPA in Zion kipsak khin a, gimna thuak a mite in a sungah bukna a mu ding uh hi," a ci hi.