Read Zokam Isaiah 15 Bible Online

Isaiah 15 - Zokam bible

Isaiah 15

¹Moab tawh kisai thusuak: Moab a om Ar kisia hi, zan khat thu-in kisusia hi! Moab a om Kir kisia hi, zan khat thu-in kisusia hi!

²Biakinnpi ah Dibon paito a, a munsangte ah a kap dingin kuan to hi; Moab-te in Nebo le Medeba kah vangvang uh hi. Lu peuhmah kimet tol a, khamul peuhmah a kimetmai hi.

³Lamdungah ippi puan silh uh a; innkhum tung le tual-awng ah a vekun khupbawhsa in kap vangvang uh hi.

⁴Heshbon le Elealeh kapkhia a, Jahaz lamdung tengah amau awging kiza hi. Tua ahi ciangin Moab galhiam tawite kapkhia uh a, a lungsi uh hi.

⁵Ka lungsimin Moab ka kahkhia hi; a kidelh khia galtaite Zoar ciang dong, Eglath Shelishiyah ciangdong a tai uh hi. Amaute a kah kawmkawmun Luhith paina lampi dong a paito uh hi; Horonaim lampi ah amaute kisiatna tamlawhin a nei uh hi.

⁶Nimrim tuite kangcip a, lopa a keu hi; anteh sel teng bei a, lohing khat beek a om kei hi.

⁷Tua ciangin amaute in a gawlgawl uh a hauhnate uh le a kholsate uh Gialhek Lui galah kahpih mang uh hi.

⁸Amaute kahkhiatna awging in Moab gamgi dung teng thawn hi; amau kahkahna in Eglaim dong bana, amau tamlawhna in Beer Elim dong a ban hi.

⁹Dimon a[43] tuite sisan tawh kidim a, ahi hangin Dimon b[44] ah a tamzaw ka tungsaklai ding a - Moab galtaite tung le a gamua om laite tungah humpinelkai ka laangsak ding hi.