Read Zokam Isaiah 2 Bible Online

Isaiah 2 - Zokam bible

Isaiah 2

¹Hih in Judah le Jerusalem tawh kisai Amoz tapa Isaiah muhna ahi hi:

²Ni nunungte ah TOPA’ biakinnpi mual, mualliante laka a lian pen bangin kikipsak dinga; mual neute tungah kisangsakin minamte khempeuh in a zuan zuahzuah ding uh hi.

³Mi tampite pai-in, "Hong pai un, TOPA’ mual tung Jacob Pasian inn ah va paito ni. Amah in a lampite i zuih theih nadingin eite hong hilh ding hi," ci ding uh hi. Zion panin thukham hong paikhia dinga, Jerusalem panin TOPA kammal hong paikhia ding hi.

⁴Amah in minam khat le khat kikal ah thu khen dinga, mi tampi kitotna a vengsak ding hi. Amaute in a namsaute uh tu in sek ding uh a, a teipite uh tem mukkawi-in a sek ding uh hi. Minam khat in minam khat tungah namsau liik nawn loin galsim dingin zong a kisin nawn kei ding uh hi.

⁵Jacob innkuante aw hong pai un, TOPA khuavak sung ah kalsuan ni.

⁶Nangmah in na mite, Jacob innkuan na nusia khin hi. Amaute Nisuahna lam pana dawivaite tawh kidim uh a, Philistia-te bangin ai sanin, lawkite tawh kikhutlet uh hi.

⁷Amau gamah ngun le kham dim a, a goute uh a bei ngei kei hi. Amaute gamsung sakol tawh kidim a, sakolleng a bei ngei kei hi.

⁸Amaute in a gam uh milimte tawh dimsak uh a, a khutun a bawlsate uh a khutmete uh bawlsate a bia uh hi.

⁹Tua bangin mite kiniamsak sukin mihingte kiniamkhiat hi - amaute a[2] maisak kei in.

¹⁰TOPA kihtakna le a mulkimhuai ama thupina panin suangheng ah lut unla leihawm ah bu un.

¹¹Mite kiliatsakna mitte kiniamkoih dinga, mite kiphatsakna kiniamsak ding hi; tua ni ciangin TOPA bek kitawisang ding hi.

¹²Thahatpen TOPA in a kisathei le a kiliansak khempeuh, a kitawisangte khempeuh (tuateh amaute a kiniam koih ding hi),

¹³a sang, a kisangsak Lebanon tamtakte khempeuh le Bashan tawsawte khempeuh

¹⁴muallian kuite khempeuh le mualneu sangte khempeuh,

¹⁵tausangpi peuhmah le kulh muanhuai peuhmah,

¹⁶sumbawl tembawpi b[3] peuhmah le tembaw hoih peuhmah a niamkoih ding ni khat sehkhol zo hi.

¹⁷Mite kiliatsakna kiniamsak dinga, mite kiphatsakna kiniamkoih ding hi; tuani-in TOPA kia bek kitawisang dinga,

¹⁸milimte a maimang kiuhkeuh ding hi.

¹⁹TOPA in ama thupina nopcitna tawh leitung lingsak dinga, a kipat ciangin amah kihta-in mihingte suangpi heng kawm le leihawm vang sungah a tai ding uh hi.

²⁰Tua ni ciangin mite in a biak dingua a bawl uh ngun milimte le kham milimte, buite le bakte tungah a lot ding uh hi.

²¹TOPA in ama thupina nopcitna tawh leitung lingsak dingin a kipat ciangin amah kihta-in amaute suanghawmpi sung le ken sangpi hawm sungah a tai ding uh hi.

²²Nak vanga huusang bek mihing muang nawn kei un. Amah banga simtak ahi hiam?