Read Zokam Isaiah 24 Bible Online

Isaiah 24 - Zokam bible

Isaiah 24

¹En un, TOPA in leitung, gamtul suaksakin a beisak ding hi; leimaitang susia in a sunga tengte thehthang dinga -

²mi mawkmawkte le siampite, nasempa le a pu, naucingnu le a pi, a leipa le a zuakpa, a kawmpa le a kawmnapa, a leitawipa le a leitawinapa, a kibang ding hi.

³Leitung kisia kiuhkeuh dinga a kisusiamang ding hi. Hih thu TOPA gensa ahi hi.

⁴Leitung vulin keucip a, leitung thanemin vulgawp a, leitunga kitawisangte a thanem uh hi.

⁵Leitung, a mite in ninsak a, amaute in thukham mang loin ngeina-kipte zui lo uh a, tawntung thukhun a palsat uh hi.

⁶Tua ahi ciangin hamsiatna in leitung kangtuma a tunga tengte in amau khialhna a thuak pelmawh ding uh hi. Tua ahi ciangin leitunga tengte kangtum uh a, tawmno bek a om lai hi.

⁷Zuthakte keucip in lenggui a vul hi; a gualnuam khempeuh a tau uh hi.

⁸Gualnopna khuanggingte dai khipkhep a, nopsakna gamlumna bei-in harp tawh lungnuam a lasakna lah a dai dide hi.

⁹Amaute in zu dawn kawmin la sa nawn lo uh a, a zucil dawnte uh khazaw a sa uh hi.

¹⁰Khuapi kisiasa a hawmin om a, inn sima kongvangte a kikalh bikbek hi.

¹¹Zu duhin lamdungah kiko uh a; lungnopna khempeuh lungzinna suakin gualnopna khempeuh leitung panin a kinawhmang hi.

¹²Khuapi a siasa in kinusia a, a kongpite a kikhawhkham zangawp hi.

¹³Olive kung a kisat khit ciang le lenggah lak khita asangh a kinusiat bangin leitung le minamte tungah a kihih ding hi.

¹⁴Amaute lungdamin kiko ding uh a, a aw uh a sangsak ding uh hi; nitumna lam pan TOPA thupina a thangsak ding uh hi.

¹⁵Tua ahi ciangin tuipi tuikulhte a nisuahna lam mite in; TOPA min thangsakin; TOPA Israel-te Pasian min a tawisang ding uh hi.

¹⁶Leimongte panin: "Thuman Pa minthang ta hen," ci-a la kisa eite in i za hi. Ahi hangin, "Beimang ta’ng ei! Bei mang ta’ng ei! Gimna hong tung ei! Mi khemte in hong lehkhem ei! Mi khemte in khemna tawh hong lehkhem uh ei!" ka ci hi.

¹⁷Leitung mite aw, launa gum le thang in note hong ngak hi.

¹⁸Launa aw za-a a tai peuhmah gum sungah kia ding uh a; gum sung pan a kahkhia to peuhmah thangah a awk ding uh hi. Vante-a tui kongpite kihong a, leitung bulpi a kilok hi

¹⁹Leitung khangkhamin a themthemin kikhen dinga, nakpipi in a kising ding hi.

²⁰Zukham bangin leitung hoi dinga huihpi mut bukno bangin suk-awn to-awn ding hi; a lehdo mite mawhna gikpi in nen tukin - a tho kik ngei nawn kei ding hi.

²¹Tua ni ciangin TOPA in tunga vante a vangliatna le nuai-a leitunga kumpite dan a thuaksak ding hi.

²²Thongkiate dumpi sungah a kigawmkhawm bangin amaute kikhum khawm dinga, thong sungah kikalhnelhin ni tampi khit ciangin dan a[62] a kithuaksak ding hi.

²³Thahatpen TOPA in Zion Vum le Jerusalem panin a upate mai-ah thupi takin uk ding ahi manin khapi mial dinga, ni a maizum ding hi.