Read Zokam Isaiah 25 Bible Online

Isaiah 25 - Zokam bible

Isaiah 25

¹TOPA aw, ka Pasian na hi hi; muanhuaina kiciantakin tanglai peka na geelsa nate a piandang nate bawl khin na hi manin nang kong tawisang dinga, na min ka phat ding hi.

²Nangmah in khuapi, ninlompi na suaksak a, kulha ki-um khua susia-in gamdangte mun muanhuaite khuapi a hi nawn lo dingin na bawla; a kilam kik ngei nawn kei ding hi.

³Tua ahi manin mi thahatte in nang hong pahtawi ding uh a, a cikzia thei lo minamte’ khuapite in nang hong zahtak mahmah ding uh hi.

⁴Mizawngte adingin bukna na hi a, a tasamte lungdon cianga bukna mun, huihpi pana kidalna le nisa pana niliim na hi hi. Ahang in a cikzia thei lo husan in kulh a mut gawp huihpi tawh kibanga

⁵sehnel-gam nisa tawh a kibang hi. Meiilum in nisa a dialhsak bangin gamdangte gamlumna na daisak a, tua ciangin a cikzia thei lo mite sip dide hi.

⁶Thahatpen TOPA in hih mual tungah mi khempeuh adingin an lim mahmah, zu gei mahmah - an limpen nekna le zu cilpen dawnna pawi a bawl ding hi.

⁷Amah in hih mual tungah mi khempeuh khuhin a vialcip, minamte khempeuh a kituamnate susia ding hi,

⁸sihna a valhtum den ding hi. Thupipen TOPA in maitang khempeuh pana khitui teng nulsak dinga, leitunga ama mi khempeuh minsiatna a beisak ding hi. TOPA gensa ahi hi.

⁹Tua ni ciangin amaute in, "Hih in eite Pasian hi takpi hi; amah i muanga, amah’n hong hon hi. Hih in TOPA, amah i muanpa ahi hi; ama hotkhiatna ah nuamsa-in kipak ni," a ci ding uh hi.

¹⁰Hih mualtung ah TOPA khut a kinga ding hi; ahi hangin nindum sungah buhtu a kisikcip bangin ama nuai-ah Moab-te a kisikcip ding hi.

¹¹Tuipekpa in tuipekin a khut a van bangin a sungah a khut uh a van ding uh hi. Pasian in amaute kiphatsakpih khut siamna a[63] a niamkhiatsak ding hi.

¹²Amah in a kulh muanhuaite uh zong nuaikhiatsakin a niamsak ding hi; amah in tuate lei tawh kicinin nuaikhiat dinga leivui a suaksak ding hi.