Read Zokam Isaiah 27 Bible Online

Isaiah 27 - Zokam bible

Isaiah 27

¹Tua ni ciangin TOPA in ama namsau - a hiam mahmah, a lian le a vanglian ama namsau in, a kitholhkhia gulpi Leviathan a kual gulpi Leviathan daan thuaksak dinga, tuipi ganhing lianpi a that ding hi.

²Tua ni ciangin - "A gahpha lenggui lo la-in sa un:

³Keimah TOPA in ka vil tawntung a; tui ka buak den hi. Kuamah in a siatsak loh nadingin sun le zanin ka vil hi.

⁴Ka heh kei hi. Lingkungte le thangling kungte in kei hong maituah ta leh amaute phu in gal sungah ka pai teitei dinga; amaute khempeuh mei-in ka hal ding hi.

⁵Ahikeh kei kiang hong zuanin hong bu uh hen; keimah tawh kilemna bawl uh hen, hi hi, keimah tawh kilemna bawl uh hen.

⁶Hong tung ding tua ni ciangin Jacob in zungkha dinga, Israel selkhia-in pak dinga, leitung khempeuh ah a gah a dim ding hi.

⁷Amah a satte sat bangin TOPA in tuanu sat ahi hiam? Amah a thatte thah bangin amah in tuanu that sam ahi hiam?

⁸Kidona a[66] hanga saltang amah tawh a mawh khawmte - nisuahna huih nun ni bangin ama huih hat in tuanu a delhkhia hi.

⁹Amah in biakna-tau suangte khempeuh suangkang satvui bangsak a, Asherah gimnamtui-tau ahikeh khuamte b[67] a po lai a omsak nawn loh ciangin hihte hangin Jacob khialhna kimaisakin a mawhna a kipaihsakna gah ahi ding hi.

¹⁰A muanhuai khuapi a hawmin om a, a teng mi tampi in sehnel-gam bangin a taisan uh hi; tua lai-ah bawngnote gamta in tua lai mah ah giak uh a, a hiangte a hawkmai uh hi.

¹¹A hiang mengte a keu ciangin kitan a numeite pai-in singin a cih uh hi. Ahang in, hih mite in a theitel kei uh hi; tua ahi ciangin amaute a Bawlpa in amaute khuatuah lo a, amaute a Piangsakpa in amaute a angvan kei hi.

¹²Israel-te aw, tuani ciangin TOPA in Euphrates c[68] - luanglai panin Egypt Luipi - dong hong cilkhia in khatkhatin hong khawm ding hi.

¹³Tuateh tua ni ciangin pengkul lianpi khat a ging ding hi. Assyria a, a mangthangte le Egypt ah sala kikaite hong pai-in Jerusalem-a mual siangtho tungah TOPA a bia ding uh hi.