Read Zokam Isaiah 28 Bible Online

Isaiah 28 - Zokam bible

Isaiah 28

¹Ephraim-a zukhamte kisaktheihpih a minthang a mel hoih lei hoihna kuam, lutunga kikhusak pakkual le - zudawnna hanga a khua uh a niamsakte tungah gimna tungta hen!

²En un, Topa in a vanglian a thahatpa khat a nei hi. Amah in huihpi, gialpi le a mutsia thei huih bang, guahciin le tuikhang let bangin leitung a denna suk ding hi.

³Ephraim’ zukhamte kisaktheihpih pakkual, khepek nuai-ah a kituancil ding hi.

⁴Leihoihna kuam lutunga kikhusak tua a vul pak, a mel hoih a minthanna, anlak hun ma-a thei min tawh kibang ding a - mi khatpeuh in a muh phetin lo pahin a valh pah tawh kibang ding hi.

⁵Tua ni ciangin Thahatpen TOPA, a baanglai a mite adingin minthanna lukhu, a melhoih pakkual hi ding hi.

⁶Amah in thukhen dinga tute tungah amah thutang kha hi-in kongpi-a galte a lehnawhte tungah hatna bulpi hi ding hi.

⁷Hihte zong zu hangin pai buatbuat uh a, zucil hangin a hoihoi uh hi: Zucil hangin siampite le kamsangte pai buatbuat uh a, zu in haisakin zucil a hoipih dangdang uh hi. Mang a muh laitakun hi buatbuat uh a, thu a khensat ding uh ciangin a muktu uh hi.

⁸Sabuai tung khempeuh luak dima, nin omlohna mun khat beek a om kei hi.

⁹"Amah in hilh a sawm kua ahi hiam? Amah in a thupuak kua tungah telgen sawm ahi hiam? Ang tawh kikhen khin phet nawi goih lai naupangnote tung ahi hiam?

¹⁰Ahang in, tua pen: khat sep khit teh khat, khat sep khit teh khat, uk khat tungah uk khat, a[69] uk khat tungah uk khat hih lai-ah tawm khat hua lai-ah tawm khat cih bang lel ahi hi,"

¹¹Tua ahileh hoih mahmah hi, gamdang mite muk le kamtuam dang tawh Pasian in a mite hopih ding a,

¹²amaute tungah, "Hih in khawlmun ahi hi, a gimte khawl ta hen," ci a, "Hih in tawlngakna mun ahi hi" ci napi amaute in a ngai kei uh hi.

¹³Tua ciangin TOPA kammal amaute tungah, khat sep khit teh khat, khat sep khit teh khat uk khat tungah uk khat, uk khat tungah uk khat; hih lai-ah tawm khat hua lai-ah tawm khat a cih suak lel a - amaute pai-in a tawtolh nading uh, liamin thangah awka a kimat nading uh a suak hi.

¹⁴Tua ahi ciangin no Jerusalem a hih mite a uk mi simmawhte aw, TOPA kammal za un.

¹⁵No mi kiphasakte in, "Sihna tawh thukhun khatah i lut khin a, hankhuk b[70] tawh thuciam i bawl khin hi. Siatna tuihual in hong nawk ciangin hong sukha lo ding hi, ahang in zuauphuahna i beel a, zuauthu c[71] ah i bu hi," na ci uh hi.

¹⁶Tua ciangin Thupipen TOPA gen hih ahi hi: "En un, a kizia-etsa, inn bulpi dinga a muanhuai, suang manpha suangtum khat Zion ah ka nga khin hi; a muang mi peuhmah a zahlaak ngei kei ding hi.

¹⁷Keimah in thutanna khaukhai ka suaksak dinga, thumaanna saval-bawk ka suaksak ding hi; zuauphuaka na bukna uh gialpi in nuaimang dinga, na bukna mun uh tui in a tuum ding hi.

¹⁸Sihna tawh na thukhun uh a mawkna suak dinga; hankhuk tawh na thuciam uh a kip kei ding hi. Siatna tuihual in hong nawk ciangin note hong sattuk ding hi.

¹⁹Hong nawk sialsialin note hong taimang ding hi; zingsang khat khit zingsang khat sun le zanin hong nawk den ding hi." Hih thupuak theihtelna in lauthawngna ngentang hong tun ding hi.

²⁰Na khekhuan nadingin lupna tomlua dinga, na kituam nadingin puanza neu lua ding hi.

²¹Perazim Vum a, a hih bangin TOPA ding to dinga, Gibeon Kuama a heh bangin amah heh in - ama nasep, a nasep lamdang semin ama bawl, a bawl a piandang a bawl ding hi.

²²Na ciamnuih bawlna na tawp kei leh na sikkhainiang a gikzaw ding hi; Topa, Thahatpen TOPA in gam buppi kisiat nading thukhensat-na kei tungah hong gen khin hi.

²³Ngai inla ka aw za in: limtak ngai-in ka thugen za in.

²⁴Lokhopa in ankungno suan nading lo a khawh ciangin kho zom denden ahi hiam? A leikhalte velkhamin lei hoihte zelh niloh ahi hiam?

²⁵Lei maitang a maihtam khit ciangin caraway vawhin, cummim theh hi lo ahi hiam? Mangbuhte ama munah d[72] suanin mangbuh-ham ama lei e[73] ah, mangbuh-man a lo ah tuh hi lo ahi hiam?

²⁶A Pasian in lamlak a thumaan lampi a hilh hi.

²⁷Buhcilna set-in caraway kicil lo a, Cummin tungah lengpei a kihual kei hi; ciangkang-in caraway kisatkhia a, cianggolhin cummin kisatkhia hi.

²⁸Anlum-a bawl dingin antang kigawizan a tuaci in kuamah in a cil denden kei hi. Amah in ancilna lengpei a tungah a hawl hangin a sakolte in a gawi kei uh hi.

²⁹Hihte khempeuh zong Thahatpen TOPA pana pai hi in, a lamlahna lamdangin a pilna thupi diak hi.