Read Zokam Isaiah 29 Bible Online

Isaiah 29 - Zokam bible

Isaiah 29

¹Ariel, David tenna khuapi Ariel tungah gimna tung ta! Kum khat tungah kum khat gawm toto unla, a kot paipai na pawite uh bawl toto un.

²Tua hi taleh zong Ariel ka umcih ding hi; tua khua thumin taamlo dinga kei adingin biakna-tau tap suangpek a[74] ahi ding hi.

³Na kimkotah giahphual ka sat dinga; tausang-in hong ki-umcihin nang langah umcihna ka bawl ding hi.

⁴Hong kiniamkhiatin, leitual panin na pau ding hi; leivui lak pan na phun mualmual ding hi. Lei sung pan sikha’ aw bangin ging khia dinga; leivui lak pan hong huau siausiau ding hi.

⁵Ahi hangin na gal tampite leivui tawh kibang dinga, a kheltat honpite huihlet ansi leng a bang ding uh hi. Thakhatin

⁶Thahatpen TOPA vanging, zinling le awging lianpi-in, pingpei le huihpi le a hultum meikuangin hong pai vat ding hi.

⁷Tua ciangin Ariel a do minam khempeuh mihon tampite, amah le a mun muanhuai do-a a umcihte zana mangmat bang, zana mangmuh bang dinga -

⁸gilkial khat in a mangin an ne napi a khanlawh ciangin a gil a kiallai veve bang; dangtak khat in a mangin tui dawn napi a khanlawh ciangin gimsa-in khang lo a, a dangtak a phattuam loh tawh kibang ding hi. Zion Vum a do minam honpi khempeuh tua tawh kibang ding hi.

⁹Kiphawngsak unla lamdang sa un, na mit uh tun unla khua mu kei un; zu dawn lopi-in zu kham unla, zucil dawn lopi-in hoi un.

¹⁰TOPA in hong ihsipsak zo a: na mitte khakcipin (kamsangte); na lu a tuncip zo hi (thumu kholte).

¹¹No adingin hih in mangmuhna bangmah hi lo a, laizial sunga kizialcip bang ahi hi. Tua hi a laisim thei mi khat tungah tua laizial pia-in ama kiangah, "Hehpihna-in hih sim dih in," ci lecin, "Kibelhcip hi, sim thei keng," ci-in hong dawng ding hi.

¹²Ahikeh a sim thei lo mi khat laizial pia in, "Hih sim dih in," ci lecin, "Ka sim zia ding thei keng," ci-in hong dawng ding hi.

¹³Topa in, "Hih mite in a kam uh tawh kei hong nai uh a, a muk un kei hong pahtawi uh hi; ahi hangin a lungtang uh kei tawh kigamla hi. Amaute in kei hong biakna uh mihingte b[75] hilhsa ngeina-a kibawl hi lel hi.

¹⁴Tua ahi ciangin hih mite a lamdang sanga a lamdang zaw ka lak lai ding hi; a pilte pilna ka mangthangsak dinga, a teite teina ka mangsak ding hi," a ci hi.

¹⁵A ngimna uh TOPA panin a thuk mahmahna ah sel dingin pai uh a, khuamial sungah na semin, "Eite kua’n hong mu ding hiam? Eite kua’n hong thei ding hiam?" ci-a a ngaihsunte in gimna thuak ta hen.

¹⁶Bel seekpa, a tungman banga ngaihsut bangin nate na lumlet uh hi! A kibawl penin a bawlpa kiangah, "Ama bawlsa ka hi kei hi" ci in, Beel in a seekpa tungah, "Bangmah na thei kei hi," ci thei ding ahi hiam?

¹⁷Hun tomno sungah Lebanon, lo leihoih suakin, tua lo leihoih pen tulak tawh kibang hi lo hiam?

¹⁸Tua ni ciangin bilngongte in laizial-a thute za ding uh a, lungzinna le khuamialna ah mittawte in a mu ding uh hi.

¹⁹A kiniamkhiatte khatvei TOPA sungah lungnuam kik ding uh a; a tasamte Israel-te Siangtho Pa sungah a lungnuam ding uh hi.

²⁰A kheltat mite mangthang ding uh a, mi simmawhte kilang nawn loin gitlohna mit a nei khempeuh -

²¹mi mawhna zonga kammal khat tawh zum sunga mi thangsiahte le mawhpengte thutangna zuau teci panna tawh a lakkhiatsakte khempeuh kisusia mang ding hi.

²²Tua ahi ciangin Abraham tankhiapa TOPA in Jacob innkuante tungah: "Jacob a maizum nawn kei ding hi; amaute’ mai a daang nawn kei ding hi.

²³Amaute in ka khuta ka bawlsa a tate uh amaute lakah a muh uh ciangin ka min siangthosak ding uh a; Jacob’ Siangtho Pa Sianthona kipsanin Israel-te Pasian a kihta ding uh hi.

²⁴Lungsim vakzaute in theitel ta ding uh a; mi phunhatte in a kihilhna sang thei ta ding uh hi," a ci hi.