Read Zokam Isaiah 30 Bible Online

Isaiah 30 - Zokam bible

Isaiah 30

¹"Thumang lo tate in gimna ngah ta hen," TOPA in cikhia a, "amaute kei ngimna lo ngimna a neite, kei’ Kha tawh kop lo a kipawlna a phuante, mawhna tungah mawhna a suangsawnte;

²kei hong dong loin Egypt a paisukte; Pharaoh huhna beel ding le Egypt liahna a zongte ahi uh hi.

³Ahi hangin Pharaoh hutna note maizumna hi dinga, Egypt liim in note zahlakna hi ding hi.

⁴Amaute in Zoan ah ulian nei uh henla amau thupuakte Hanes ah tung ta leh

⁵amau adingin huhna ahi a, hamphatna ahi zongin a pia thei mihing in kimanna nei loin maizumna le zahlakna hi lel ahi manin tuate peuhmah kimaizumsak ding hi.

⁶Negev-a ganhingte tawh kisai thusuak: Humpinelkaite le humpinelkai nute, mualtante le gul lengtheite omna haksatna le lungdonna mun kantanin amaute thupuakte in laa nungzangah a hauhnate uh pua in, a goute uh kala-oh thuvum ah pua uh a, bangmah metna a pia lo minam tung, amau huhna kimanna a nei lo

⁷Egypt-te tungah a puak uh hi. Tua ahi ciangin amah Sep Awl Rahab ka ci hi.

⁸Tu-in pai inla,suangpek tungah gelhsak-in, hong tung lai ding hunah teci a hi tawntung thei dingin laizial tungah khuaksak in.

⁹Hihte in a lehdo mite, a zuauphuak tate, TOPA lamlahna a ngai nuam lo tate ahi uh hi.

¹⁰Amaute in thumute tungah, "Mang mu nawn kei un!" ci uh a, kamsangte tungah, "Ko ading thumaan mangmuhna mu nawn kei un! Thu-nuam hong gen unla, hong khembawl un.

¹¹Hih lampi nusia in hih lampi pan pial unla, Israel-te Siangtho Pa tawh hong kimaituahsak nawn kei un," a ci uh hi.

¹²Tua ahi ciangin Israel-te Siangtho Pa in, "Note in hih thu nialin nuainetna tungah na kinga uh a, zuauphuahna suang na hi manun no adingin

¹³hih mawhna a khangkhamsa, lawtkhia-in a cim dektak kulh sangpi thakhat thu-a cimzuah tawh a kibang ding hi.

¹⁴Leibeel bangin kitamkham dinga man theih om loin kitamnenin a themte lakah meikhuk-a mei-am lak nading, tuikhuka tui suah nadinga man theih ding a kimu kei ding hi," a ci hi.

¹⁵Hih in Thupipen TOPA, Israel’ Siangtho Pa gen ahi hi: "Kisikna le tawlngakna in note hotkhiatna hi a, daihna le muanna note hatna ahi hi; ahi hangin note na tuaci kei uh hi.

¹⁶Note in, ‘Hi lo hi, sakolin ka tai ding uh hi,’ na ci uh hi. Tua ahi ciangin manlangin na tai takpi ding uh hi! Note in, ‘Sakol hat tungah ka tuang ding uh hi,’ na ci uh hi. Tua ahi ciangin note hong delhpa zong a hat semsem ding hi!

¹⁷Note, mualdawna kiphut dialkhai khuam bang le mualtunga dialkhai banga hong kinusiat matengin mi khat tawnna hangin tul khat na taikek ding uha mi nga tawnna hangin na vekun na taikek ding uh hi," a ci hi.

¹⁸Tua hi napi TOPA in note hong hehpih nuam lailai in; ama hong khuatuahna hong lak lailai hi. Ahang in, TOPA in a thutang Pasian ahi hi. Amah a ngak zote khempeuh thupha ngah ahi hi.

¹⁹No Zion mite, Jerusalem a tengte aw, na kap nawn kei ding uh hi. Huhna ngenin na kiko uh ciangin hong hehpih mahmah hi! Amah in a zak phetin hong dawng ding hi.

²⁰Topa in note lungkhamna anlum le sinkhamna tui hong piak ciangin na siate uh bu nawn loin na mit mahmah uh tawh amaute na mu ding uh hi.

²¹Taklam ah kihei-in vei lamah na kihei uh zongin na nung panin na bil un, "Hih lampi hi, tawn un," a cih na za ding uh hi.

²²Tua ciangin nguna kiluan na milimte uh le khama kizut na milim sunte uh na ninsak ding uh a, numeite nin siakna puan bangin tuate lawnmang in, "Mangthang ou!" na ci ding uh hi.

²³Lei sunga na vawhsa khaici adingin guah zong hong zusak dinga, gam sunga an piangte gahpha in a tam mahmah ding hi. Tua ni ciangin na ganhonte uh lonona zapi ah a gamta ding uh hi.

²⁴Lokho bawngtalte le laate in kawbia le kangkui-a kitok ngi-ingei gan-an a ne ding uh hi.

²⁵Kingawng-atna a nasiat mahmah ni-in tausangte a puk ciangin mual sangte le mualsang vumte tung khempeuh ah luituite a luang ding hi.

²⁶TOPA in a mite liamma tunsakin a gimpiakna-mate a damsak ciangin ni bangin khapi tang dinga, ni sagih sunga a tan zahin ni a zah sagih in a tangzaw ding hi.

²⁷En in, TOPA Min, a hehna meikuangsa in hong pai a, meikhu sahpi meii-in hong kaii hi. Thangpaihna tawh a muk kidim a, a leii lah a haltum mei ahi hi.

²⁸Ama husan ngawng ciang a pha luitui khang tawh kibang hi. Amah in haihna-in minamte siatna haih a, amaute a makaihna a khaguh uah a bulh hi.

²⁹Tuateh note in pawi siangtho na bawl ni zan bangun la na sa ding uh hi; Israel Suangpi, TOPA mual tungah tamngai tumsa-in na pai uh bangin na lungnuam ding uh hi.

³⁰TOPA in a thupi ama aw mite zasak dinga, a hehsa a khut, a haltum mei, meiipi kai, huihpi le gialpi-in a musak ding hi.

³¹TOPA’ aw in Assyria susia gawp dinga; a sik ciangkhut in amaute a sattuk ding hi.

³²TOPA in danpiakna ciangkhutin amaute a sat simin, gal sungah amaute a khutin a do bangin khuangte le harp-te tumging tawh a kituak ding hi.

³³Topheth a kibawlphat zawh sawt ta hi; tua in kumpipa adingin a baihsa a om ahi hi. Tua meikhukpi a thuk le a zai-a kibawl hi a, mei le sing a kicingtakin kikoihkhol hi; luiluang tawh a kibang kaat kuanglai TOPA husan a kitawhkuang ding hi.