Read Zokam Isaiah 31 Bible Online

Isaiah 31 - Zokam bible

Isaiah 31

¹Egypt huh nading deiha a paisukte, sakolte tungah kinga-in sakolleng tampite le a sakol-tuangte uh thahatna muanga Israel-te siangtho Pa en lo ahikeh TOPA tung pana huhna a zong lote tungah gimna tung ta hen.

²Tua hi napi amah zong pil a, gimna a tungsak thei hi; amah in a kammal a dokkik kei hi. A kheltatte innkuante le migilote a huhte langah a pang ding hi.

³Ahi hangin Egypt mite mihing hi-a, Pasian hi lo uh hi; amaute sakolte ci-le-sa hi-a, kha ahi kei hi. TOPA in a khut a zankhiat ciangin, a huhpa muktu dinga a kihuhpa a puk ding hi; a nih un a mangthangkhawm ding uh hi.

⁴TOPA in kei tungah hong gen hih ahi hi: "Humpinelkai humham in, humpinelkai lianpi a sa nek tungah bok a - amah nawhkhia dingin tuucing buppi a kikaihkhop uh hangin amau otna in lausak loin, amau husa in a nawngkaisak zawh loh bangin, Zion Vumte le a sannate ah galdo dingin Thahatpen TOPA hong kuansuk ding hi.

⁵Vasa a bu tung sanah a lamlam bangin Thahatpen TOPA in Jerusalem a dal ding hi; amah in dalin hu dinga, amah in ‘paisanin’ a suaktasak ding hi,"

⁶Nakpi taka a lehdo Israel mite aw, ama kiangah kileh kik un.

⁷Ahang in, tua ni ciangin note khempeuh in mawhna tawh a dim khut in a bawlsa ngun le kham milimte na nial ding uh hi.

⁸"Assyria lah mi tawi loh namsau-in puk dinga, mihing aa ahi lo namsau khat in a valhtum ding hi. Namsau mai-ah amaute tai ding uh a, a tangvalte uh zawhtawh thu-in na kisemsak ding hi.

⁹Amaute mun muanhuai launa hangin puk dinga a galte uh dialkhai a muh uh ciangin a galkap mangte uh a tai ding uh hi." a meikuang Zion-a om pa Jerusalem-a pummei neipa TOPA in cikhia hi.