Read Zokam Isaiah 33 Bible Online

Isaiah 33 - Zokam bible

Isaiah 33

¹Hong kisusia nai lo mi susiapa aw, gimna thuak ta in! Kuama lehhek nai loh mi lehhekpa aw, gimna thuak ta in! Na suksiat nawn loh ciangin nang hong kisusia ding hi. Mi na lehhek nawn loh ciangin nang hong kilehhek ding hi!

²TOPA aw, ko hong hehpih in, nang kong lamen uh hi. Zingsang simin kote hong hatsak inla, ka lungdon uh ciangin hong honkhia in.

³Vanah na aw a gin ciangin mite a taikek uh hi; na dinkhiat ciangin minamte kithehthang uh hi.

⁴Minamte aw, na van lakte uh, kauphenote in an a kaihkhop bang ahi hi; kauphe honpi bangin mite in a bawm ding uh hi.

⁵A sangna munah TOPA teng ahi manin a kitawisang hi; amah in thumaan le thutang tawh Zion a dimsak ding hi.

⁶Note hunin amah bulkip kician hi dinga, hotkhiatna le pilna le theihna kholna munpi hi ding hi; TOPA kihtakna in hih gou a[76] kholna tawhtang ahi hi.

⁷En un, a pasal galhangte uh lamdung ah kap uh a; kilemna thupuate nakpi-in a kap uh hi.

⁸Lam lianpite lah hawmmang a, lampi tungah khualzin a om kei hi. Thuciamna kipalsatin a tecite b[77] lah kisimmawh a kuamah a kizahtak kei hi.

⁹Leitang thumin c[78] a tulgawp hi, Lebanon maizumin a vul hi; Sharon, Arabah tawh kibang a, Bashan le Carmel a teh uh pulh hi.

¹⁰"Tu-in ka ding dinga, tu-in ka kitawisang ding hi; tu-in ka kilaamto ding hi.

¹¹Buhvai na paii uh a, buhtu na hingkhia uh hi; na husan uh no hong hultum mei ahi hi.

¹²Leikang hal bangin mite kihal dinga; lingkung vatsa bangin mei-ah kikhul ding hi," TOPA in a ci hi.

¹³Gamlapi-a om note in ka hihsa za un; gamla-a om note in ka vangliatna thei un!

¹⁴Zion-a mawhneite lau uh a; pasian-neilote a ling kauhkauh uh hi: "Eite kua a haltum mei tawh teng khawm thei ding i hi hiam? Eite kua a kuang tawntung mei tawh tengkhawm thei ding i hi hiam?"

¹⁵Thumantakin kalsuana thumaan genpa, mite’ na suh ding ut lo a golhsum sang nuam lopa, mi thah ding ngimna za nuam lo a, gitloh ding sawmna a mu nuam lopa -

¹⁶hihpa in asannate a teng dingpa, mun muanhuaina mual bukna-a a neipa ahi hi. A anlum ding kipuak dinga tui a kisam kei ding hi.

¹⁷Kumpipa mel hoihna na mitin na mu dinga, gam zapi-a kiphah gam na en ding hi.

¹⁸Na mangngilh mawh uh a masa launate: "Kumpi ulianpenpa koi-ah om ahi hiam? Siahdongpa koi-ah om ahi hiam? Tausang cing -ukpa koi-ah om ahi hiam?" ci-in na lungsimun na ngaihsunsun ding uh hi.

¹⁹Tua a kiphasak mahmah mite kam lamdang zanga theihloh pau-a pua bualbualte, na mu nawn kei ding uh hi.

²⁰Pawite i bawlna khuapi Zion en dih un; lungnuama kitenna a kisuankhia lo ding puanbuk khat; a khetphimte kibot ngei loin a khaute a kitat ngei lo ding Jerusalem na mit un na mu ding uh hi.

²¹Tua lai-ah TOPA in eite Thahat Pa, hi ding hi. Tua mun, gun zaipite le lui lianpite omna tawh kibang ding hi. Tuate tungah gal gunkuang kihot nawn lo dinga tembaw hat zong a pai nawn kei ding hi.

²²Ahang in, eite thukhenpa TOPA hi a, thukham piapa TOPA hi-in eite kumpipa TOPA ahi hi; eite hong hon dingpa amah ahi hi.

²³Na puankhai khaute uh kol ta hi: puankhai khuam khihkip zolo-in puankhaite a kizal kei hi. Tua ciangin galvanlak tampi kihawm dinga, khebaite nangawn in vanlak a puakhia ding uh hi.

²⁴Zion-a tengte kuamah in, "Ka ci na," ci lo dinga, tua lai-a tengte mawhnate a kimaisak ding hi.