Read Zokam Isaiah 34 Bible Online

Isaiah 34 - Zokam bible

Isaiah 34

¹No minamte aw, hong naih unla ngai dih un; no mihingte aw, limtakin ngai un! Leitung le a sunga om khempeuh, lei pumpi le a sunga piang khempeuh zasak un;

²Minamte khempeuh tungah TOPA heh hi; amaute’ galkapte khempeuh tungah thangpai hi. Amah in amaute susia khin kiuhkeuh d[79] dinga; amaute thah dingin pia ding hi.

³A kithat amau mite kilawnkhia dinga, a misiluangte uh a uihto lualua ding hi. Mual liante amau sisanin kawt khin pikpek ding hi.

⁴Vante a aksite khempeuh kia dinga laizial bangin vanpi a kizial ding hi; Lenggui pana a tehvul a pulh bang le theikung pana a gahvuai a pulh bangin aksi honpi khempeuh kia ding hi.

⁵Ka namsau in vante ah dawnin kham khin a; en un, a mite ka siatsak kiuhkeuhsa Edom ah thukhenin a tuaksuk hi.

⁶TOPA namsau sisan ah kidiahin, tuunote le keelte sisan le tuutal kalte pana a thaute in a kituam hi. Ahang in, TOPA in Bozrah ah kithoihna khat nei a, Edom ah kithahna lianpi a om hi.

⁷Gam bawngtalte, bawngtalnote le bawngtal lianpite amau tawh a pukkhawm ding hi. Amaute leitang sisanin kawt dimdem dinga sathau in leivuite a tawtkim ding hi.

⁸Ahang in, TOPA in Zion mawhsakte a thuksak ding, dan a tuahsak ding kum khat, a phu lak ding ni khat a nei hi.

⁹Edom luite kultar suak dinga, a leivuite kaat kuanglai suakin; a leitang kultar kuang a suak ding hi.

¹⁰Sun le zanin mit lo dinga a khu tawntung ding hi. Khang khat pan khang khat dongin gam simtham suak dinga khat beek in a tawnkha nawn kei ding hi.

¹¹Sehnel-gam simbu a[80] le simbupi b[81] te in a tang ding uh hi. Simbu liante c[82] le va-akte in tua lai-ah bu a tom ding uh hi. Pasian in Edom tungah a siatna khausai le a hawmsuakna saval a khaisuk ding hi.

¹²Kumpi gam a kicih theih nadingin a uliante in bangmah nei lo ding uh a, a kumpi tapate uh a mangthang khin ding hi.

¹³Amualbote thangling in tuum dinga a kulh muanhuaite lakhai le lingvom in a tuum ding hi. Tua mun, ngiate anzonna mun suak dinga, simbute’ bu suak ding hi.

¹⁴Sehnel gam ganhingte le ngiate kisutuahin sathakte khat le khat a kizawn ding uh hi; tua lai-ah zana gamta ganhingte zong giak ding uh a, a khawlmun ding uh a zong ding uh hi.

¹⁵Simbupi in bu tomin tui dinga, keuhsakin a note a kha liim nuai-ah a kem ding hi. Musite zong tua lai-ah a nupa kopin a omkhawm ding uh hi.

¹⁶TOPA laizial sung en inla sim in: Hihte khat beek kimansuah lo dinga lawmsam khat beek a om kei ding hi. Ahang in, ama kama a thupiaksa hi a, a Kha in amaute a kaikhawm ding hi.

¹⁷Amah in a tanh ding uh a sehsak ding hi; ama khutin amau tanh ding ciat a hawmsak ding hi. Amaute in nei tawntung ding uh a, tua lai-ah khang khat khit khang khat a teng den ding uh hi.