Read Zokam Isaiah 36 Bible Online

Isaiah 36 - Zokam bible

Isaiah 36

¹Kumpi Hezekiah in a uk zawh a kum sawm le lina kumin Assyria kumpipa Sennacherib in Judah khuapi muanhuaite khempeuh simin a la hi.

²Tua ciangin Assyria kumpipa in Lachish panin Jerusalem a om kumpi Hezekiah kiangah a galkap mang lianpa tawh galkap tampitak a sawl hi. Puan sawppa Lo zuatna lampi a Bual Tungnung tuinak ah galkap mangpa a khawl ciangin

³kumpi inn ukpa Hilkiah tapa Eliakim, thuvanpa Shebna le thu ciamtehpa Asaph tapa Joah a kiangah a pai uh hi.

⁴Galkap mang lianpa in amaute kiangah, "Hezekiah kiangah, ‘Hih in kumpi lian, Assyria kumpipa gen ahi hi: Hih na lungmuanna uh bang bulphuh na hi uh hiam?

⁵Note in galsiamna le galkap tha ka nei uh hi, na ci uh hi - ahi hangin a hawmpi-a thu gen na hi lel uh hi. Kei hong lehdo dingin note in kua suang na hi uh hiam?

⁶Tu-in en un, note in a tungah a kingap uh ciangin suna a liamsak thei bek pumpeng ciangkhut them ahi Egypt a suang na hi ta zen uh hi. Egypt kumpipa Pharaoh lah amah suang khempeuh tungah tua mah bangin ahi hi.

⁷Tua hi-a no zong, "Kote in TOPA ka Pasian ka suang uh hi," na cih uh leh - amah pen Hezekiah in a munsangte le a biakna-taute phelkhiatsakin Judah le Jerusalem tungah, "Hih biakna-tau mai-ah na biak uh kul ding hi," a cih pa hi lo ahi hiam?

⁸"‘Tu-in hong pai-in Assyria kumpipa ka pu tawh thu kiciamna bawl un: A tunga tuang ding mi na neih nak uh leh sakol tulnih no kong pia ding hi.

⁹Egypt sakolte sakol tuangte suangin ka pu galkap mangte lakah a neu pen khat nangawn bangci zawh thei ding na hi uh hiam?

¹⁰Tua tham loin hih gam sima a susia dingin TOPA loin hong pai ka hi hiam? TOPA mahmah in hih gam do a pai dingin hong gen ahi hi," ci-in gen un," a ci hi.

¹¹Tua ciangin Eliakim, Shebna le Joah in galkap mang lianpa kiangah, "Thei lel ka hi manun na nasemte tungah Aram pau-in hong gen in. Kulh tunga mite zakin Hebrew pau-in hong hopih kei in," a ci uh hi.

¹²Ahi hangin mangpa in, "Ka pu in nang le na pu tung bekah hih thu gen dingin hong sawl hi lo a, kulh tunga tute - no tawh a kibangin amau ek ne a, a zun uh a dawn khawmte tungah gen dinga hong sawl hi lo ahi hiam?" a ci hi.

¹³Tua ciangin galkap mangpa dingto in Hebrew pau-in awngkhia a, "A lian mahmah kumpi, Assyria kumpipa kammalte za un!

¹⁴Hih in kumpipa’ thugen ahi hi: Hezekiah kikhemsak kei un. Amah in note hong hu zo lo ding hi.

¹⁵Hezekiah in, ‘TOPA in eite hong hu taktak dinga, hih khuapi Assyria kumpipa khut sungah a kipia kei ding hi,’ ci-a hong zolna tawh na TOPA uh muang kha kei un.

¹⁶"Hezekiah thu ngai kei un. Assyria kumpipa gen hih ahi hi: Kei tawh kilemna bawlin kei kiangah hong paikhia un. Tua hileh a kuamah peuh in amau lenggui, amau theikung ciat panin ne ding uh a, amau tuikhuk ciat panin a dawn ding uh hi;

¹⁷keimah hong pai-in no aa tawh a kibang leitang - an le zuthak leitang, anlum le lenggui lei ah kong paipih matengin a tua ci ding hi.

¹⁸"Hezekiah in, ‘TOPA in eite hong hu ding hi,’ ci-a hong genna tawh kimakaih khialsak kei un. Assyria kumpipa khut panin minamte pasian khatpeuh in kua hu zo ngei ahi hiam?

¹⁹Hamath le Arpad pasiante koi-ah om hiam? Sepharvaim’ pasiante koi-ah om hiam? Amaute in ka khut panin Samaria suahtak zo ahi hiam?

²⁰Hih gamte’ pasiante khempeuh kua in ka khut panin honkhia thei ahi hiam? Tua ahileh ka khut panin TOPA in Jerusalem bangci hut thei ding ahi hiam?" a ci hi.

²¹Ahi hangin mite dai khipkhep uh a, a dawnna bangmah a gen kei uh hi; bang hang hiam cih leh kumpipa in, "Dawng kei un," ci-in thu a pia hi.

²²Tua ciangin kumpipa inn ukpa Hilkiah tapa Eliakim, thuvanpipa Shebna, Asaph tapa thuciamtehpa Joah-te a puante uh balkeksa-in Hezekiah kiangah pai uh a galkap mangpipa thugen teng a ko uh hi.