Read Zokam Isaiah 37 Bible Online

Isaiah 37 - Zokam bible

Isaiah 37

¹Kumpi Hezekiah in hih thu a zak ciangin a puante balkek a ippi puan silhin TOPA biakinnpi ah a pai hi.

²Amah in kumpi inn ukpa Eliakim, thuvanpipa Shebna, le siampi makaite in a vekun ippi puan silhsa in Amoz tapa kamsangpa Isaiah kiangah a sawl hi.

³Amaute in, "Hezekiah in, ‘Tuni lungdon ni, tai thuak ni, mindai ni, nau suak ding tha nei lo-a a suakkhia zo lo bang i hi hi.

⁴A pu Assyria kumpipa in a sawl galkap mangpa in a nungta Pasian a simmawhna kammalte TOPA note Pasian in za dinga, TOPA note Pasian in a zaksate hangin amah tai ding hi. Tua ahi ciangin a suakta a omlai sunte pana a baanglaite adingin thu ngen un,’ ci hi," a ci uh hi.

⁵Isaiah kiangah kumpi Hezekiah uliante a tun uh ciangin amaute kiangah

⁶Isaiah in, "Na pu uh kiangah, ‘TOPA thugen hih ahi hi: Na zaksate uh hangin lau kei un - tua Assyria kumpipa kam a gensawnte in kei hong daisak ahi hi.

⁷Ngai un, amah in thuzaksaknate a zak ciangin a gamah ciah a tua lai-ah namsau-in ka satpuk nadingin a sungah kha khat ka guan hi, ci hi,’ ci-in gen un," a ci hi.

⁸Galkap mangpipa in Assyria kumpipa thu a zak khit ciangin Lachish nusia-in nung kik a, kumpipa in Lipnah a sim a mu hi.

⁹Tu-in Sennacherib in, Egypt kumpipa, Cush a[84] mi Tirhakah amah sim dingin a kuanna thu a za hi. Hih thu a zak ciangin amah in Hezekiah tungah kamtai sawl a,

¹⁰"Judah kumpipa Hezekiah kiangah: Na muanpa ‘Assyria kumpipa khut sungah Jerusalem kipia lo ding hi’ a ci na pasian in nang hong khem hi.

¹¹Hi takpi hi, Assyria kumpite in gam khempeuha a hihsa a suksiat kiuhkeuh lam na za khin hi. Tua hi-a nang hong kihu tuan ding ahi hiam?

¹²Minamte pasiante - Gozan, Haran, Rezeph le Tel Assar a om Eden mite pasiante in ka pute uh suksiatsate hu zo uh ahi hiam?

¹³Hamath kumpipa, Arpad kumpipa Sepharvaim khuapi kumpipa ahikeh Hena ahikeh Ivvah kumpipa-te koi-ah om ta uh ahi hiam?" a ci uh hi.

¹⁴Hezekiah in kamtaite tung panin a laikhak ngah a sim hi. Tua ciangin TOPA biakinnpi ah paito in TOPA mai-ah a zal hi.

¹⁵Tuateh Hezekiah in TOPA tungah thu ngen a:

¹⁶"Thahatpen Cherub-te kikala tu TOPA Israel Pasian aw, leitung kumpi gam khempeuh tungah nang bek Pasian na hi hi. Leitung le vantung na bawl khin hi.

¹⁷TOPA aw, na bil hong ngat inla hong za in; TOPA aw, hak inla hong mu in; Sennacherib in a nungta Pasian a zahkona kammalte khempeuh za in.

¹⁸"TOPA aw, Assyria kumpite in amaute gam le a mite a siatsakna a maan ahi hi.

¹⁹Amaute in pasian ahi lo amau pasiante mihing khuta kibawl sing le suang hi lel ahi manin meikhuk ah pai-in a susia uh hi.

²⁰TOPA kote Pasian aw, tu-in leitunga kumpi-gam khempeuh in TOPA aw, nang bek Pasian b[85] na hilam a theih nadingun ama khut panin hong hukhia in," a ci hi.

²¹Tua ciangin Amoz tapa Isaiah in Hezekiah tungah thu puaka: "Hih in TOPA Israel-te Pasian gen ahi hi: Assyria kumpipa tawh kisai kei tungah thu nong ngetna hangin

²²hih in ama tungah TOPA gensa kammal ahi hi: "Zion Tanu Bit in nang hong simmawhin hong zahko hi. Jerusalem Tanu in na tai laitakin a lu hong peisan hi.

²³Na zahko a na daisak kua ahi hiam? Kua langah na aw sangsakin na kiphatsakna mit tungliik na hi hiam? Israel-te Siangtho Pa langah maw!

²⁴Na kamtaite zangin TOPA na zahkona na uanglua mahmah hi. Tuateh nang in, ‘Ka sakolleng tampite-in asanna mualdawnte le Lebanon mualdawn kui ah ka kahto khin hi; a tamtak sangpente a takkung hoih pente ka phuk khin hi. A sangpenna adawn kui-a tulak hoihpenna mun ka tung khin hi.

²⁵Gamdangte c[86] ah tuikhuk ka to khina, tua lai-ah tui ka dawn khin hi. Ka khepekte nuai tawh Egypt luite khempeuh ka keusak hi,’ na ci hi.

²⁶"Za nai lo na hi hiam? Sawtpi-a ka kipsaksa ahi hi. Tanglai pekin hih dinga ka ngimsa hi a, tu-a ka tunsak hi-in nang in khuapi muanhuaite suangtum hon lak na suaksak hi.

²⁷Amau mite, a vang uh kiama a lung uh kia-in a maizum uh hi. Amaute lo lai-a kungnote, lopa hing ngekte, innkhum tunga po a khankhit ma-a kausan d[87] lopate tawh kibang uh hi.

²⁸"Ahi hangin na tenna mun, na paisuk na pai tohna ah kei nong hehsaknazia ka thei hi.

²⁹Kei nong hehsakna hang le nong thusimlohna ka zakna hangin na nakah sikkawi kong bulh dinga na kamah kamkaih kong bulh dinga nong kuanna lampi ah kong ciahsak kik ding hi.

³⁰Hezekiah aw, hih in nang adingin lim ahi ding hi: "Tu kumin anli pote na ne ding uh a, a kum nihna ah tua bangmah na ne ding uh hi. Ahi hangin a kum thumna kumin vawhin na at ding uh a, lenggui suanin a gah na ne ding uh hi.

³¹A baanglai Judah innkuante in khatvei a nuai-uah zung kha kikin a tungah gah a gah ding uh hi.

³²Ahang in, Jerusalem panin a baanglaite paikhia ding uh a Zion Vum panin a suaktate honkhat a paikhia ding uh hi. Thahatpen TOPA deihluatna in hih a tungsak ding hi.

³³"Tua ahi ciangin Assyria kumpipa tawh kisai TOPA gen hih ahi hi: "Amah hih khuapi ah lut loin hih lai-ah thaltang khat zong a kap kei ding hi; a mai-ah a lum tawh pai loin umcihna panmun a bawl kei ding hi.

³⁴A kuanna lampi mah ah ciah kik ding hi; amah hih khuapi sungah a lut kei ding hi," TOPA in cikhia hi.

³⁵"Kei le ka nasempa David khualna-in hih khuapi dalin ka honkhia ding hi," a ci hi.

³⁶Tua ciangin TOPA vansawltak paikhia a, Assyria-te giahphual ah mi tulza le tul sawmgiat le nga a that hi. A zingciang mite a thawh uh ciangin tua lai-ah misi-luang vive na om hi!

³⁷Tua ciangin Assyria kumpipa Sennacherib in giahbuk phelin a nung kik hi. Amah Nineveh ah ciahin tua lai-ah a om hi.

³⁸Ni khat biakinn ah a pasian Nisroch a biak laitakin a tapa Adrammelech le Sharezer in a namsau un atlum uh a, amaute Ararat gamah a tai uh hi. A tapa Esarhaddon in a kumpiza a luah hi.