Read Zokam Isaiah 40 Bible Online

Isaiah 40 - Zokam bible

Isaiah 40

¹Hehnem un, ka mite hehnem un, note Pasian in hong ci hi.

²Jerusalem tungah awnemin gen unla ama tungah tangko un. Ama nasep haksapi kimansiang ta a, a mawhna thaman kipia khin hi; amah in TOPA khut panin ngah a, a mawhnate khempeuh a zah nihin kithuk hi.

³Aw khat in: "Sehnel-gam ah TOPA b[91] pai nading lampi sial un, gampalak ah Pasian c[92] adingin lam lianpi na tangsak un.

⁴Kuam thuk peuhmah kivukdim dinga, muallian le mualneute peuhmah a kiniamsak ding hi; lei puamna munte kimaihtam dinga lei phok munte kitamsak ding hi.

⁵Tua ciangin TOPA minthanna kilaak dinga, mihing khempeuh in a mu ding uh hi. Ahang in, TOPA kam in a gensa ahi hi.

⁶Aw khat in, "Kiko in," hong ci hi. Tuateh, "Bang kiko ding ka hiam?" ka ci hi. "Mi khempeuh lopa tawh kibang a, amau minthanna khempeuh gamlak pak tawh kibang hi.

⁷TOPA huu in amaute mut ahi manin lopate vulin pakte a pulh hi. Mite lopa hi takpi hi.

⁸Lopate vulin pakte a pulh hi, ahi hangin eite Pasian kammal kip tawntung hi," hong ci hi.

⁹No Zion a thuhoih puakte aw, mualsang tungah kahto un. No Jerusalem d[93] a thupha puakte aw, na aw uh sangsak unla awng un, sangsak un, lau kei un; Judah khuapite tungah, "Note Pasian hiah om hi," ci un.

¹⁰En un, a Lianpen TOPA vanglian-in hong pai-a, a bante in ama adingin a uk hi. En un, a pahtakman hong kenga a lohkikna hong keng hi.

¹¹Tuucingpa bangin a tuuhonte vaka, tuunote a ang sungah khawmin amaute dawm mahmah in pua dinga; a no neite damdamin a masuan hiathiat ding hi.

¹²Kua in a khutkuakin tuite teh a, vante a zapekin ciamteh ahi hiam? Kua in leitung leivui lawh ah guangin mualliante a tehna-in khai a, mualneute tawi teh ahi hiam?

¹³Kua in TOPA’ lungsim a[94] theitel a, ahikeh thulakpa bangin amah lamlak ahi hiam?

¹⁴TOPA in amah a phawksak dingin kua donga, kua in lammaan hilh ahi hiam? Theihna a hilh ahikeh theihtelna lampi a lak kua ahi hiam?

¹⁵Hitakpi hi, minamte beelkhai khat sunga tuimal khat tawh kibang lel a, tawikhaina tunga leivui baang tawh kibang lel hi; amah in tuikulhte leivui them bangin a dom lel hi.

¹⁶Biakna-tau ah mei-a cih dingin Lebanon kicing zo lo, meihal biakna dingin a ganhingte a kicing zo kei hi.

¹⁷Minamte khempeuh ama mai-ah bangmah hi lo uh a, amah in bangmah a hi lo sanga man nei lozaw in a ngaihsun hi.

¹⁸Tua ahileh nang in Pasian le kua tehkak ding na hi hiam? Bang lim tawh amah enkak ding na hi hiam?

¹⁹A kibawltawm milim ahileh khutsiam khat in sunga kham seekpa in khamtui luanin a zepna sikkhainiangte a sunsak hi.

²⁰Mizawng mahmahte in tua banga a piak dingun a muat lo ding sing a tel uh hi. A kilok lo milim khat a phuhsak dingin khutsiam mi khat a zong hi.

²¹Thei nai lo na hi uh hiam? Za nai lo na hi uh hiam? Atung-a kipan hong kigen lo ahi hiam? Leitung a kiphuh khit nungsang theitel pah lo na hi uh hiam?

²²Amah leitung kimvel tungsana tupa hi a, leitunga mite kauphe tawh a kibang hi. Amah in vante, tungzakpuan bangin zala, ten nading puanbuk bangin a zal hi.

²³Amah in kumpite bangmah lo suaksak a, hih leitung gam-ukte bangmah lo dongin a kiasak hi.

²⁴Amaute a gina-in kisuan khinphet, amaute a gina-in kivawh khitphet, amau in lei sungah zung kha khinphetin amah in mutin vul uh a, ansi bangin pingpei in lenmang hi.

²⁵"Kei kua tawh hong teh ding na hi uh hiam? Ahikeh kei kua tawh kikim ka hi hiam?" Siangtho Pa in ci hi.

²⁶Dakto unla vante en dih un. Hihte khempeuh kua piansak ahi hiam? Amah in aksi honpite khatkhatin suaksak a, a min ciatun a sam hi. Ama vangliatna le thahatna hangin amaute khat beek a mangthang kei hi.

²⁷Jacob aw, bang hangin, "TOPA panin ka lampi kisel a, ka Pasian in ka thu don lo hi," ci a, Israel aw, bang hangin mawhsak na hi hiam?

²⁸Thei nai lo na hi uh hiam? Za nai lo na hi uh hiam? TOPA pen tawntung Pasian hi a, leimongte Piangsakpa ahi hi. Amah gim loin tawl lo dinga ama theihtelna kuamah in a lamteh thei kei ding hi.

²⁹A gimte tha guana a thanemte’ vangliatna a khangsak hi.

³⁰Khangnote nangawn gimin tawl uh a, khanglaite muktu in a puk uh hi;

³¹ahi hangin TOPA tungah lametna a neite a tha uh a dim kik ding hi. Amaute muvanlai bangin a kha un lengto ding uh hi; tai ding uh a, gim lo ding uh hi, lampai ding uh a, a bah kei ding uh hi.