Read Zokam Isaiah 42 Bible Online

Isaiah 42 - Zokam bible

Isaiah 42

¹"Hih lai-ah ka letkip, ka lungkimna, ka telsa ka nasempa a om hi. Ama tungah ka Kha ka koih dinga, amah in minamte tungah thutang a puak ding hi.

²Amah in lamlian dungah a aw sangsakin awng lo, kiko lo ding hi.

³A kisat liamsa pumpeng kuaitan loin, a tang kiukiau meivakkhau a mutmit kei ding hi. Muanhuaina tawh thutang a pusuah khia ding hi;

⁴Leitungah thutang a kipsak khit mateng ngaklah loin a lungkia kei ding hi; tuikulhte in ama thukham a lamen ding uh hi," a ci hi.

⁵Vante piangsakin tuate a zalpa, leitung phah a, a sung pana piangkhia khempeuh a piangsakpa leitung mite tungah huu a guanpa le a tunga lampai khempeuh nuntakna a piapa - Pasian TOPA in:

⁶"Keimah TOPA in thumaanna tawh nang kong sam khin hi; na khut ka lenkip ding hi. Nang hong kemin mite adingin thukhun Gentile-te adingin khuavak kong suaksak ding hi.

⁷Mittawte mit honsak ding, thong sung pan le thong hawmpi sunga khuamial laka tute a khahkhia ding na hi hi.

⁸"Keimah TOPA ka hi hi; tua in ka min ahi hi! Ka minthanna midang khat tungah ahikeh hong kiphatna milimte tungah ka pia kei ding hi.

⁹En in, a ma-a nate piang khin a, a thak nate kong genkhia hi; amaute mihingin a pian ma-un note tungah kong zasak khin hi," a ci hi.

¹⁰Tuipi sunga paisukte le tuipi sunga omte, no tuikulhte le a sunga tengte khempeuh aw, leimongte panin amah phat unla, lathak khat TOPA sak un.

¹¹Sehnel-gam le a khuapite, Kedar mite tenna-a tengte lungdamin a aw uh sangkhaisak un. Sela mite lungdamin lasa uh henla; mual liante dawn panin awngsak un.

¹²TOPA minthanna amaute gensak unla tuikulhte ah amah phatna tangkosak un.

¹³Mi thahatpa bangin TOPA kuankhia a, galhangpa bangin deihluatna sosak dinga; galphawnna aw khatvei kiko in a galte a zo khin ding hi.

¹⁴Sawtveipi ka dai khikhe khin a; kei le kei kidek tentanin ka kidaisak hi. Ahi hangin tu-in numei nausuak bangin kiko khia-in ka tungnak hathat hi.

¹⁵Mualliante le mualneute ka mangthangsak dinga anteh-sawlbawk khempeuh ka keucipsak ding hi; gunte tuikulh ka suaksak dinga, bualte ka keucipsak ding hi.

¹⁶Keimah in mittawte a theih ngei lohna munah ka pi dinga, a tawt nai lohna lampi ah lam ka hilh ding hi; amaute mai-ah khuamial khuavak ka suaksak dinga, aham lampite ka nelsak ding hi. Ka sep ding nate hihte ahi hi; amaute ka nusia kei ding hi.

¹⁷Ahi hangin milimte a muangte, milim tungah, "Nang kote pasian na hi hi," a cite, kilehkiksakin a maizum mahmah ding uh hi.

¹⁸"No bilngongte aw za un; no mittawte aw en unla mu un!

¹⁹Ka nasempa lo kua mittaw a, kamtai-a ka sawlpa bangin kua bilngong ahi hiam? Kei tunga hong kiciampa bangin kua mittaw a, TOPA’ nasempa bangin kua mit taw ahi hiam?

²⁰Na tampitak na muh khit hangin na thusim kei hi; Na bilte vak napi bangmah na za kei hi,"

²¹Ama thumaanna khualna-in a thukham liansaka minthansak ding TOPA lungkimna hi.

²²Ahi hangin hih mite a kibuluh neihsa a kisutte hi uh a, amaute khempeuh duma thang kisiah ahikeh thong sunga kiselte ahi uh hi. Amaute a hu ding a om lo a kiluhgawpte suak uh a, kuamah in, ‘Hong khak kik un,’ a cih loh van kisutte a suak uh hi.

²³Mailam hunah hih thu a ngai ding ahikeh a thusim cinten ding kua na hi uh hiam?

²⁴Kua in suhgawp dingin Jacob pia a, a buluhte tungah Israel pia ahi hiam? A tunga i mawhnapa TOPA hi lo ahi hiam? Ahang in, amaute in a lampi zui lo uh a; a thukham a mang kei uh hi.

²⁵Tua ahi ciangin amaute tungah a hehna kuanglai le a gal ngongtat a sungkhia hi. Meikuang in tuamcip napi amaute in a theitel kei uh hi; amaute kang napi ngaihsutin a nei kei uh hi.