Read Zokam Isaiah 43 Bible Online

Isaiah 43 - Zokam bible

Isaiah 43

¹Ahi hangin, tu-in hih in TOPA gen ahi hi - Jacob aw, note hong piangsak amah hi a, Israel aw, note hong bawl amah hi: "Note hong tankhin ka hi manin lau kei un; na minun kong sam khin a; note kei aa na hi uh hi.

²Tui na ngahtan uh ciangin no tawh ka om dinga; gunte na ngahtan uh ciangin hong tai kei ding hi; meikuang lak kantanin na pai uh ciangin hong hul kei ding hi; meikuang in nang hong kang kei ding hi.

³Ahang in, keimah in TOPA note Pasian Israel Siangtho Pa note Honpa ka hi hi; nangmah tatna-in Egypt ka pia a, nang tangin Cush a[96] le Seba ka pia hi.

⁴Ka muhna ah manpha in kong pahtawi nungsang le nang kong itna hangin nang khekna-in mite ka pia dinga, na nuntakna khekna-in mihingte ka pia ding hi.

⁵Hong ompih ka hi manin lau kei in; nisuahna panin na tate kong puak dinga, nitumna panin nang kong kaikhawm ding hi.

⁶Leilu-lam kiangah, ‘Amaute piakhia un,’ ci in, leitaw-lam kiangah, ‘Amaute lehkaih kei un,’ ka ci ding hi. Gamlapi panin ka tapate, leimongte panin ka tanute -

⁷ka minthan nadinga ka piansakte, sutuah a ka bawlte, ka mina kilote peuhmah hong puak un,’ ka ci ding hi," a ci hi.

⁸Mit nei napi mittawte, bil nei napi bengngongte pikhia un.

⁹Minam khempeuh kikaikhawm in, mite kikhawm hi; amaute kua pen in hih thu genkhol a, a piangsa nate hong tangko ahi hiam? Midangte in za uh a, "Hih thu man hi," a cih theih nadingun, amaute a man a hilam uh a lak dingin teci kipuaksak un.

¹⁰"Note ka teci na hi uh hi," TOPA in cikhia a, "kei in amah ka hilam thei-in um a nong theihtel nadingun kong teelsa ka nasempa na hi hi. Kei om ma-in Pasian kibawl lo a, kei om khitin zong khat beek a om tuan kei hi.

¹¹Kei, keimah TOPA longal honpa dang a om kei hi.

¹²Keimah kong kilaaka, kong honkhia-a, kong tangko khin hi, note lakah kei bek ka om a, gamdang pasiante a om kei hi. Keimah Pasian ka hilam note ka teci na hi uh hi," TOPA in a cikhia hi.

¹³Hi hi, tangtawnga kipan kei amah ka hi hi. Ka khut panin kuamah in a hukhia thei kei hi. Na ka sep ciangin kua in hong phelkik thei ahi hiam?" a ci hi.

¹⁴TOPA gen hih ahi hi - note hong Tanpa, Israel-te Siangtho Pa in: "Note tangin Babylon ah ka paisak dinga Babylon mite a[97] khempeuh amaute kisaktheihpih a tembawte un ka taimangsak ding hi.

¹⁵Keimah TOPA, note Siangtho Pa, Israel a Piangsakpa, note kumpipa ka hi hi," a ci hi.

¹⁶TOPA cih hih ahi hi - amah tuipi kantana lampi sialpa, tuihat kantana lampi bawlpa,

¹⁷sakolte le sakollengte, galkapte le kihutnate khempeuh nawhkhia a, a tho kik nawn lo dingin tua lai- ah a lumsak, meivak khau sukmit banga sumitpa:

¹⁸"A tungsa nate mangngilh un, a beisate tungah na lungsim uh tengsak kei un.

¹⁹En un, na a thak ka bawlbawl ta hi; tu-in a mengkhia ta hi phawk lo na hi uh hiam? Sehnel-gam ah lampi ka sial dinga gamtul ah luite ka luangsak ding hi.

²⁰Gamsate - ngiate le kala-oh vasate in kei hong pahtawi ding uh hi, bang hang hiam cih leh sehnel-gam ah tui ka pia a, gamtul ah luite luangsakin,

²¹tua pen kei mahmah in ka bawlsa, ka teelsa ka mite in kei phatna a tangko theih nadingun amaute dawn dinga ka piak ahi hi.

²²Tua hi napi Jacob aw, note in kei nong sam kei uh a, Israel aw, kei adingin no le no na kigimsak kei uh hi.

²³Meihal biakna dingin tuu nong puak kei uh a, na kithoihnate uh tawh nong pahtawi kei uh hi. An-a biakna-in vangik kong suan kei a, gimnamtui hong ngenin kong kicimtaksak kei hi.

²⁴Kei adingin kawltu namtui khatpeuh nong leisak kei a, na biakna sathaute in nong taisak nai kei hi. Ahi hangin na mawhnate-un vangik nong suan uh a, na tatkhialhnate-un nong gimsak uh hi.

²⁵Kei mahmah ka kikhualna-in na thupalsatnate uh hong paihsak keimah, kei mahmah in na mawhnate uh ka ciamteh nawn kei hi.

²⁶A beisa thu kei adingin en kik dih un, thu kikumkhawm dih ni, mawhpeng na hihna thu sung dih in.

²⁷Na pa masa pen uh mawh a; na thu sungte un kei hong lehdo uh hi.

²⁸Tua ahi ciangin na biakinnpi ua thuneipite ka mindaisak dinga Jacob tungah siatna b[98] tungsakin, Israel ka zahlak sak ding hi.