Read Zokam Isaiah 44 Bible Online

Isaiah 44 - Zokam bible

Isaiah 44

¹"Ahi hangin ka nasempa Jacob aw, ka teelsa Israel aw, tu-in ngai in.

²TOPA gen hih ahi hi - naubu sungah hong sutuah in hong bawla hong huh dingpa in: Ka nasempa Jacob aw, ka teelsa Jeshurun aw, lau kei un.

³Ahang in, leigawtak tungah tui ka sung dinga, leikeu tungah lui ka luangsak ding hi; nangma suante tungah ka Kha ka sung dinga, na tu na tate uh tungah thupha ka pia ding hi.

⁴Amaute lonona-a lopate bangin - selkhia ding uh a, luiluang gei-a po gialheek kung a bang ding uh hi.

⁵Khat in, ‘TOPA aa ka hi hi,’ ci dinga, adang khat amah le amah Jacob minin a kisam ding hi; adang khat lai in a khut tungah, ‘TOPA aa’ ci-in gelh dinga Israel min a kiphuah ding hi.

⁶TOPA cih hih ahi hi - Israel-te Kumpipa le Tanpa, Thahatpen TOPA in: Keimah a masapen le keimah a nunungpen ka hi hi; Keimah longal Pasian dang a om kei hi.

⁷Tua ahileh kei tawh kibang kua ahi hiam? Amah kigenkhiasak un. Amah kipulaksak unla ka mai-ah hong koihkhia un; tanglai-a ka mite ka kipsak nungsangin bang piang khin a, bang piang lai ding ahi hiam, genkholhsak un.

⁸Ling kei un, kihta kei un. Hih thu sawtpi-in genkhol khin hi lo ka hi hiam? Note ka teci na hi uh hi. Kei lo Pasian dang om ahi hiam? Om lo hi, Suangpi dang a om kei hi; khat beek ka thei kei hi,"

⁹Milim bawlte khempeuh bangmah hi lo uh a, a khol uh goute in man a nei kei hi. Tuate adinga kampaute mittaw hi a; amau maizumna a thei lo uh ahi hi.

¹⁰Amah bangmah a lawhtaksak lo pasian lim bawlin milim sung kua ahi hiam?

¹¹Amah a pawlpihte le amah kimaizumsak dinga; milim bawl khutsiamte lah mihing lel mah ahi uh hi. Amaute a vekpi un kikaikhawmsak unla panmun lasak un; amaute kibing phawnin kilausak ding hi.

¹²Sikseekpa in a na zatte khat la a, mei-am lakah a khul hi; sekin lim khat seeka a khut hatna-in a seek hi. Amah a gil kialin a tha zaw hi; tui dawn loin a bah hi.

¹³Sing sep siampa in khau-in teh a, a bawlzia ding ciamteh hi; singnawtna-in nawtngil a, compass-te in a teh hi. Mihing limin geel a, biakbukno a koih dingin mihing minthanna khempeuh a kimin a bawl hi.

¹⁴Amah in tamtak ahikeh siasing ahikeh tawsaw phukin a lak hi kha ding hi. Amah in gammang singte lakah khangsakin ahikeh taksing suana, guahtui in a khangsak hi.

¹⁵Tua in mihingte singcih ding hi a; amah in pawlkhat la in mei-a awi dingin zanga, mei tawhin anlum a emna hi. Ahi hangin pasian dingin khat zemin a bia hi; milim khatin bawla a mai-ah a kun hi.

¹⁶A singte alang mei-in cih a; a tungah a an ding huanin, sa haangkeu in a khamtakin a ne hi. Amahmah in mei awi a, "Ah! Ka khua lum tah ei; mei mu ta’ng ei!" a ci hi.

¹⁷A omlaite ama pasian dingin milim khatin bawl a; a mai-ah kunin a bia hi. Tua milim tungah thu ngena, "Nang ka pasian na hi hi; hong hon in," a ci hi.

¹⁸Amaute in bangmah thei lo uh a; bangmah a theitel kei uh hi; khua muh theih loh nadingin a mitte uh kibelh a, a theihtel theih loh nadingun a lungsim uh kikhaksak hi.

¹⁹Khat beekin ngaihsun lo uh a, khat beek in, "Alang mei-in ka cih khin a; a am tung nangawn ah anlum ka em a, sa hangkeu-in ka ne khin hi; a val laite-in a kihhuaina bawl ding ka hi hiam? Singbek khat mai-ah kun buang ding ka hi hiam?" cih nading theihna le theihtelna nei buang lo uh ahi hiam?

²⁰Amah vut-in kivaka, a lungsim khemna in amah makaih khial a; amah le amah kihon thei loin, "Ka taklam khut sunga na zuaupi hi lo hiam?" zong a ci thei kei hi.

²¹"Israel aw, ka nasempa na hi manin, Jacob aw, hih nate ciamteh in; nang kong bawl khin a, ka nasempa na hi hi; Israel aw, nang kong mangngilh kei ding hi.

²²Keimah in thupalsatnate meii bangin ka phiatmang khin a, na mawhnate zingsang meiilum bangin ka thengsak zo hi. Nang kong tankhia khin hi, hong ciah ta in," a ci hi.

²³Hih in TOPA sepsa ahi manin vante aw lungdamin la sa un; nuai-a lei aw, nakpi in kiko in. No mualliante, no tulak le singkungte khempeuh aw, TOPA in Jacob tankhia khin a, Israel sungah amah kiminthangsak khin ahi manin la sakhia zuah un.

²⁴"TOPA gen hih ahi hi - naubu sungah nang hong sutuah nangma Tanpa in: Keimah TOPA, na khempeuh a bawlpa, amah kia-a vantungte a phahpa, kei guaka leitung a zalhkhiapa,

²⁵kamsang zuaute’ limte tangtungsak loin ai sante mihai a suaksakpa, mipilte theihna lawnthalin bangmah lo a suaksakpa,

²⁶a nasemte kammalte semkhia in, a kamtaite thugente a tangtungsakpa, Jerusalem tungah ‘Mi hong teng ding hi’ ci a, Judah khuapite tungah, ‘Amaute kilam ta ding hi,’ ci a, tuateh tua a siasate, ‘A ngei ka bangsak ding hi,’ a cipa,

²⁷tuithukte tungah, ‘Keu in, na luite ka kangsak ding hi,’ a cipa,

²⁸Cyrus tungah, ‘Amah ka tuucingpa hi a, ka lungkimna khempeuh kimsakin, Jerusalem tungah, "Kilam kik in," ci a, biakinnpi tungah, "Na bulpi kiphut ding hi," a cipa ka hi hi.