Read Zokam Isaiah 45 Bible Online

Isaiah 45 - Zokam bible

Isaiah 45

¹Hih in ama mai ah minamte nuaisiaha kumpite a gal van uh a hawkkhia ding le kongpite a kikhak loh nadingin ama mai ah kongkhakte a hong dinga a taklam khut ka let, a sathau nilhpa Cyrus tunga TOPA in a gen ahi hi.

²Na mai-ah ka pai dinga, mualliante a[99] maihtamin sumngo kongpite ka sutan dinga a kalhna sikzawlte ka attan ding hi.

³Note mina hong sam TOPA Israel-te Pasian keimah ka hilam na theih nadingun khuamialna goute le mun simthama kikhol hauhnate nang kong pia ding hi.

⁴Ka nasempa Jacob, ka teelsa Israel ka cihna-in na minun kong sama, nong theih loh uh hangin pahtawina za min note kong pia hi.

⁵Keimah TOPA ka hi-a, adang kuamah a om kei hi; keimah longal Pasian dang a om kei hi. Nang nong theih loh hang in, kong thakhauhsak ding hi,

⁶tua pen nisuahna pan nitumna mun dong mite in kei longal adang kuamah a om loh lam a theih nading uh ahi hi. Keimah TOPA ka hi-a, adang a om kei hi.

⁷Khuavak ka bawla, khuamial ka piangsak hi, ka daupaisak a, tuahsiatna ka piangsak hi; hihte khempeuh keimah TOPA hih ahi hi.

⁸"Tunglam a vante aw, thumaanna zusak un; meiite buaksuksak un. Leitung zapi-in kihong henla, hotkhiatna phultosakin thumaanna tawh pokhawm hen; keimah TOPA in ka piansak ahi hi.

⁹"Amah a Bawlpa tawh a kitawngpa tung, leituala leibeel themte laka leibeel them khat tungah gimna tung ta hen. Tungman in beelseekpa tungah, ‘Nang bang bawl na hi hiam?’ ci thei ahi hiam? Na nasep in, ‘Amah in khut a nei kei hi,’ ci thei ding ahi hiam?

¹⁰A pa tungah, ‘Nang bang ta nei na hi hiam,’ ahikeh a nu kiangah, ‘Nang bang hingkhia na hi hiam?’ a cipa in gimna thuak ta hen.

¹¹"TOPA gen hih ahi hi - Israel-te Siangtho Pa amah Bawlpa in: Hong tung ding nate tawh kisai-in, ka tate thu tawh kisai ahikeh ka khuta ka sepsate hong dong na hi uh hiam?

¹²Leitung a piangsakpa keimah ka hi a, a tunga mihing a piangsakpa keimah ka hi hi. Keima khutin vantungte ka zalkhia a, amau aksi honpite ka gual hi.

¹³Ka thumaanna-in Cyrus b[100] ka khangsak dinga: a lampite khempeuh ka tangsak ding hi. Ka khuapi a lampha dinga ka saltangte a khah ding hi; ahi hangin tua pen thaman ading ahikeh pahtakman hi lo ding hi,’ Thahatpen TOPA in ci hi,"

¹⁴TOPA gen hih a hi hi: Egypt gama na piangte, Cush c[101] a sumbuk vante le Sabean mi tunsangte - na kiangah hong pai ding uh a, nang aa ahi ding uh hi. Amaute in nang hong nungzuih ding uh a, sikkhau khihsa-in nang kiang hong zuan ding uh hi. Amaute na mai-ah kun ding uh a, hong thumin, ‘Nang tawh Pasian om takpi a, adang a om kei hi; pasian dang a om kei hi’ ci ding uh hi," a ci hi.

¹⁵Israel-te Honpa le Pasian aw, amah le amah a kisel a man Pasian nangmah na hi hi.

¹⁶Milim bawlte khempeuh kizumsak, kizahlaksak ding hi; amaute zahlakin a paikhia khawm ding uh hi.

¹⁷Ahi hangin TOPA in tawntung hotkhiatna-in Israel a honkhia ding hi; khang tawntungin note hong kimaizumsak, hong kizahlaksak nawn kei ding hi.

¹⁸Ahang in, TOPA cih hih ahi hi - Vante a piangsakpa amah Pasian ahi hi; amah in leitung zemin bawla kipsak hi; a hawma om dingin piangsak lo a, mihing ten nadingin a sutuah hi - Amah in: "Keimah TOPA ka hi a, adang a om kei hi.

¹⁹Keimah in khuamialna mun khatpeuh panin a simthamin thu ka gen kei a; Jacob suante tungah, ‘A mawkna-in kei hong zong un,’ ka ci kei hi. keimah TOPA in thutak ka gen hi; thumaan bek ka genkhia hi.

²⁰"No minamte pana a taimangte aw, kikaikhawmin kigawm unla hong pai un. A hon thei lo pasiante tungah thu ngen a, sing milim a pua kawikawite bangmah a thei lo uh ahi hi.

²¹Bang piang ding hiam genkhia-in thu sung un - amaute kikumkhawmsak un. hih thu sawt pekin kua in genkhol a, hun beisa lai-in kua in genkhia ahi hiam? a genkhia keimah TOPA hi lo ka hi hiam? Keimah Pasian longal a thumaan Pasian le Honpa dang kuamah a om kei hi; kuamah om lo hi, keimah ka hi hi.

²²"No leimongte a omte khempeuh aw, keimah longal Pasian dang om lo ahi manin kei lamah kihei-in kihonkhia un.

²³Kei mahmahin keimah ka kiciam khina, a kidokkik nawn lo ding kammal khat cihtakna tawh ka kamin ka genkhia khin hi: Keima mai-ah khuk khempeuh khukdin dinga, kei tungah lei peuhmah a kiciam ding uh hi.

²⁴Amaute in, ‘TOPA sung bekah thumaanna le thahatna om hi’ hong ci ding uh hi," a ci hi. Ama langa a heh khempeuh ama kiangah pai ding uh a, a kimaizumsak ding hi. Isa 41:11

²⁵Ahi hangin TOPA sunga om Israel suante khempeuh lakah thumaan kimu dinga a ki-angtangsak ding hi.