Read Zokam Isaiah 46 Bible Online

Isaiah 46 - Zokam bible

Isaiah 46

¹Bel kunsuk a, Nebo a kulsuk hi; amau milimte vangik a[102] pua ganhingte in a pua hi. A kipua milimte vangik mahmah a, a gimte’ vangik a suak hi.

²Amaute kulsukin kunsuk uh a amau le amau kivanzangsak thei loin galmat a suak dingin a paikhia uh hi.

³"No Jacob innkuante, hong kipaii a kipan kong don a, na suahua kipan kong puak no a omlai Israel innkuante khempeuh aw, ka thu ngai un.

⁴Tekin na sam kan dong nangawn keimah in amah ka hi a, nang hong pom dingpa ka hi hi. Nang kong bawl khina kong pua ding hi; hong pomin kong hu ding hi.

⁵"Nang in kei kua tawh hong tehin ahikeh a kikimin hong seh na hi hiam? Nong tehkak theih dingin kua tawh a kibangin hong seh na hi hiam?

⁶Pawlkhatte in ipte sung pan kham sungkhia-in a tehna ah ngun teh uh a, kham seekpa cialin pasianin bawlsak uh a, a mai-ah kunin a bia uh hi.

⁷A liangko-uah kisuanto-in pua uh hi; a omna munah koih uh a tua lai-ah a kitung hi. Tua mun panin a tangkhia thei kei hi. Khatpeuh in a sap hangin tua in dawng lo a; a haksatna panin a hon thei kei hi.

⁸"No a lehdote aw hih thu ciamteh un, na lungsimuah belhsak unla na lungtanguah giaksak un.

⁹Sawtpek lai-a a piangsa nate phawk un; keimah Pasian ka hi a, adang a om kei hi; keimah Pasian ka hi a, kei tawh kibang khat beek a om kei hi.

¹⁰A kipat cil pan a tawpna dong ka gen khola, tanglai huna kipan hong tung lai dingte ka genkhol hi. Keimah in: Ka ngimna kip dinga, ka lungkimna khempeuh ka sem ding hi, ka ci hi.

¹¹Nisuahna panin sasial ne vasa khat ka sam a, a gamlapi panin ka ngimna a tangtungsak ding mi khat ka sam hi. Ka gen khitsa ka piangkhiasak dinga; ka ngimsa ka sem ding hi.

¹²No lungsim khauhte thumaanna tawh kigamlate aw, ka thugen ngai un.

¹³Ka thumaanna note kiang nai-ah kong puak hi, gamlapi-ah a om kei hi; ka hotkhiatna a ziakai nawn kei ding hi. Hotkhiatna Zion tungah, ka thupina Israel tungah ka pia ding hi.