Read Zokam Isaiah 48 Bible Online

Isaiah 48 - Zokam bible

Isaiah 48

¹No Jacob inkuan, Israel mina kilo, Judah suan pana piangte - TOPA minin tomlo a, Israel Pasian min lo napi thumaan thutaka ding lote -

²no le no khuapi siangtho tualsuak ka hi uh hi, a kici Ama min Thahatpen TOPA ahi Israel Pasian tunga kingate aw, hih thu ngai un:

³A masa nate sawt pekin kong gen khin a, ka kamin hong zasakin tuate kong theisak khin hi; tua ciangin ka gamtang pah a, tuate hong tung hi.

⁴Ahang in, note na lungkhauh lam uh, na ngawng thagui uh sik ahilam, na taltang uh sumngo ahilam ka thei hi.

⁵Tua ahi manin hih nate sawtveipi in kong gen khin zo hi; note in, ‘Ka milimte uh sep ahi hi; ka sing milimte uh le a kisung ka pasiante un thu a piak ahi hi,’ na cih theih loh nadingun tuate a pian ma-in no tungah kong zasak khol khin hi.

⁶Hih nate na za khin uh hi; a vekin en dih un. Sang nai lo ding na hi uh hiam? "Tu-a kipan mailam hun ah a thak nate, na theih loh uh a kisel nate kong gen ding hi.

⁷Tu-in amaute kipiangsak khina, a sawtvei nai kei hi; tuni ma-in tuate na za nai kei uh hi. Tua ahi ciangin, ‘Hi mah ei, ka theihsate hi ei,’ na ci thei kei ding uh hi.

⁸Na za ngei nai kei uh a zong na theitel ngei nai kei uh hi; khanglui hun lai-in na bil uh a kihong kei hi. Mi muantak na hi lo lam uh kong thei a; na suah tungua kipan lehdote hong kici hi.

⁹Ka min ka khualna-in ka thangpaihna diah in; kei hong kipahtawina ka khualna-in note kong thahmang loh nadingin note panin ka ki-ip hi.

¹⁰En in, ngun siansak na bang zo kei uh zongun note kong siangsak hi; gimna pummei-in note kong zia-et hi.

¹¹Keimah ka kikhualna, keimah ka kicihna-in hih ka sem hi. Kei le kei kiminsiasak buang ding ka hi hiam? Ka minthanna midang tungah ka pia kei ding hi.

¹²"Jacob aw, ka thu ngai in, kong sapsa Israel aw: Amah keimah ka hi hi, ka cihpa a masapen le a tawpnapen ka hi hi.

¹³Ka khutin leitung bulpite ka phut a, ka khut taklamin vante ka zal hi; amaute ka sapkhawm ciangin a vekun a dingkip khawm uh hi.

¹⁴"Note khempeuh hong kikhawm unla ngai un: Hih nate milimte a koi pen in hong genkhol ahi hiam? TOPA koppih mipa in Babylon tungah ama sawmna semkhia dinga, a khutin Babylon mite a[104] a langpan ding hi.

¹⁵Keimah, kei tektekin ka gen khin hi; hi hi, amah ka sam khin hi; keimah in ka paipih a, a nasepna a zo ding hi.

¹⁶Ka kiang hong naih unla hih thu ngai dih un: "Ka zaksak masa pena kipan a simthamin ka gen kei hi; tua hun mah in pianga, tualai ah kei ka om hi." Tua hi a tu-in Thupipen TOPA in ama Kha tawh kei hong sawl hi.

¹⁷Hih in TOPA gen ahi hi - nangma Tanpa Israel Siangtho Pa in: "Kei mah TOPA na Pasian - nang ading a hoihpen hong hilhpa, na pai nading lampi hong lakpa ka hi hi.

¹⁸Ka thupiakte na thusim nak leh na lungmuanna gunpi bang dinga na thumaanna tuipihual a bang ding hi.

¹⁹Na suan na khakte sehnel bang dinga na tate sim zawh loh sehnel tang zah a pha ding hi; keima mai-ah amaute min kiphiat loin zong a kisusia kei ding hi," a ci hi.

²⁰Babylon paisan un, Babylon mite taisan un! Lungdamna tawh kiko-in, leimongte dongin puak unla, "TOPA in a nasempa Jacob tankhia khin hi," ci-in tangko un.

²¹Amah in sehnel-gam kantanin a mite a paipih ciangin, a dangtak kei uh hi; amah in amaute adingin suangpi panin tuiluang bawl a; amah in suangpi khangkhamsak a, tui a phulkhia hi.

²²"Migilote adingin lungnopna a om kei hi," TOPA in a ci hi.