Read Zokam Isaiah 49 Bible Online

Isaiah 49 - Zokam bible

Isaiah 49

¹No tuikulhte aw, ka thugen ngai un; a gamla-a om minamte aw, hih thu za un: Ka suah ma-in TOPA in kei hong sam khin hi; ka suaha kipan ka min a lawhsa ahi hi.

²Amah in ka kam, namsau tathiamsa bangsak a, a khut liim nuai-ah kei hong liah hi; thaltang nawt ngilsa hong suaksak a, a thaltang bawm sungah hong sel khinkhian hi.

³Kei kiangah, "Nang, ka thupina kilat nading ka nasempa Israel na hi hi," hong ci hi.

⁴Ahi hangin kei in, "A thu om lopi-in na ka sem hi; ka thahatna kimanna nei loin ka zang a, bangmah ka lawhtaak kei hi. A tuacipi mah TOPA khut muangin ka sema, ka pahtakman Pasian kiangah om hi," ka ci hi.

⁵Tua hi-a tu-in TOPA - naubu sungah ama nasem dingin hong bawl a, Jacob ama kiang tunpihin amahmah in Israel a kaikhawmpa, TOPA mitmuhin kei hong kipahtawi nading le ka thahatna ka Pasian ahi nadingin,

⁶amah in: "Jacob behte ciahpih kik ding le ka kepsa Israel-te puak kik ding a sempa na hina nang adingin neu lua hi. Ka hotkhiatna leimongte dongin na puak theih nadingin Gentile-te adingin zong khuavak kong suaksak ding hi," hong ci hi.

⁷TOPA gen hih ahi hi - Israel-te Tanpa le Siangtho Pa - a minamin simmawh a, a kih uh gam-ukte’ nasempa tungah: "A muanhuaipa TOPA - nang hong teelpa Israel-te Siangtho Pa hangin kumpite in nang hong muh uh ciangin dingto ding uh a, kumpi tapate in nang hong muh uh ciangin a kunsuk ding uh hi," hong ci hi.

⁸TOPA gen hih ahi hi: "Kong angvan hunin kong dawng dinga, hotkhiatna ni-in nang kong huh ding hi; Keimah in note hong kemin mite adingin thukhun kong suaksak dinga, leitang hong puahphasakin kuama tenlohna mun kong luahsak dinga,

⁹thongkiate tungah, ‘Hong paikhia un’ ci-in khuamial sunga omte tungah, ‘Suakta un,’ ka cisak ding hi. "Amaute in lampi gei-ah an ne in mualneu tunga pawnlak khempeuh ah lonona a mu ding uh hi.

¹⁰Amaute gilkial lo dangtak loin sehnel-gam nisa in a kang kha kei ding hi. Amaute a khuatuahpa in makaih dinga, ciktuite gei-ah a pi ding hi.

¹¹Ka mualliante khempeuh lampi ka suaksak dinga, ka lam lianpite ka sangsak ding hi.

¹²En un, amaute gamlapi panin- pawlkhatte leilu-lam pan, pawlkhatte nitumna-lam pan, pawlkhatte Aswan a[105] kual pek pan hong pai ding uh hi," a ci hi.

¹³Vante aw, lungdamin awng un, leitung aw, nuam in; mualliante aw, la sa-in awngkhia un! Ahang in, TOPA in a mite hehnem ta in, gim thuak mite khuatuah ta ding hi.

¹⁴Ahi hangin Zion in, "TOPA in kei hong nusia khin a, Topa in kei hong mangngilh khin hi," a ci hi.

¹⁵Nu khat in a anga a tawi naungeek mangngilh thei a, a sunga piang a ta khuatuah lo thei ahi hiam? Amah in a mangngilh kha zongin ken nang kong mangngilh kei ding hi.

¹⁶En in, ka khutpekte ah nang kong gelh kuak zo a; na kulhte ka mai-ah a om den hi.

¹⁷Na tapate hong kihei kik uh a, nang hong siasakte in hong paisan ta uh hi.

¹⁸Dakto inla na kimkot en in; na tapate kikhawmin nang hong zuan uh hi. TOPA in cikhia hi, "Ka nuntakna ka lo hi, amaute khempeuh kizepna-in na nei dinga, mothak bangin amaute kizepna-in na nei ding hi.

¹⁹"Nang kisia-in hong kilawi a, na gam gamkhing a suak zongin tu-in na mite adingin nang na neu lua dinga, nang hong nawmvalhte gamlapi ah a om ding uh hi.

²⁰Note dah le kah hun sunga na neih uh na tate un na zakzakun, ‘Hih mun ko adingin neu lua; ka ten nading uh mundang hong piakbeh in’ kici lai ding uh hi.

²¹Tua ciangin na lungsimin, ‘Hihte kua hong neihsak hiam? Kei taselin ka tangkhat a, hong kinolhin sal ka suak hi. Hihte a khansuah kua ahi hiam? Kei guak hong kinusia den a, ahi zongin hihte - amaute koi pan hong pai uh ahi hiam?’ na ci ding uh hi," a ci hi.

²²Thupipen TOPA gen hih ahi hi: "En un, Gentile-te ka khut ka van dinga, mite lamah ka dialkhai ka laamto ding hi; amaute in na tapate tawi-in na tanute liangko mualsuanin hong puak ding uh hi.

²³Kumpite, nang hong don na pate suak ding uh a, amaute zite nang hong cing na nute a suak ding uh hi. A maitangun lei si-in na mai-ah kun ding uh a; na khe-a leivuite a liak ding uh hi. Tua ciangin keimah TOPA ka hilam na thei ding uh hi. Kei sungah lametna a neite a zahlak kei ding hi," a ci hi.

²⁴Galhangpa tung panin kua in sutkhia thei dinga, a lungngolpa a[106] tung panin kua in galmatte hukhia zo ding ahi hiam?

²⁵Ahi hangin TOPA gen hih ahi hi: "Galhangpa tung panin galmatte kilakhia dinga, a lungngolpa tung panin kisutkhia taktak ding hi; nang hong langbawlte ka langbawl dinga, na tate ka honkhia ding hi.

²⁶Nang hong nengniamte amaute sa amau mah ka nesak dinga, amau sisan zukham bangin ka khamsak ding hi. Tua ciangin mihing peuhmah in keimah, TOPA, note Honpa, note Tanpa, Jacob Thahat Pa ka hilam hong thei ding uh hi," a ci hi.