Read Zokam Isaiah 50 Bible Online

Isaiah 50 - Zokam bible

Isaiah 50

¹TOPA gen hih ahi hi: "Na nu ka sawlkhiatna kimakna lai koi-ah om ahi hiam? Ahikeh ka leibatna kua tungah hong zuak ka hi hiam? Na mawhnate uh hangin nang hong kizuak ahi hi. Na khialhnate uh hangin na nu uh a kiciahsak ahi hi.

²Kong pai ciangin bang hangin mi khat beek om lo ahi hiam? Kong sap ciangin bang hangin hong dawng khat beek om lo ahi hiam? Nang hong tan zo lo dingin ka ban tom lua ahi hiam? Nang hong hu zo lo dingin thahatna nei lo ka hi hiam? Khatvei tai ziau leng tuipi ka keusak a, gunte sehnel-gam suakin; tui om loh manin a sunga ngasate dangtakin si uh a, a uih uh hi.

³Vantung, khuamial ka silhsak a, a khuh nadingin ippi puan ka bawl hi," a ci hi.

⁴Thupipen TOPA in a gimte thamalhsak nadingin a kihilhsa leii hong guan hi. Zingsang simin kei hong phong a, a kihilhsa bangin thungai dingin ka bil a phong hi.

⁵Thupipen TOPA in ka bil hong honsak a, amah lehdo nawn loin; ka nungngatsan nawn kei hi.

⁶Kei hong satte ka nung ka dawh a; ka khamul a hong mante ka paang ka dawh hi; hong simmawhte le hong cilphihte ka lehngatsan kei hi.

⁷Thupipen TOPA in kei hong huh ahi manin hong kimaizumsak kei ding hi. Tua ahi ciangin meisah suang bangin ka mai ka ngat a, kei hong maizumsak loh ding ka thei hi.

⁸Kei dik hong tangsakpa ka kiangah om hi. Kua in kei hong siattut ding ahi hiam? Khat le khat kimaituah nung! Hong mawhsak kua ahi hiam? Amah hong maituah sak un.

⁹Kei hong huhpa Thupipen TOPA ahi hi. Kei hong mawhpaih ding kua ahi hiam? Amaute khempeuh puansilh bangin patkhia dinga; nget in a netum ding hi.

¹⁰TOPA kihta-a a nasempa thumang no lakah kua ahi hiam? Khuamial sunga lam pai, khuavak nei lo mi in TOPA min muang henla, ama Pasian tungah kinga hen.

¹¹Ahi zongin tu-in, nomau mei vakin nomau meikuang a kidette aw, nomau tawhkuangsa mei - nomau meitang mahah pai-in kalsuan un. Ka khut pana na ngah ding uh hih ahi hi: Gawtna thuakin na lumsuk ding uh hi.