Read Zokam Isaiah 52 Bible Online

Isaiah 52 - Zokam bible

Isaiah 52

¹Khanglo in, khanglo in, Zion aw, thahatna puanin silh in. Khuapi siangtho Jerusalem aw, na thupina puan silh in. Na sungah vunat lohte le a kihhuaite lut kik lo ding uh hi.

²Na leivuite singkhia in; Jerusalem aw, tho inla kumpi tokhom ah tu in. Saltang Zion Tanu aw, na ngawnga khainiangte panin kisuahtak in.

³Ahang in, TOPA in: "Note bangmah loin hong kizuaka, sum loin hong kitankhia ding hi," a ci hi.

⁴Ahang in, Thupipen TOPA gen hih ahi hi: "A masa in ka mite a nungta dingin Egypt ah paisuk uh hi; a nunung lamah Assyria in amaute a nengniam hi.

⁵"Tu-in hih lai-ah bang nei ka hi hiam?" TOPA in cikhia hi. "Ka mite bangmah loin ka paipihmang a, amaute a ukte in simmawh uh hi," b[108] TOPA in cikhia hi. "Ni thapai-in ka min kigendai den hi.

⁶Tua ahi ciangin ka mite in ka min a thei ding uh hi; tua ahi ciangin a genkholpa kei ka hilam amaute in a thei ding uh hi. Hihi, tua in keimah ka hi hi," a ci hi.

⁷Mual liante tunga thupha a puakte, lemna a va tangkote, thuthak hoih a va puakte, hotkhiatna va tangko a, Zion tungah, "Na Pasian kumpi in mang hi," a va cite khe melhoih na lawmlawm e!

⁸Ngai un! Na galvilte un a aw uh sangsakin; lungnopna aw a tangko khawm uh hi. Zion ah TOPA a ciah kik ciangin amau mit mahmah un tua a mu ding uh hi.

⁹TOPA in mite hehnem khin a, Jerusalem tankhia khin ahi manin, nang a kisiasa Jerusalem aw, lungnopna late sakhia khawm un.

¹⁰TOPA in minamte khempeuh muhin a khut siangtho zankhia dinga, leimongte khempeuh in eite Pasian hotkhiatna a mu ding uh hi.

¹¹Kihem un, kihem un , tua lai panin paikhia un! A sianglo na lawng kei un! No TOPA’ beel le kuang puate aw, tua panin paikhia unla kisiangthosak un.

¹²Ahi hangin note mai-ah TOPA pai-in Israel-te Pasian note nung dal ahi manin note nawhsa-in na dingkhia kei ding uh a, lauthawng sa-in na pai kei ding uh hi.

¹³En un, ka nasempa in pilvang takin a[109] a sem ding hi; amah kisangsakin kilaamto dinga sangtakin a kitawisang ding hi.

¹⁴Ama b[110] hangin mi tampi a lauthawng bang tektekin - mi zong sun nawn loin amel kisiagawp a, mihing zong bang loin a pianzia a kisiazaw lai hi -

¹⁵tua ahi ciangin minam tampite c[111] siangsak dinga ama hangin kumpite pau loin a om ding uh hi. Ahang in, amaute in a kigenkhol lo nate mu ding uh a, a zak kholh loh uh thute a tel ding uh hi.