Read Zokam Isaiah 54 Bible Online

Isaiah 54 - Zokam bible

Isaiah 54

¹"Tasel numei, ta a nei ngei lo nu aw, la sa in; nau suah nat a thuak ngei lo nu aw, la sakhia-in lungdamin awng in. Bang hang hiam cih leh pasal nei numei’ tate sangin a kinusia numei tate a tamzaw hi," TOPA in a ci hi.

²"Na puanbuk mun khan in, na puanbuk zapi in zal inla khiam kik nawn kei in; na khaute sausak inla, na khetphimte kipsak in.

³Ahang in, veilam le taklam ah na kiphalh dinga; nangma suante in minamte suankhia in, a kilawi khuapite ah a teng ding uh hi.

⁴"Kihta kei un; na maizum kei ding uh hi. Na zahlak khak ding uh lau kei un; hong kimaizumsak lo ding hi. Na khangmoi lai-a na maizumna na mangngilh dinga, na meigon lai-a mawhsaknate na phawk kha nawn kei ding hi.

⁵Ahang in, nang hong Bawlpa na pasal hi a - ama min Thahatpen TOPA ahi hi - Israel-te Siangtho Pa nang hong Tanpa hi a; amah leitung khempeuh’ Pasian kici hi.

⁶A kimasa zi, a lungsim a dong ngeungau bang - a kima lel dinga khangmoi lai pi-a kitenpih zi bangin, TOPA in nang hong sam kik ding hi," na Pasian in ci hi.

⁷"Tomkha sung nang kong nusia a, ahi hangin hong khuatuah lua-in kong la kik ding hi.

⁸Heh lua-in tomno sung kong lehngatsan a, ahi hangin tawntung migitna-in nang kong khuatuah ding hi," nang hong Tanpa TOPA in ci hi.

⁹"Hih in kei adingin, Noah tuite in leitung a tuam nawn kei ding hi, ci a ka kiciam Noah hun lai a bang ding hi. Tua bangin tu-in nang tungah a heh lo dingin ka kiciam khina, nang kong tai kik nawn kei ding hi.

¹⁰Mualliante kilokin mualneute kikhin taleh, nang kong itna kip kiling lo dinga, ka lemna thukhun zong a kikhin kei ding hi," nang hong khuatuah TOPA in ci hi.

¹¹"Huihpite in nawkgawpa a kihehnem lo khuapi aw, turquoise a[120] suangin kong lam dinga na bulpi sapphire b[121] in ka lam ding hi.

¹²Na kulh dawnvang Ruby ka hisak dinga na kongpite a tee daldal Jewel hisakin na kulh khempeuh suang manpha ka hisak ding hi.

¹³Na tapate khempeuh TOPA in hilh dinga, na tate lungnopna lian mahmah ding hi.

¹⁴Thumaanna-in nang hong kikipsak dinga, ukcipna tawh na kigamla ding hi; bangmah na kihta kei ding hi. Gamlapi ah launa kikhinkhia dinga, nang kiang hong tung kei ding hi.

¹⁵Khatpeuh in nang hong sim leh, kei sep ahi kei ding hi; nang hong sim peuhpeuh nang tungah hong kipumpiak ding uh hi.

¹⁶"En in, meihol zaapkuang a, a kizat nading muna hiam a suah sikseekpa keima piansak ahi hi. A siasak dingin a susiapa a piangsak keimah ka hi hi;

¹⁷Nang do nadingin hiam a seek peuhmah mavang lo dinga, nang hong mawhsak leii peuhmah na zothal ding hi. Hih in TOPA nasemte luah hi dinga, hih in kei pana amau luah thumaanna hi ding hi," TOPA in cikhia hi.