Read Zokam Isaiah 57 Bible Online

Isaiah 57 - Zokam bible

Isaiah 57

¹Thumaante mangthang napi, a lungsima ngaihsun kuamah a om kei hi; a thutak mite kilamang napi, siatna panin a kihemkhia ahilam kuamah in a tel kei hi.

²Thutanga kalsuante lemna ah lut uh a; a sih uh ciangin khawlna a mu uh hi.

³"Ahi hangin no numei aisante’ tapate angkawm le kizuakte suan le khakte aw, hih lai-ah hong pai un!

⁴Kua ciamnuih na hi uh hiam? Kua zahnuihsanin kamka in kua leiiphensan na hi uh hiam? Note a lehdote’ tate, zuauphuakte’ suan le khakte hi lo na hi uh hiam?

⁵Tehno kungte lak le singhiang nuai tengah numei pasal kilunggulhna-in na kangtum uh a; kuam thukpi sung le suanghawm sungah na tate uh kithoihna-in na nei uh hi.

⁶Kuam sunga suangmaite note tanh milimte ahi hi; amaute diakdiak no aituam ahi hi. Hihi, tuate tungah dawntheih biakna na sung in, an-a biakna na pia uh hi. Hih nate hangin ka lungsim khiam tuan ding ka hi hiam?

⁷Munsangna le mual sangpi ah na lupna na bawl a; tua lai-a paito in kithoihna na pia hi.

⁸Kongkhakte le kongkhak mungte liah ah na dawibiakna limte na koih hi. Kei hong nusia-in na lupna na hawkkhia a, a tungah kahto in zapi-in na hong hi; a lupna na itte tawh thukimna na bawl a, amaute guaktang hihna na mitsuan hi.

⁹Olive thau kengin Molech a[122] ah na pai a, na paknamtuite na kinuh phapha hi. Na tangmite b[123] gamlapi ah na sawl a, hankhuk c[124] dongah na tuaksuk hi!

¹⁰Na paina lampi teng hangin na gima, ahi hangin, ‘Lametna bei ta hi’ na ci kei hi. Na hatna uh na thaksak kik uh a, tuaci-in na bah kei uh hi.

¹¹"Kei tunga na khialh nading, nong mangngilh nading le na lungsim nangawna nong ngaihsut lohna zah dong dingin lau a na kihtak kua ahi hiam? Daitaka sawtveipi ka om manin kei hong kihta lo hilo na hi hiam?

¹²Na thumaanna le na nasepnate kipholaak dinga, na phattuampih kei ding hi.

¹³Huhna ngenin na kiko ciangin na kaihkhop milimte kihonsak ve! Tuate khempeuh huih in len khiamang dinga husan bek in tuate a mutmang ding hi. Ahi hangin kei hong beel mi-in leitang luah dinga ka mual siangtho a nei ding hi.

¹⁴"Zik un, zik un, lampi sial un! Ka mite’ lampi a khakte hemkhia un," kici ding hi.

¹⁵Ahang in, a sang, a sangpen Pa - a nungta tawntung ama min siangthopa gen hih ahi hi: "A sangna le a sianthona munah ka tenga, ahi hangin lungsim niamte le lunggimte a lungkhauhsak dingin a lungsim niamte le a lunggimte tawh ka tengkhawm hi.

¹⁶Mihing huu ka piansaksa hi a - ka mai-ah mihing lungsim gim ding ahi manin ka mawhsak suak kei dinga, ka heh tawntung kei ding hi.

¹⁷Ama huaiham mawhna hangin ka heh lua-a; amah dan thuaksakin hehin ka lehngatsan hangin, ama nopsak bangin a gamta veve hi.

¹⁸Ama lampi ka muh khit hangin amah ka damsak ding hi; amah lam ka hilh dinga hehnem in,

¹⁹a thum Israel-te muk panin phatna ka piangsak ding hi. Lemna, a nai a gamla-a omte tungah lemna," TOPA in ci a, "Amaute ka damsak ding hi," a ci hi.

²⁰Ahi hangin migilote, khawl hun nei lo, tuipi kilok tuihual in nin le buan a laptoh tawh kibang uh hi.

²¹"Migilote adingin lungnopna a om kei hi," ka Pasian in a ci hi.