Read Zokam Isaiah 58 Bible Online

Isaiah 58 - Zokam bible

Isaiah 58

¹Na aw neih zah sit loin awng in. Pengkul bangin na aw ngaihsak in. Ka mite tungah amaute lehdona le Jacob innkuante tungah a mawhna uh genkhia in.

²Amaute amaana gamta minam le Pasian thupiak a mangngilh lo bang kekin ni khat khit ni khat kei hong zongin ka lampi a thei nuam bangin a om uh hi. Amaute in thutanga thukhensatna hong ngen uh a, Pasian a kiangua pai ding a lawp tawh kibang uh hi.

³Amaute in, ‘Bang hangin nang muh lohin an tang ka hi uh hiam? Nang theih lohin bang hangin kote kiniamkhiat ka hi uh hiam?’ ci uh hi. "Tua hi napi na antan ni-un no nopsak bangin na na sem uh a, na nasemte khempeuh uh na nuaisiah uh hi.

⁴Na antanna uh kitotna le kilaina-in bei a, khat le khat khuttuma kitupna-in na zang uh hi. Tuni-a bangin an na tang uh a, a sangna-ah na aw uh hong kizak ding na lamen kei uh hi.

⁵Kei teel antanna in mi khat amah le amah ni khat sung kiniamkhiat lel ding ahi hiam? Pumpeng bangin a lu kun a ippi puan silhin vut laka lup lel kei deih antan nam ahi hiam? TOPA san theih ding ni khat sung antan na cih uh tua ahi hiam?

⁶"Kei teel antan hih bang nam ahi hi: A thutang lo khainiangte kolsak nading le hakkol khaute phel nading, a kinengniamte khah nading le hakkol peuhmah suktan nading hi lo ahi hiam?

⁷Gilkial mite an vaka mizawng kawivakte omna guana guaktanga omte na muh uh ciangin puan guana, note si le sa taktak ahi mite na kiheisan lohna uh hi lo ahi hiam?

⁸Tua ciangin na khuavak uh phalvak bangin suakkhia dinga, na damsakna uh kilangkhia pah ding hi; tua ciangin na thumaanna a[125] uh na mai-uah pai dinga, TOPA minthanna in note nungah hong dal ding hi.

⁹Tua ciangin TOPA na sam ding uh a amah’n hong dawng ding hi; huhna na ngen ding uh a, amah in: Hiah ka om hi, hong ci ding hi. "A kinengniamte hakkol paih mangsak in, khutme in mi kawk lo a, mi nat nading kampau loin

¹⁰gilkialte tangin nangmah kizang a, a kinengniamte gil na vahsak leh tua ciangin khuamial lakah na khuavak tangin note zan hun sun tawh a kibang ding hi.

¹¹TOPA in hong makaih tawntung ding hi; keugawgam ah na kisapna hong kicingsak dinga, na guh na tang a khauhsak ding hi. Kicingtaka tui a ngah huan tawh na kibang dinga, tui a kang ngei lo ciktui na bang ding hi.

¹²Na mite un, tanglai-a kisia khuapite lam kik ding uh a, tangtawnga kisia bulkipte a zomto ding uh hi; Note, Kulh Kicimsa Puahkikte, Ten nadinga Lampi Puahphate, hong kici ding hi.

¹³"Sabbath palsat loh nadingin na khe na kep a, ka ni siangtho ni nang nopsak bangin zang lo-a, Sabbath ni a deihhuai ni le a pahtawi huai TOPA ni siangtho hi ci a, nang deih bang zui loin nang nopsak bangin gamta lo a, na mot paupau kei leh

¹⁴tua ciangin TOPA sungah lungnopna na mu dinga, leitung a sangnate ah hong khaangto-in na pa Jacob luahte-in kong vak ding hi," TOPA kam in cikhia khin hi.