Read Zokam Isaiah 6 Bible Online

Isaiah 6 - Zokam bible

Isaiah 6

¹Kumpipa Uzziah a sih kumin a sanga kitawisang kumpi tokhom tungah Topa a tu ka mu-a a puantualpi mong biakinnpi sung khempeuh a dim hi.

²Ama tungsan ah seraph-te om in, kha guk a nei ciat uh hi. Kha nihin a mai uh tuam uh a, nihin a khete uh tuamin nihin a lengleng uh hi.

³Amaute khat le khat kisamin: Siangtho, siangtho, siangtho Thahatpen TOPA; a minthanna leitung buppi kidim hi," a kici uh hi.

⁴Amaute aw hangin biakinnpi kongkhakmungte le khuambulte kilok a a sungah meikhu a dim hi.

⁵Tua ciangin gim ngahpa hi ta’ng ei! A mangthang hi ta’ng ei! Ahang in, kei muk ninpa ka hi-a, muk ninte lakah tengin ka mitin Kumpipa - Thahatpen TOPA ka mu zo hi," ci-in ka kiko hi.

⁶Tua ciangin seraph-te khat biakna-tau a om mei-am khat taiteh-a tepsa-in ka kiangah hong leng hi.

⁷Tua-in ka kam hong bi a, "En in, hih in na muk bi khin hi; na khialhna kilakhia khin a, na mawhna kikhuhcip zo hi," hong ci hi.

⁸Tua ciangin Topa in, "Kua sawl ding ka hi hiam? Eite adingin kua pai ding hiam?" a cihna aw ka za hi. Tuateh, "Hiah ka om hi. Kei hong sawl in!" ka ci hi.

⁹Amah in, "Pai inla hih mite kiangah va gen in: "‘Note in zaza napi theitel ngei loin; mumu napi na mutel ngei kei ding uh hi.

¹⁰Hih mite lungtang saksak inla, a bil uh ngongsak in; amaute mitsisak in. a[12] Tua hi kei leh a mit uh tawh mu-in a bil uh tawh za-a, a lungtang uh tawh theitelin kihei ding uh a, amaute ka damsak kha ding hi,’ hong ci hi.

¹¹Tua ciangin, "Topa aw, bang tan sawt lai ding hiam?" ka ci hi. Tuateh amah in: "Khuapite kisia-in kuamah a ten nawnloh ciang, innte ah kuamah giak loin a kinusiat ciang, le lote tulin gamkhing a suah ciangin,

¹²TOPA in mi peuhmah gamlapi ah a hawlmang ciang, le tua gam a kinusiat ciang hi ding hi.

¹³Tua gamah mi sawm-ah khat a omlai zongin a kisusia kik lai ding hi. Ahi hangin nahhi le tawsaw kungte a kiphuk khitin a bulsum a om niloh bangin tua gamah khaici siangtho bul om niloh ding hi," hong ci hi.