Read Zokam Isaiah 62 Bible Online

Isaiah 62 - Zokam bible

Isaiah 62

¹Zion’ thumaanna phalvak bangin tang a, Jerusalem’ hotkhiatna meisel kuang a bat matengin, Zion ka khualna-in ka dai kei dinga, Jerusalem ka khualna-in ka dai om kei ding hi.

²Minamte in na thumaanna mu ding uh a, kumpi khempeuh in na minthanna a mu ding uh hi. TOPA kam in nang hong phuah ding minthakin nang hong kisam ding hi.

³TOPA khut sungah nang, thupina lukhu na hi dinga na Pasian khut sungah kumpi kilawmna lukhu na hi ding hi.

⁴Amaute in nang, Nusiatsa hong ci nawn loin, na min Gamkhing a ci nawn kei ding uh hi. Ahi hangin, nang tungah TOPA lungkim a, na leitang inlah pasal nei ta ding ahi manin nang Hephzibah b[129] hong kici in, na leitang Beulah c[130] kici ding hi.

⁵Tangvalno khat in nungakno khat a tenpih bangin, na tapate a[131] in nang hong tenpih ding uh a, zineipa a mo tungah a kipah bangin nang tungah na Pasian a kipak ding hi.

⁶Jerusalem aw, na kulhte tungah galvilte ka koih khin a, amaute sun le zanin a gamdai ngei kei ding hi. TOPA a sam note, mawkkhawl tawm kei unla,

⁷Jerusalem a kipsak mateng le tuanu leitung phatna a suahsak matengin amah khawlsak kei un.

⁸A khut taklam le a khut thahatna-in TOPA kiciam khin a: "Na antangte uh na galte uh an dingin ka pia kik ngei nawn kei dinga, note sepsa zu thak gamdang mite in a dawn kik ngei nawn kei ding uh hi;

⁹ahi hangin an late in ne-in TOPA phat ding uh a, lenggah kaikhawmte in ka mun siangtho huang sungah a dawn ding uh hi," a ci hi.

¹⁰Pusuak un, kongpite ah pusuakkhia un! Mite pai nading lampi sial un. Zik un, lam lianpi zik un! Suangte khukkhia un! Minamte adingin dialkhai khaito un.

¹¹TOPA in leimongte dongin tangko khin a: "Zion Tanu tungah gen un, ‘En in, na Honpa hong pai ta! En in, a pahtakman hong kenga, a ditkikna hong tonpih hi,’ ci un," a ci hi.

¹²Amaute, Mi Siangtho, TOPA Tatsate kici dinga, nang, Zonkhiat, nusiat ngei nawn loh Khuapi, hong kici ding hi.