Read Zokam Isaiah 63 Bible Online

Isaiah 63 - Zokam bible

Isaiah 63

¹Edom-a Bozrah pan hong pai a puan kheisan-a kidiahpa kua ahi hiam? Thupina puanin silh a alian mahmah hatna tawh mai nawtpa kua ahi hiam? "A hon zo dinga thahat, thumaan genpa keimah ka hi hi,"

²Bang hangin na puante lenggah cilpa aa bangin san ahi hiam?

³"Keimah kia in lenggah cilna ka cil khin a, minamte kuamah in hong ompih kei hi. Hehsa in amaute ka cilgawp a, ka thangpai-in ka tuancilgawp hi; amaute sisan in ka puante theh a; ka puansilh khempeuh ah ka baangsak hi.

⁴Ka lungsimin phulak ni ka ngaihsun a, kei hong kitatkhiatna kum lah a tungta hi.

⁵Ka khuadak hangin hong huh ding khat beek om lo a, hong panpih ding khat beek om loin hong linglawngsak hi; tua ciangin ka hotkhiatna nasep ka khut in sem a, ka thangpaihna in keimah hong kipsak hi.

⁶Hehsa-in minamte ka tuancilgawp a; thangpaihna tawh ka amsakgawp a, tua ciangin a sisan uh lei lakah ka buakhia hi.

⁷Eite adingin TOPA in a sepnasa tawh kizui-in ama migitna le a sepnasa hangin phathuai hi - hihi, Israel innkuante adingin na hoih tampi a bawlnasate, ama khuatuahna le a migitna tampi tawh kizui-in TOPA migitna ka gen ding hi.

⁸Amah in, "Amaute, ka mite hi takpi a, kei tunga hong khial lo ding tapate ahi uh hi," a ci hi; tua ahi ciangin amaute Honpa a suak hi.

⁹Amaute lungdonna khempeuh lungdonpih a, ama ompihna vansawltak in amaute a hon hi. Ama itna le a lainatna hangin amaute tankhia a; amaute laamtoin tanglai nite khempeuh ah a tonpih den hi.

¹⁰Tua hi napi amaute in lehdo uh a, ama Khasiangtho a dahsak uh hi. Tua ciangin amah kihei-in amaute gal suak a, amah mah in amaute a do hi.

¹¹Tua ciangin ama mite in tanglai nite, Moses le a mite hun a phawk b[132] kik uh hi - amaute le a tuute uh, tuucingpa tawh tuipi kantana a paipihpa koi-ah om ta ahi hiam? Amaute lakah Khasiangtho a omsakpa;

¹²Moses khut taklam-a om dingin a minthang a khut vangliatna a sawlpa, amaute mai-ah tui kikhensak a, amah a kitheih den nading a ngahpa,

¹³tuithukte kantana a makaihpa, koi-ah om ahi hiam? Gamlaka sakol bangin amaute a muktu kei uh hi;

¹⁴Zanglei zuansuk bawnghon bangin TOPA Kha in amaute tawldamsak hi. Nangma min na thansak nadingin hih bang zia-in na mite na makaih hi.

¹⁵Vantung panin hong ensuk inla, a siangtho a minthang sangpi-a om na tokhom panin hong mu in. Na deihluatna le na liatna koi-ah om ahi hiam? Na lungnemna le na khuatuahna kote tung panin kidokkik ta ahi hiam?

¹⁶Ahi hangin nang kote Pa na hi a, Abraham in kote hong thei loin, Israel in kote hong phawk khak loh hangin TOPA aw, nang kote Pa, tang lai-a kipan na min kote Tanpa na hi hi.

¹⁷TOPA aw, nang kong zahtak loh nadingun bang hangin na lampi pan hong pialsak-a, ka lungsim uh khauhsak na hi hiam? Na nasemte, nangma gouluah minamte nong khualna-in hong kihei kik in.

¹⁸Na mite in hun tomno sung nangma munsiangtho nei uh a, ahi hangin tu-in ka galte un na munsiangtho tuancil ta uh hi.

¹⁹Tanglai-a kipan kote nang aa ka hi uh hi; ahi hangin amaute na uk ngei loh, nang min-a a[133] kisam ngei lote ahi uh hi.