Read Zokam Isaiah 64 Bible Online

Isaiah 64 - Zokam bible

Isaiah 64

¹Nangma mai-ah mualliante a kilin nadingin vantungte balkekin hong kumsuk ve!

²Mei in selkang kuangsak a tui a so bangin, hong paisukin na galte tungah na min kitheisak inla na mai-ah minamte lingsak in.

³Ahang in, ka lamet loh uh a mulkimhuai nate na bawl lai-in nong paisuk a, na mai-ah mualliante a kiling hi.

⁴Tanglai-a kipan, amah a ngakte cihna-a na a sepsak nang longal Pasian khat beek kiza lo a, bil in zong za kha loin mit khat beek in a mu ngei kei hi.

⁵Na lampi phawkin lungtaitakin thumaana na a semte na huh hi. Ahi hangin ka mawh ngitnget uh ciangin nang na heh hi. Kote bang ka kici hotkhiat thei ding uh hiam?

⁶Kote khempeuh a siang lo mipa ka bang uh a, thumaana ka sep khempeuh uh puanninte tawh a kibang hi; kote khempeuh nahthel keu ka bang uh a, ka mawhnate un huih bangin kote hong mutleng mang hi.

⁷Kote na maitang nong selsan a, ka mawhna hangun hong patkhiasak na hi manin kuamah in na min hong sam loin pom hong sawm a om kei hi.

⁸Tua hi napi TOPA aw, nang kote Pa na hi lai veve hi. Nang beelseekpa hi-in kote tungman ka hi uh a; na khuta nong bawlsa ka hi uh hi.

⁹TOPA aw, nak heh lua kei inla ka mawhnate uh ciamteh tawntung kei in. Kote khempeuh nangma mi ka hi manun kong thum uh hi, ko lam hong nga in.

¹⁰Na khuapi siangthote sehnel-gam suak ta a; Zion nangawn sehnel-gam suakin Jerusalem gamkhing a suak hi.

¹¹A siangtho a minthang ka biakinnpi uh, ka pate un nang hong phatna mun, mei in kangtum ta a, ka gou koih khempeuh uh kisia ta hi.

¹²TOPA aw, hihte khempeuh nungin nang ki-ip lailai ding na hi hiam? Nang dai khikhe-in dan hong thuaksaksak lai ding na hi hiam?