Read Zokam Isaiah 7 Bible Online

Isaiah 7 - Zokam bible

Isaiah 7

¹Uzziah tapa Jotham, Jotham tapa Ahaz, Judah kumpi ahi laitakin Aram Kumpipa Rezin le Israel kumpipa Remaliah tapa Pekah, Jerusalem sim dingin kuanto uh a, ahi hangin a zo kei uh hi.

²Tu-in David innkuante tungah, "Aram in Ephraim koppih b[13] ta hi," ci-a a kigen ciangin Ahaz le a mite lungsim, tulaka singkungte huih in a linsak bangin kiling hi.

³Tua khit ciangin TOPA in Isaiah tungah, "Puansawppa Lo lampi-a Bual Tungnung tuilakna nak monga om Ahaz tawh kimu dingin na tapa Shear Jashub c[14] tawh paikhia un.

⁴Ama kiangah, "Kidawm in, daitakin om inla lau kei in. Ansing tumbaang khu tawh a kibang hih nihte - Remaliah tapa Aram le Rezin-te hehna hangin lungneu kei in.

⁵Aram, Ephraim le Remaliah tapa-te in siatsak hong sawmin,

⁶Judah va sim ni, va khenkek in, eite in hawmni, amaute Tabeel tapa uksak ni," a ci uh hi.

⁷Tua hi napi Thupipen TOPA in hici gen hi: "‘Tua thu picing lo ding hi, a piang kei ding hi;

⁸ahang in, Aram lutang Damascus hi a, Damascus lutang Rezin hi lel hi. Kum sawmguk le nga sungin mi a suak zo lo zahin Ephraim kitamzan ding hi.

⁹Ephraim lutang Samaria hi a, Samaria lutang Remaliah tapa hi lel hi. Na upna ah na dinkip kei leh na dingsuak zo kei ding hi,’ ci in," a ci hi.

¹⁰"TOPA in Ahaz hopih kik a,

¹¹"TOPA na Pasian tungah nuailam a thukpenna mun ahi a, tunglam a sangpenna mun ah ahi zongin lim khat ngen in," a ci hi.

¹²Ahi hangin Ahaz in, "Ka ngen kei ding hi; TOPA ka zia-et kei ding hi," a ci hi.

¹³Tuateh Isaiah in, "No David innkuante aw, za un! Mihingte lungduaina na zia-et uh kicing sa nai lo na hi uh hiam? Ka Pasian lungduaina zong zia-et lai ding na hi uh hiam?

¹⁴Tua ahi ciangin Topa mahmah in lim khat nang a[15] hong pia ding hi. Tua nungak bit gai-in tapa khat nei dinga ama b[16] min Immanuel c[17] kici ding hi.

¹⁵Amah in khialhna nialin thumaan a tel theih hun ciangin bawngnawi khal le khuaizu bek a ne ding hi.

¹⁶Ahi hangin naupang in khialhna nial ding le thumaan teel ding a theih mateng na kihtak uh kumpi nihte gam kinusiacip ding hi.

¹⁷Judah panin Ephraim a kitap khiat huna kipan a om ngei hun khat beek tawh kibang lo-in nang tung le na mite’ tung le na innkuante’ tungah TOPA in Assyria kumpipa hong tungsak ding hi," a ci hi.

¹⁸Tua ni ciangin TOPA in gamlapi Egypt luite a om tho-te le Assyria gama om khuaipite sapna phit a mut ding hi.

¹⁹Amaute khempeuh hong pai-in kenhawmte le suangpiheng kawm lingkung lak khempeuh le luinak vang khempeuhah a lal ding uh hi.

²⁰Tua ni ciangin Topa in, Gun d[18] gal pana kikawm sammet tem - Assyria kumpipa zangin na lu metin na khemulte met dinga, na khamulte zong a botkhia ding hi.

²¹Tua ni ciangin mi khat in bawngla khat le keel nih a khawi ding hi.

²²Tuate in nawi tampitak pia ding ahi manin nawikhal a ne zo ding hi. Gam sunga omlaite khempeuh in zong nawikhal le khuaizu a ne ding uh hi.

²³Tua ni ciangin nguntang shekel e[19] tul khat a man lenggui tul khat omna munte ah lingkung le thangling kung bek a om ding hi.

²⁴Gamsung teng lingkung le thangling kung in tuam ding ahi manin tua lai-ah pasalte thal le thaltang bek tawh a pai ding uh hi.

²⁵Khatvei lai-a tupi tawh a kikhawhnasa mualneute khempeuh ah ling le thangling kihta-in na pai nawn kei ding hi; tua munte bawng khahna le tuute gamtatna mun a suak ding hi.