Read Zokam Isaiah 9 Bible Online

Isaiah 9 - Zokam bible

Isaiah 9

¹Ahi ta zongin lungdonna sunga a ommite adingin lungkiat nading a om kei hi. A beisa hunin amah in Zebulun gam le Naphtali gam, a niamkhiat hangin mailam hunah Jordan dunga om tuipi zuatna lampi gei-a Gentile-te tenna Galilee ah a pahtawi ding hi-

²Khuamial sunga lampai mite in, khuavak lianpi a mu zo uh hi; sihna a[26] liim guam sunga teng mite tungah khuavak tang khin ta hi.

³Tua minam na khangsaka, a lungdamna uh na khangsak hi; anlak cianga mite a lungdam bang le van kisutte a kihawm cianga a lungdam bangin na mai-ah mite a lungdam uh hi.

⁴Bang hang hiam cih leh Midian-te a kizawh ni-a bangin nangmah in amaute vangik puakna hakkol le a liangko-ua kikham singzawl, amaute a kinetniamna ciangkhut na nuaizansak hi.

⁵Galkap hangte in gal sunga a zat uh khedapte le sisan a bang niaunuau puansilh khempeuh hal dingin kikoih dinga, mei in a kicih ding hi.

⁶Ahang in, eite tungah naungek khat hong suaka, tapa khat hong kipia hi; a liangko tungah ukna a tuang ding hi. Tua hi-a, amah Lamdang Thulakpa, b[27] Thahat Pasian, Tawntung Pa, Lemna Kumpi, kici ding hi.

⁷Ama ukna le kilemna khangin bei hun a nei kei ding hi. Amah in David tokhom luah dinga, tua huna kipan a tawntungin thumaan le thutang tawh a gam phutin a lenkip ding hi. Thahatpen TOPA deihluatna in hih thu a tangcingsak ding hi.

⁸Topa in Jacob langah thukhat puak a, tua thu Israel tungah a tu ding hi.

⁹Mite khempeuh Ephraim le Samaria a tengte khempeuh kiphasak uh a, amaute lungsim ah ki-uangsakin,

¹⁰"Leisekte a kicip khit hangin suangsuih tawh i lam ding hi; thei-singte a puk khit hangin tamtaakin i khek ding hi," a cite in a thei ding uh hi.

¹¹Ahi hangin TOPA in Rezin’ galte amau langkhatah thakhauhsakin amau tungah a hahkatsak teitei hi.

¹²Nisuahna pan Aram mite le nitumna pan Philistia-te kamka-in Israel-te a nawmvalh uh hi. Hihzahta hi khin napi a hehna dai tuan loin a khut liik lai hi.

¹³Ahi hangin amaute a satpa lam nga tuan lo uh a, Thahatpen TOPA a zong tuan kei uh hi.

¹⁴Tua ahi ciangin TOPA in ni khat sungin Israel pan a lu le a mei - nisuh hiang le pumpengte a bantan khawm ding hi;

¹⁵a upate le a zahtak baangte a lutang hi-a, zuauthu a hilh kamsangte a mei ahi hi.

¹⁶Hih mite a lamlakte un lam khialhpih uh a, a mapite un a gammangsak uh hi.

¹⁷Tua ahi ciangin khangnote tungah Topa lungkim lo dinga, pa nei lote le meigongte a hehpih tuan kei ding hi; ahang in, mi khempeuh in pasian nei loin gilo uh a, kam khauh vive a pau uh hi. Hizahta hi khin napi a hehna dai tuan loin a khut liikto lailai hi.

¹⁸Gitlohna mei bangin kuang takpi a, lingte le thanglingte hultumin tulak gam phapi lawh a, tunglam ah meikhu lompi-in a kizial to hi.

¹⁹Thahatpen TOPA thangpaihna hangin leitung kangzul dinga mite mei-a cih ding sing suakin kuamah in a sanggampa a hawi kei ding hi.

²⁰A taklama omte a valh uh hangin a gil uh kial lai-a, a veilama omte a nek uh hangin a kham zo kei uh hi. Mite, amau suan-le-khakte a[28]-in a kivak ding uh hi.

²¹Ephraim-in Manasseh kivak dinga, Manasseh-in Ephraim a kivak ding hi; amaute in Judah a langpan khawm ding uh hi. Hizahta hi khin napi a hehna dai tuan loin a khut liikto lailai hi.