Read Zokam Siampi Laibu 10 Bible Online

Siampi Laibu 10 - Zokam bible

Siampi Laibu 10

¹Aaron tapa Nadab le Abihu te in amau gimnamtui beelte la uh a, a sungah mei koihin gimnamtui a sung uh hi; tua ciangin amaute in ama thupiakna tawh kilehbulhin a thu tawn loin TOPA mai-ah mei a pia uh hi.

²Tua ciangin TOPA omna panin mei kuangkhia a, amaute kangtumin TOPA mai-ah a si uh hi.

³Tua ciangin Moses in Aaron kiangah, "Hih in TOPA thugen ahi hi, amah in: ‘Kei hong naihte lakah, kei a siangtho ka hina ka lak ding hi; mite khempeuh muhna-ah kei hong kipahtawi ding hi,’ ci hi," a ci hi. Aaron a daidide hi.

⁴Moses in Aaron pano Uzziel tapate Mishael le Elzaphan-te sama, amaute kiangah, "Hih lai-ah hong pai un; mun siangtho mai panin giahphual pua ah na sanggamte uh puakhia un," a ci hi.

⁵Tua ahi ciangin amaute pai uh a Moses sawl bangin a puantungsilh mah uh tawh giahphual pualamah a puakhia uh hi.

⁶Tua khit ciangin Moses in Aaron le a tapa Eleazar le Ithamar kiangah, "Na samte uh gumsak c[20] kei unla na puan uh balkek kei un, na tua cih kei uh leh na si ding uh a, mipi bup tungah TOPA a heh ding hi. Ahi hangin na tanaute uh, Israel innkuan khempeuh, TOPA in mei-a a suksiatna hangin a thum thei ding uh hi.

⁷Kikhopna Puanbuk lutna lawi kei un; na lawih uh leh TOPA sathau nilh note tungah baang ahi manin na si ding uh hi," a ci hi. Amaute in Moses cih bangin a hih uh hi.

⁸Tua khit ciangin TOPA in Aaron kiangah,

⁹"Nang le na tapate in Kikhopna Puanbuk sungah na pai peuhmah uh ciangin lenggahzu ahikeh a kibilh dang khatpeuh na dawn kei ding uh hi; na dawn uh leh na si ding uh hi. Hih in khang sawnsawnte donga a om den ding thuzek ahi hi.

¹⁰A siangtho le a siangtho lo, asiang le anin na khen tektek ding uh a,

¹¹Moses tawna TOPA in amaute a piaksa thukipte khempeuh Israel-te na hilh ding uh hi" a ci hi.

¹²Moses in Aaron le a omlai a tapate Eleazar le Itharmar-te tungah, "TOPA mai-a mei-a hal biaknate pana an-a biakna valte la unla silngo sawh loin biakna-tau kiangah ne un; ahang in, a siangtho pen ahi hi.

¹³Mun siangtho khatah ne un, bang hang hiam cih leh TOPA mai-a mei-a hal biaknate panin nang le na tapate tanh ahi hi; ahang in, tua bang dingin kei tungah thu hong kipia hi.

¹⁴Ahi hangin nang le na tanute na tapate in a kivei a iik le a kipiasa a phei na ne thei ding uh hi. A siangtho-a kisehna munah tuate ne un; Israel-te kilawmtakna biakna a[21] pana nang le na tate tanh dinga hong kipia ahi hi.

¹⁵A kipiasa a phei le a kivei a iik, mei-a hal biakna lakah athaute tawh TOPA mai-ah vei-a biakna dingin nong tawi ding uh hi. Hih in TOPA hong thupiak bangin nang le na tate in na kaih den ding uh ahi ding hi," a ci hi.

¹⁶Moses in mawhna hanga biakna keel thu a kan ciangin kihaltum khin hi, cih thei-a a om lai Aaron tapa Eleazar le Ithamar tungah heh a amaute kiangah,

¹⁷"Bang hangin mawhna hanga biakna mun siangtho huam sungah ne lo na hi uh hiam? Tua in a siangthopen ahi hi; TOPA mai-ah amaute adingin thoihdamna bawla mipite khialhna lakmang nadingin no tunga hong kipia ahi hi.

¹⁸Munsiangtho pena, a sisan a kilah loh nungsang kong thupiak bangin tua keel, mun siangtho huam sungah na nek ding uh ahi hi," a ci hi.

¹⁹Aaron in Moses kiangah, "Tuni-in amaute in amau mawhna hanga biakna le a meihal biakna uh TOPA mai-ah a pia uh hi; ahi hangin tua bang nate kei tungah hong piang hi. Tuni-in mawhna hanga biakna ne hi leng TOPA a lungdam ding hiam?" ci-in a dawng hi.

²⁰Moses in hih thute a zak ciangin a lungkim hi.