Read Zokam Siampi Laibu 11 Bible Online

Siampi Laibu 11 - Zokam bible

Siampi Laibu 11

¹TOPA in Moses le Aaron kiangah,

²"Israel-te tungah, ‘Leitunga a nungta ganhingte khempeuh lakah na nek theih ding uh hihte ahi hi:

³A khecin ciantaka a ka ganhing eknel hai peuhmah na ne thei ding uh hi.

⁴"‘Ganhing pawlkhat a khecin bek a ka, ahikeh eknel bek a hai om hi; tuate na ne peuhmah kei ding uh hi. Kala-oh in eknel a hai hangin a khecin a ka kei hi; tua pen note adingin a sianglo-a kiseh ahi hi.

⁵Sakikh b[22] in eknel a hai hangin a khecin ka lo hi; tua pen no adingin a siang lo ahi hi.

⁶Bilpi in eknel a hai hangin a khecin a ka kei hi; tua pen note adingin asiang lo ahi hi.

⁷Tuateh vok a khecin kiciantakin a kat hangin eknel a hai kei hi; tua pen note adingin asiang lo ahi hi.

⁸A sa na ne peuhmah kei ding uh a, a sisa zong na lawng kei ding uh hi; tuate note adingin a siang lo ahi hi.

⁹"‘Tuipite le luituite sunga om a nungta ganhingte khempeuh lakah phe le lip a neite peuhmah na ne thei ding uh hi.

¹⁰Ahi hangin tuipite ahikeh luite sunga om ganhing phe le lip a nei lo - tuipek thei ahi a, ahikeh tui sunga a nungta ganhing dangte khempeuh ahi zongin no adingin a kihhuai ahi hi.

¹¹Note in tuate na kih ding uh ahi nungsang a sa na ne peuhmah kei ding uh a, a sisate na kih pelmawh ding uh hi.

¹²Tui sunga a nungta phe le lip a nei lo peuhmah note adingin a kihhuai ahi hi.

¹³"‘Hihte a kihhuai ahi mana kih a na nek loh ding uh vasate ahi hi: Muvanlai, musane, luimu,

¹⁴mumeika, musan nam khempeuh

¹⁵va-ak nam khempeuh

¹⁶simbu ki nei peuhmah, vabak, tuivakang, musi nam peuhmah,

¹⁷keising, tuimu, simbupi

¹⁸simbukang, gun vakang, tui vatawt

¹⁹gun vapi, tuiva nam peuhmah, huihtun le bak c[23] ahi hi.

²⁰"‘A leng thei kheli nei ganhing peuhmah note adingin a kihhuai ahi hi.

²¹Ahi zongin kha nei-a a khe li-a a pai na nek theih ding uh pawlkhatte: leitungah a zuan nading khe kikhep nei peuhmah.

²²Hihte lakah kauphe nam peuhmah, kaukhup, khuangbai ahikeh kauphe kisau-te ahi hi.

²³Ahi hangin kha nei ganhing kheli nei peuhmah na kih ding uh ahi hi.

²⁴"‘Hihte in note hong ninsak dingte ahi hi; tuate sisa a lawngkha peuhmah nitak mateng a siang lo ahi ding hi.

²⁵Hihte a sisa a tawmkha mi peuhmah a puansilhte sawp pelmawh dinga amah nitak mateng a siang lo hi ding hi.

²⁶"‘Ganhing a khecin ka napi ka siang taktak lo a eknel a hai lote note adingin a siang lo ahi hi; tuate khatpeuh a sisa a lawng peuhmah a siang lo ahi ding hi.

²⁷Khe li nei ganhingte lakah a khe bomin cin a nei peuhmah note adingin a siang lo ahi hi; tuate a sisa a lawngkha peuhmah nitak mateng a siang lo ahi hi.

²⁸Tuate a tawm khatpeuh in a puansilhte sawp pelmawh dinga amah nitak mateng a siang lo hi ding hi. Tuate note adingin a siang lo ahi hi.

²⁹"‘Leitunga a bokvak ganhingte lakah note adingin a siang lote in: bui, zusa, tangpi nam khempeuh,

³⁰innhik, thankik, tangteuh, saphulip le tawlbawkpi-te ahi hi.

³¹Leitunga a awmtal ganhing khempeuh lakah note adingin a siang lo hihte ahi hi. Hihte a sisa a lawngkha peuhmah nitak mateng a siang lo ahi hi.

³²Hihte lakah khatpeuh sisa na khat tungah a kiat leh tua a tukna, a kizang na: sing, puan, savun ahikeh ippi ahi zongin a siang lo a suak hi. Tui-ah diah un; nitak mateng a siang lo hi dinga, tua ciangin a siang ding hi.

³³Tuate khat leibeel sungah a kiat leh a sunga om na khempeuh a siang lo hi dinga, a beel na sukham pelmawh ding uh hi.

³⁴Nek ding an khat tua banga a sianglo beel sungah tui in a buah khak leh a siang lo hi a, tui dawn ding tua bang beel sungah a om khak leh tua tui a siang lo a suak hi.

³⁵Tua bang ganhing sisa a tukna na khatpeuh a siang lo a suak hi; tua bang thuk ahikeh anbeel pel loin na suksiat ding ahi hi. Tuate a siang lo hi a, a siang lo-a na koih ding uh ahi hi.

³⁶Bangbang ahi zongin tuinak ahikeh tuibem kuangzawnte a siang veve hi a, ahi hangin hih ganhing sisate a lawng peuhmah a siang lo ahi hi.

³⁷Ganhing sisa khat a kituh ding khaici tung khatah a kiat leh a sianglai veve hi.

³⁸Ahi hangin a khaici tui-ah a kidiah khitin ganhing sisa tungah a kiat leh no adingin tua khaici a siang lo ahi hi.

³⁹"‘Note nek theih ganhing khatpeuh a sih leh tua a sisa ganhing a lawngkha mi khatpeuh nitak mateng a siang lo hi ding hi.

⁴⁰Ganhing sisa a ne mi khat peuhmah in a puansilhte sawp tektek dinga, nitak mateng amah a siang lo hi ding hi. Tua bang ganhing sisa a tawm peuhmah in a puansilhte sawp pelmawh dinga nitak mateng amah a siang lo hi ding hi.

⁴¹"‘Leitunga a bokvak ganhing peuhmah note adingin a kihhuai hi a; nek loh ding ahi hi.

⁴²Leitungah bokvaka pai ahikeh a awma tal ahikeh kheli-a pai ahikeh khe tampi-a paite ahi zongin na ne kei ding uh hi; tuate kihhuai hi.

⁴³Hih ganhingte khatpeuhin kibuahsak kei in. Tuate hangin kisiang losak ahikeh tuate hangin nang le nang a siang lo kisuaksak kei in.

⁴⁴Keimah TOPA note Pasian ka hi hi; keimah siangtho ka hi manin no le no kisiansuahin siangtho un. Leitunga a bokvak ganhing khatpeuh hangin no le no kisiang losak kei un.

⁴⁵Keimah note Pasian ahi dingin Egypt pana hong pikhia TOPA ka hi hi; tua ahi manin siangtho un, bang hang hiam cih leh keimah ka siangtho hi.

⁴⁶"‘Hihte in vasate, tui sunga gamta a nungta ganhing khempeuh le leitunga a bokvak a nungta ganhing khempeuh tawh kisai ngeinate ahi hi.

⁴⁷Note in a nungta ganhingte asiang le asiang lo, a sa nek theih ding le nek theih loh ding na khen ciltel ding uh hi,’ ci un," a ci hi.