Read Zokam Siampi Laibu 12 Bible Online

Siampi Laibu 12 - Zokam bible

Siampi Laibu 12

¹TOPA in Moses tungah,

²"Israel-te tungah: ‘Numei khat gai-a tapa a suah leh khasim a nin neih-a a sian loh bang tektekin ni sagih sung a siang loin kiseh hi.

³A nigiat ni-in pasalnote a vun ki-atsak ding hi.

⁴Tua ciangin numei in a sisan luanna pan a kisiansuah nadingin ni sawmthum le thum ngak tektek ding hi. Tuanu in a kisiansuahna ni a khen mateng a siangtho na khatpeuh lawng lo dinga, mun siangtho ah a pai kei ding hi.

⁵Amah in tanu mei a suah leh, a nin neih lai bangin nipi kal nih sung a siang lo hi ding hi. Tua ciangin a si luanna pan siansuah nadingin ni sawmguk le guk sung ngak pelmawh ding hi.

⁶"‘Tapa a nei a tanu a nei zongin a kisiansuahna ni a cin khit ciangin Kikhopna Puanbuk lutna-a siampipa kiangah meihal biakna dingin kum khat a pha tuuno khat le mawhna hanga biakna dingin kawlvakhu no ahikeh vakhu khat paipih ding hi.

⁷Amah in tuanu adingin TOPA tungah thoihdamna bawlsak dinga tua ciangin ama sisan luanna panin a siangin kiseh ding hi; hihte in ta numei ahikeh tapasal a suak numei adingin ngeinate ahi hi.

⁸"‘Tuanu in tuuno a neih zawh kei leh vakhu nih ahikeh kawlvakhuno nih khat haltum biak nading, adang khat mawhna hanga biakna dingin a tawi ding hi. Hici bangin siampipa in tuanu adingin thoihdamna bawlsakin, tua ciangin amah a siang hi ding hi,’ ci in," a ci hi.