Read Zokam Siampi Laibu 13 Bible Online

Siampi Laibu 13 - Zokam bible

Siampi Laibu 13

²"Mi khatpeuh in a vun tungah a kilawh thei vun natna a[24] a suak thei ding a bawk ahikeh a dulh ahikeh a kang liklek a neih leh amah siampipa Aaron ahikeh a tapate b[25] siampite khat tungah a kipaipih pelmawh ding hi.

³Siampipa in tua vuna meima veel dinga a meima munah mulkang a po-a, meima zong vun sang a thukzaw c[26] ahilam a kilat leh tua in a kilawh thei vun natna khat ahi hi. Siampipa in a veel ciangin amah a siang loin kiseh hi, ci ding hi.

⁴A vun meima kanga a vun sanga thukzaw dingin a kilata, a meima sunga mul a kan nai kei leh siampipa in tua cinapa ni sagih sung a tangkoih ding hi.

⁵A ni sagih ni ciangin siampipa in amah veel dinga a meima kikhel tuan loin a vun ah zong masem tuan lo hi cih a muh leh adang ni sagih sung a tuamin ki-omsak lai ding hi.

⁶A ni sagihna ni-in siampipa in veel kik dinga, a meima masem tuan loin a vuai leh siampipa in amah a siang hi, ci-in gen ding hi; tua pen a dulh mawkmawk ahi hi. Mipa in a puansilhte sawp pelmawh dinga tua ciangin amah a siang ding hi.

⁷Ahi hangin amah siampipa tungah kilak a, amah a siang hi, ci-a a kipulak khitin tua a dulh pen a vun tungah a masem leh siampipa tungah pelloin a kilak kik ding hi.

⁸Siampipa in amah vel dinga a dulh in a vun tungah ma a sem leh amah siang lo hi, ci-in pulak ding hi; tua in a kilawh thei natna khat ahi hi.

⁹"Mi khatpeuh in a kilawh thei vun natna a vei leh siampipa kiangah kipuak pelmawh ding hi.

¹⁰Siampipa in amah veel dinga a vun sungah kangin bawka a multe a kan khita a bawk sungah mathak a om leh,

¹¹tua pen vun natna kumlui hi a, siampipa in amah siang lo hi, ci-in a pulak ding hi. Amah a siang losa ahi manin tuam omsak kul lo hi.

¹²"Tua natna a vuntung khempeuh ah a kilawh khit leh siampipa muhna ciangah cinapa a luzang pan a khepek donga vun khempeuh a tuam khit leh,

¹³siampipa in amah veel dinga natna in a pumtuam khin ahileh tua mipa a siang hi, ci-in pulak ding hi. Amah a pumtangin kangkhin ahi nungsang a siang ahi hi.

¹⁴Ahi hangin ama tungah mathak a kilat peuhpeuh ciangin amah a siang lo ahi ding hi.

¹⁵Siampipa in mathak a muh ciangin amah a siang lo ahi hi; amah a kilawh thei natna vei ahi hi.

¹⁶Tua a mathak pen kikhelin a kan leh pel loin siampipa kiangah pai ding hi.

¹⁷Siampipa in amah veel dinga, a meima kikhelin a kan leh siampipa in meima vei pen a siang hi, ci-in a pulak ding hi; tua ciangin amah a siang hi ding hi.

¹⁸"Mi khatpeuh in vun tungah meimatum vei-in a dama,

¹⁹a meima-tum veina mun bawkin kanga, ahikeh a sankang a suah leh amah siampipa tungah va kilak ding hi.

²⁰Siampipa in veelsak dinga, vun sahna sanga thukzaw-in, a kilat a, tua sunga a mul a kan khit leh siampipa in amah a siang loin pulak ding hi. Meimatum a omna munah a kitap khit leh a kilawh thei vun natna khat ahi hi.

²¹Ahi hangin siampipa in veelsaka, a sungah mulkang po loin vunsahna sangin thukzaw lo-a, a vuai leh siampipa in amah a tuamin ni sagih sung koih ding hi.

²²A vun tung dang a lawh leh siampipa in, amah a siang lo ahi hi, ci-in pulak ding hi; tua pen a kilawh thei ahi hi.

²³Ahi hangin masem tuan lo-a, a mundang a lawh tuan kei leh tua in meimatum pawn hi lel a, siampipa in amah a siang hi, ci-in pulak ding hi.

²⁴"Mi khatpeuh mei kanga, a katna mathak vun tungah a sankang ahikeh akang liklek a om leh,

²⁵siampipa in tua mun etsak dinga, a sunga a multe kang khina, vun sahna sangin thukzaw dinga a kilat leh tua pen meikatna pana kipankhia a kilawh thei natna ahi hi. Siampipa in amah a siang lo ahi hi, ci-in pulak ding hi; tua in a kilawh thei vun natna khat ahi hi.

²⁶Ahi hangin siampipa in a veelsaka a ma-ah a mulkang om loin vun sahna sangin thukzaw lo-a a vuai lel ahileh siampipa in amah ni sagih sung tuam omsak ding hi.

²⁷A ni sagih ni ciangin siampipa in amah veel kik dinga, a vun dang a lawh leh siampipa in amah a siang lo hi, ci-in pulak ding hi; tua in a kilawh thei vunnatna khat ahi hi.

²⁸Bangbang ahi zongin masem tuan lo-a, a vun tungtham a lawh tuan kei leh a dulh lel hi-in a katna pana bawk ahileh siampipa in amah a siangin pulak ding hi; tua pen a katna pana meima pawn lel ahi hi.

²⁹"Numei ahikeh pasal khat in a lutang ahikeh a kha ah meima a neih leh

³⁰siampipa in a meima veelsak dinga vun sahna sangin thukzaw dingin a kilat-a, a sunga a mul ngatin a naipak mel ahileh siampipa in tua mipa a siang loin pulak ding hi; tua lutang ahikeh kha-a a kilawh thei cithak natna khat ahi hi.

³¹Ahi hangin siampipa in hih meima namte a veel ciangin vun sahna zah sangin a thukzaw lo ding tawh a kibata, a sungah mulvom a om kei leh siampipa in tua natna nei pen ni sagih sung a tuamin omsak ding hi.

³²A ni sagih ni-in siampipa in meima veelsak dinga, a thak pen in a mundang lawh tuan loin a sungah a mul-naipak a om kei a, vun sahna sangin thukzaw dingin a kilat kei leh

³³tuapa in a natna mun teng lobuang a mul met dinga siampipa in adang ni sagih a tuamin kem lai ding hi.

³⁴A ni sagihna ni-in siampipa in a cithak veel dinga a vun dang lawh loin vun sahna sangin thukzaw dinga a kilat leh siampipa in amah a siangin pulak ding hi. Amah in a puansilhte sawp pelmawh dinga tua ciangin amah a siang hi ding hi.

³⁵Ahi hangin amah siang hi, ci-a a kipulak khitin a ci thakna in a vun sungah ma a seem leh

³⁶siampipa in amah veel dinga a cithakna in a vun sung a lawh khit leh siampipa in a mul naipak a zon ding kisam nawn lo hi; tua mipa a siang lo ahi hi.

³⁷Bangbang ahi zongin kikhelna om lo-a, a sungah mulvom po zo hi, ci-a a khentel leh tua cithak a dam khin ahi hi. Amah a siang hi a, siampipa in amah a siangin pulak ding hi.

³⁸"Numei khat ahikeh pasal khatin a vun tungah cikang khat a neih ciangin

³⁹siampipa in tuate veel dinga, tua mun a kang milmial ahileh, tua pen a lauhuai lo vuntung puakkhamin adulh hi-a, tua mi a siang ahi hi.

⁴⁰"Pasal khat a sam pulhin a lu a tol leh amah a siang ahi hi.

⁴¹Amah a luzang a sam pulh-a, a tal a kolh leh amah a siang hi.

⁴²Ahi hangin a lu kolh-a, ahikeh a taltangah sakang meima a vei leh tua pen a lutung ahikeh a taltanga pokhia a kilawh thei natna ahi hi.

⁴³Siampipa in amah veel dinga a lutang ahikeh a taltanga meima bawk pen a kilawh thei vun natna tawh kibangin a sankangin a om leh,

⁴⁴tua mi natna vei hi-a, a siang lo ahi hi. A lutanga meima hangin siampipa in a siang loin pulak ding hi.

⁴⁵"Tua bang a kilawh thei natna a nei mi-in pel loin puansia silh dinga a sam hiatmam a[27] loin, a maitang a nuailam tuamin, ‘Siang lo! Siang lo!’ ci-in a kiko ding hi.

⁴⁶Tua bang natna a vei sung teng amah a siang lo ahi hi. Pel loin amah kia om dinga giahphual pualamah a teng ding hi.

⁴⁷"Puansilh khatpeuh ap in a siatsak leh - samul puan ahikeh saihadial puan khatpeuh,

⁴⁸khau tawh ahikeh samul tawh a kigan ahikeh a kiphan khatpeuh, savun tawh ahikeh savun ahikeh savun tawh a kibawl na khatpeuh -

⁴⁹le puansilh ahikeh savun, ahikeh a kigan ahikeh a kiphan nate, ahikeh savun tawh kibawl na khatpeuh a mel eng pian ahikeh san pianin a ap leh pel loin siampipa kilak ding hi.

⁵⁰Siampipa in tua ap veel dinga tua a ap na pen ni sagih sung tang koih ding hi.

⁵¹A ni sagihna ni-in tua na veel kik dinga, a ap pen in a puansilh ahikeh a kigan ahikeh a kiphan, ahikeh na-a kizang savun pen mundang a lawh leh tua pen a siahuai ap hi a, tua na a siang lo ahi hi.

⁵²Amah in tua puansilh ahikeh samul tawh ahikeh khau tawh a kigan ahikeh a kiphan na, ahikeh savun kibawl na khatpeuh gial in a sep peuhmah haltum ding hi; bang hang hiam cih leh tua ap pen a siahuai thei hi-a, tua na haltum ding ahi hi.

⁵³"Ahi hangin siampipa in a veel ciangin tua ap pen puansilh ahikeh a kigan ahikeh a kiphan ahikeh savuna kibawl na a tung daang a lawh kei leh,

⁵⁴amah in tua gial in a sep na pen sawpsak ding hi. Tua ciangin amah in adang ni sagih sung tang koih lai ding hi.

⁵⁵Tua na a apna mun a kisawp khit ciangin, siampipa in veel dinga, tua ap in a mel a khek tuan keileh a mundang a lawh loh hangin a siang lo ahi hi. A ap in pang khat ahikeh adang khat a siatsak loh hangin mei-in hal un.

⁵⁶Siampipa in tua na a veel ciangin tua na a kisawp khit nungin a apte a vul leh, puansilh ahikeh savun ahikeh a kigan ahikeh a kiphan na a siatna mun teng eukhia ding hi.

⁵⁷Ahi hangin tua pen puansilh tung ahikeh a kigan ahikeh a kiphan na ahikeh savun kibawl na tungah a mundang ah a kilat kik leh tua banga a ap van peuhmah mei-a hal ding ahi hi.

⁵⁸Tua puansilh ahikeh a kigan ahikeh a kiphan na, ahikeh savun kibawl na khatpeuh a kisawpsa pen a ap nawn kei leh pel loin kisawp kik dinga tua ciangin a siang hi ding hi," a ci hi.

⁵⁹Hihte in samul puan ahikeh patpuan a kigan ahikeh a kiphan na, ahikeh savun kibawl na khatpeuh a apna hanga gial in a sepna tawh kisai a siang le a siang lo pulak nading ngeinate ahi hi.