Read Zokam Siampi Laibu 14 Bible Online

Siampi Laibu 14 - Zokam bible

Siampi Laibu 14

²"Hihte in siampipa mai-ah cinate kipaipihin a kisiansuah hun cianga zat ding ngeinate ahi hi:

³Giahphual pualam ah siampipa paikhia-in amah veel ding hi. Tua mi a kilawh thei ama vunnatna a[28] a dam khit leh,

⁴mi khat sian nadingin siampipa in a nungta vasa a siang nih leh tamtak sing pawlkhat, a-ausan khau le puknah a lasak ding hi.

⁵Tua ciangin siampipa in tua vasate khat, leibeel a tuisiang tungah gosak ding hi.

⁶Tua ciangin amah in vasa a hing lai pen la dinga, tuisiang tunga kigosa vasa pen sisan sungah tamtak sing, a-ausan khau le puknah tawh diahkhawm ding hi.

⁷Amah in tua a kilawh thei natna a vei pen sagih vei theh dinga tua ciangin amah siang hi, ci-in pulak ding hi. Tua ciangin amah in vasa ahing lai pen gamlakah a khah ding hi.

⁸"A kisiangsak ding mi pen in pel loin a puan sawpin a mul khempeuh metin tui-in kisil ding hi; tua ciangin amah a siangin kiseh ding hi. Tua teng khit ciangin giahphual sungah lut thei dinga ahi hangin ama puanbuk pua-ah ni sagih sung a om pelmawh ding hi.

⁹A ni sagihna ni-in a mul khempeuh met pelmawh ding hi; amah in a lu, a khamul, a mitkhu-mul le a mul dang khempeuh met ding hi. Pel loin a puansilhte sawpin kipumsil dinga tua ciangin asiang hi ding hi.

¹⁰"A nigiat ni-in amah in a sitbaang lo kum khat a pha tuuno apa nih le anu khat, le an-a biakna dingin sathau tawh helsa annel limci ephah b[29] khat sehsawm suah sehthum le sathau bingta c[30] khat tawh a paipih khawm ding hi.

¹¹Amah in siang hi, ci-a a pulak siampipa in a kisiangsak ding mi le a biaknate Kikhopna Puanbuk lutna TOPA mai-ah a pia ding hi.

¹²"Tua khit ciangin siampipa in tuu-pano khat la dinga sathau bingta khat tawh khialhna biakna-in a piakhawm ding hi; amah in TOPA mai-ah vei-a biakna-in tuate a vei ding hi.

¹³Amah in tua tuuno, mawhna hanga biakna le meihal biakna gawhna mun siangtho ah a go ding hi. Mawhna hanga biakna mah bangin khialhna hanga biaknate siampite aa hi-a, a siangtho pen ahi hi.

¹⁴Siampipa in khialhna hanga biakna sisan pawlkhat la in a kisiangsak ding mi taklam bilhual tung, a taklam khutpi tung le a taklam khepi tungah nuh ding hi.

¹⁵Tua khit ciangin siampipa in bingta pana sathau la dinga ama veilam khutpek sungah sungin,

¹⁶a khut sunga sathau lakah a taklam khutme-lai diahin a khutme tawh pawlkhat TOPA mai-ah sagih vei a theh ding hi.

¹⁷Siampipa in a khutpek sunga a om lai sathau, a kisiangsak ding mi taklam bilhual, a taklam khutpi tung le a taklam khepi tung, khialhna hanga biakna sisan tungah nuh thuah ding hi.

¹⁸Siampipa in a khutpek sunga om lai sathau pen a kisiangsak ding mi lutung ah koih dinga ama adingin TOPA tungah thoihdamna a bawl ding hi.

¹⁹"Tua ciangin siampipa in, sianlohna pan a kisiangsak ding mi thoihdamna bawlin mawhna hanga biakna a pia ding hi. Tua khit ciangin siampipa in meihal biakna go dinga,

²⁰an-a biakna tawh biakna-tau tungah piakhawmin ama adingin thoihdamna bawlin, tua ciangin amah a siang ding hi.

²¹"Bangbang ahi zongin amah zawngin hihte a neih zawh keileh amah in a pel loin ama ading thoihdamna bawlna-a vei ding, khialhna hanga biakna adingin tuuno apa khat tawh, an-a biakna dingin annel limci sathau kihelsa ephah d[31] khat sehsawm suah sehkhat, sathau bingta khat tawh,

²²le ama neih zawh ding vakhu nih ahikeh kawlvakhu nih, mawhna hanga biak nading khat le a khat pen meihal biakna dingin a tawikhawm ding hi.

²³"A nigiat ni-in amah in a sian nadingin Kikhopna Puanbuk lutna TOPA mai-ah siampipa a puak pelmawh ding hi.

²⁴Siampipa in khialhna hanga biakna dingin tuuno le sathau bingta lakhawm dinga vei-a biakna-in TOPA mai-ah tuate a vei ding hi.

²⁵Amah in khialhna hanga biakna dingin tuuno go dinga a sisan pawlkhat la-in a kisiangsak ding mi taklam bilhual tung, a taklam khutpi tung le a taklam khepi tungah a nuh ding hi.

²⁶Siampipa in a veilam khutpek sungah sathau pawlkhat sung dinga,

²⁷a taklam khutme-lai tawh a khutpek sunga sathau pawlkhat TOPA mai-ah sagih vei a theh ding hi.

²⁸Amah in a khutpek sunga sathau pawlkhat pen khialhna hanga biakna sisan a nuhna mun teng - a kisiangsak ding mi taklam bilhual, a taklam khutpi tung le a taklam khepi tungah a nuhsak ding hi.

²⁹Siampipa in a khutpek sunga a omlai sathaute a kisiangsak ding mipa lutungah nuhsak dinga, TOPA mai-ah thoihdamna a bawlsak ding hi.

³⁰Tua ciangin amah in a kisiangsak ding mi neih zawh bangbang vakhu ahikeh kawl-vakhute biakna-in pia dinga

³¹khat e[32] mawhna hanga biakna, a khat pen meihal biakna-in an-a biakna tawh a piakhawm ding hi. Hici bangin siampipa in a kisiangsak pen tangin TOPA mai-ah thoihdamna a bawlsak ding hi," a ci hi.

³²Hihte in a kilawh thei vun natna a vei peuhpeuh, ama sian nadinga biak nading zah a pia zo lo peuhmah kisiansak nading ngeinate ahi hi.

³³TOPA in Moses le Aaron tungah,

³⁴"Note neih dinga kong piak Canaan leitang ah na lut uh ciangin tua gama inn khatah ap ka na kaisak leh

³⁵pel loin a inn neipa siampipa kiangah pai-in, ‘Ka inn sungah apkai tawh kibang khat ka mu hi,’ ci-in gen ding hi.

³⁶Inn sunga na khatpeuh a siang lo-a a pulak khak loh nadingin siampipa, apkai veel dinga a pai ma-in inn sung a hawma a om nadingin thu a pia ding hi. Tua khit ciangin siampipa a sungah lutin veel ding hi.

³⁷Amah in kawm tunga apkai veel dinga, a-eng pian ahikeh asan pianin ne kuaka, a kawm maitang sahna sangin thuk bunzaw-a, a kilat leh,

³⁸inn pua-ah siampipa paikhia dinga ni sagih sung tua inn kongkhak a khakcip ding hi.

³⁹A ni sagih ni-in siampipa in tua inn veel kik ding hi. A apkai pen in kawm tung dang a lawh leh,

⁴⁰amah in gial in a sepsa suangtumte kalkhia-in khuanawl a siang lo mun khatah paisak ding hi.

⁴¹Amah in kawm sunglam khempeuh kiatkhiasak tektek dinga, tua a kikiatkhia a zutna themte, khuapua a sianglo mun khatah buasak ding hi.

⁴²Tua ciangin amaute in hihte suang dangin laih ding uh a, buan thak la-in inn a zut ding uh hi.

⁴³"Tua inn a, a apkai suangte kilaihkhia a, kikiatkhia in a kizut thak nungin tua inn ah apkai a kilat kik leh,

⁴⁴siampipa pai-in veel dinga, a inn sungteng apkai in a zelh leh a siasak thei apkai hi-a, a inn a siang lo ahi hi.

⁴⁵Pel loin tua inn - a suangte, a singte le a zutnate phelkhia-in khuapua a sianglo mun khatah kinawnkhia ding hi.

⁴⁶"Tua inn a kikhakcip laitaka a sunga lut peuhmah a nitak dong a siang lo hi ding hi.

⁴⁷Tua inn sunga a lum ahikeh an ne peuhmah in pel loin a puansilhte uh a sawp ding uh hi.

⁴⁸"Ahi hangin siampipa a veel dingin pai-a, a kizut kik zawhin a apkai in mundang a lawh kei leh apkai om nawn lo ahi manin amah in tua inn a siang hi, ci-in a pulak ding hi.

⁴⁹Tua inn siansuah nadingin amah in vasa nih le tamtak sing pawlkhat, khau ausan le puknahte a tawi ding hi.

⁵⁰Amah in vasa khat leibeel sunga kikoih tuisiang tungah a go ding hi.

⁵¹Tua ciangin tamtak sing, puknah, khau ausan le vasa a hing lai pen la-in tuate a sisa vasa sisan le tui siang sungah diahin tua inn sung sagih vei a theh ding hi.

⁵²Amah in vasa sisan, tuisiang, vasa a hinglai pen, tamtak sing, puknah le khau ausan-te in tua inn a siansuah ding hi.

⁵³Tua khit ciangin amah in vasa a hing lai pen khuapua gamlakah khah ding hi. Hici bangin inn adingin thoihdamna bawl dinga tua ciangin a siang ding hi," a ci hi.

⁵⁴Hihte in, a kilawh thei vun natna khatpeuh, cithak,

⁵⁵puansilh ahikeh inn tunga ap a kai ciang

⁵⁶le a bawk a dulh ahikeh vuntung kang liklek-te tawh kisai

⁵⁷a siang le a siang lo ettel cianga zat ding ngeinate ahi hi. Hihte in a kilawh thei vunnatnate le a apkai tawh kisai ngeinate ahi hi.