Read Zokam Siampi Laibu 15 Bible Online

Siampi Laibu 15 - Zokam bible

Siampi Laibu 15

¹TOPA in Moses le Aaron tungah,

²"Israel-te hopih unla amaute tungah: ‘Pasal khatpeuh in a pumpi panin a pawtkhia a neih leh tua a pawtkhia a siang lo ahi hi.

³A pumpi panin a luang den ahikeh a kang zel zongin tua in amah a siang lo a suaksak hi. Hih in amah pana pawt, a siang lo na in amah a sianlohsak zia ahi hi:

⁴"‘A natui a pawt mipa lupna a sianglo hi dinga ama tutna na khatpeuh asianglo hi ding hi.

⁵Ama lupna a lawng peuhmah in a puansilhte sawpin tui-in kipumsil dinga a nitak mateng asianglo hi ding hi.

⁶A na tui pawt mipa tutna na khatpeuh tunga a tu peuhpeuh in a puansilhte sawpin tui in kipumsil dinga a nitak mateng amah asianglo hi ding hi.

⁷"‘A pawtkhia a nei mipa a lawngkha peuhmah in pel loin a puansilhte sawpin, tui-in kipumsil dinga a nitak mateng asianglo ahi hi.

⁸"‘A natui pawt mipa in mi khatpeuh a cil a phih leh tua mipa in pel loin a puansilhte sawpin, tui-in kipumsil dinga a nitak mateng a siang lo hi ding hi.

⁹"‘Tua mipa a tuanna-a a tutna na khempeuh asianglo hi dinga

¹⁰ama nuai-a a tutna a lawng peuhmah nitak mateng asianglo hi ding hi; tua nate a tawm peuhmah in pel loin a puansilhte sawp dinga tui-in kipumsilin a nitak mateng asianglo hi ding hi.

¹¹"‘A natui a pawt mipa in a khut silsiang sinsen lopi-in a lawn khak mi peuhmah in pel loin a puansilhte sawpin tui-in kipumsil dinga a nitak mateng asianglo hi ding hi.

¹²"‘Tua mipa in a lawnkhak leibeel kisukham dinga, singa kibawl na khatpeuh ahileh tui-in kisilsiang kiuhkeuh ding hi.

¹³"‘Mi khat a natui pawtna pan a kisiansak ciangin, ama sian nadingin ni sagih simto ding hi; amah in pel loin a puansilhte sawpin tui siangin kisil dinga; tua ciangin amah a siang hi ding hi.

¹⁴A nigiat ni-in amah in pel loin vakhu nih ahikeh kawl-vakhu nih tawi-in Kikhopna Puanbuk lutna TOPA mai-ah pai-in tuate siampipa a pia ding hi.

¹⁵Siampipa in tuate khat mawhna hanga biakna le a khat pen meihal biakna-in pia ding hi. Hici bangin amah in mipa a natui pawtna hangin TOPA mai-ah thoihdamna a bawlsak ding hi.

¹⁶"‘Pasal khatpeuh in a bawtui a teh ciangin tui-in a pumtung khempeuh pumsil pelmawh dinga a nitak mateng asianglo hi ding hi.

¹⁷A bawtui banna puansilh ahikeh savun pel loin tui tawh kisawp dinga, tua pen nitak mateng asianglo hi ding hi.

¹⁸Pasal khat numei khat tawh lumkhawma a bawtui a teh ciangin pel loin amaute gel tui-in kipumsil ding uh a, nitak mateng asianglo hi ding uh hi.

¹⁹"‘Numei khat in a neih ngei sisan a luan ciangin a khasima a nit hun ni sagih sung hi dinga amah a lawngkha peuhmah nitak mateng a nin hi ding hi.

²⁰"‘A hunin a phak sungteng, a lupna na peuhmah le a tutna nate peuhmah asianglo hi ding hi.

²¹Ama lupna a lawngkha peuhmah in a puansilh sawpin tui-in kipumsil dinga, a nitak mateng tuapa asianglo hi ding hi.

²²Ama tutna na khatpeuh a sukha peuhmah in pel loin a puansilh sawpin tui-in kipumsil dinga a nitak mateng tuapa a sianglo hi ding hi.

²³A lupna ahikeh a tutna khatzawsang, mi khatpeuh in a sukkhak ciangin a nitak mateng tuapa a sianglo hi ding hi.

²⁴"‘Pasal khat in tuanu a luppih a tuanu khasim nin in amah a sukkhak leh tuapa ni sagih sung asianglo hi a; tuapa lupna khatpeuh zong asianglo ahi hi.

²⁵"‘Numei khat ama khasim nin neih hun sangin ni tampi sung sisan luang ahikeh a nin neih hun ngeina sanga sawtzaw a neih leh a nin neih hun nite bang tektekin a nin kizoma a pai laisiah amah asianglo hi ding hi.

²⁶A nin neih hun sunga mah bangin nin neih a kizop hun sungteng a lupna a sianglo hi dinga, a nin neih hun sung mah bangin a tutna na khatpeuh asianglo hi ding hi.

²⁷Tuate a lawng peuhmah a sianglo hi dinga; tuapa in pel loin a puansilhte sawpin tui-in kisil dinga, nitak mateng asianglo hi ding hi.

²⁸"‘Tuanu ama nin neihna pan a sian zawh ni sagih ciangin asiangin a kiseh ding hi.

²⁹A nigiat ni-in tuanu in pel loin vakhu nih ahikeh kawl-vakhu nih tawi dinga, tuate Kikhopna Puanbuk lutna-a siampipa tungah a paipih ding hi.

³⁰Siampipa in khat mawhna hanga biakna le a khat meihal biakna-in a pia ding hi. Hici bangin amah in tuanu nin neihna hanga sianlohna tang dingin TOPA mai-ah thoihdamna a bawlsak ding hi.

³¹"‘Note in, amaute laka ka tenna mun a[33] buahsakin a siantholohna pana a sih loh nadingun amaute a sianglosak ding nate panin Israel mite na tuam koih pelmawh ding uh hi,’" a ci hi.

³²Hihte in, bawtui pawt pasal, a bawtui teh-a asianglo a suak khatpeuh ading,

³³numei khat in a khasim nin neih hun sung ading, a natui a pawt numei ahikeh pasal ading, le a siang lo numei tawh a lumkhawm mipa adingin ngeinate ahi hi.