Read Zokam Siampi Laibu 19 Bible Online

Siampi Laibu 19 - Zokam bible

Siampi Laibu 19

¹TOPA in Moses tungah,

²"Israel mipi khempeuh hopih inla amaute tungah: ‘Keimah TOPA note Pasian siangtho ka hi manin note zong siangtho un.

³"‘Note a kuamahpeuh in na nu na pate uh zahtakin ka Sabbath-te na tang ding uh hi. Keimah TOPA note Pasian ka hi hi.

⁴"‘Milimte lamah nga kei un, ahikeh a kisung tawm pasiante bawltawm kei un. Keimah TOPA note Pasian ka hi hi.

⁵"‘TOPA tungah kilawmtakna biakna b[40] na piak uh ciangin note tanga kisang thei dingin hih bang zia-in pia un.

⁶Na piak ni uh ahikeh a zing ciangin kine khin ding hi; a ni thum ni dong a val lai a om leh pel loin kihaltum ding hi.

⁷A ni thumni-in a kine a om leh a nin hi-a, a kisang kei ding hi.

⁸A ne mi peuhmah in ama mawhna a khu ding hi, bang hang hiam cih leh amah in TOPA tungah a siangtho na a buahsak khin hi; tua mipa a mipihte panin a kikhenkhia pelmawh ding hi.

⁹"‘Na leitang-uah an na lak uh ciangin lonawl cin dong la tektek kei unla a sangh zong khawm siang kei un.

¹⁰Na lenggah lo ah a sangh khawm kei inla a nuaikiate zong tawm kei in. Mizawngte leh pemtate adingin tuate nusia in. Keimah TOPA note Pasian ka hi hi.

¹¹"‘Gu kei un. "‘Zuau gen kei un. "‘Khat le khat kikhem kei un.

¹²"‘Amaan lopi-in kei min lo-in kiciam kei unla; note Pasian min daisak kei un. Keimah TOPA ka hi hi.

¹³"‘Na vengte uh niambawlin mawksuh kei un. "‘Nasem dinga na cialte thaman zan khat zong dekbawl kei un.

¹⁴"‘Mittawte hamsiat kei un, ahikeh mittawpa suih khak dingin na khatpeuh koih kei un, na Pasian uh kihta zaw un. Keimah TOPA ka hi hi.

¹⁵Thutang lehhei kei un; mizawngte khentuam kei un, ahikeh a haute angvan tuam kei un; na vengte uh thu a hoihin khensak zaw un.

¹⁶"‘Na mipihte uh lakah mi gensia-in kawivak kei un. "‘Na vengte uh nuntakna a beisak thei na bangmah sem kei un. Keimah TOPA ka hi hi.

¹⁷"‘Na lungsim sunguah na sanggampa muhdah kei un. Na vengpa uh khialhna na khialhpih loh nadingun amah kiciantakin tai un.

¹⁸"‘Na mipihte uh khatpeuh tungah phulaknopna ahikeh lungsima langneihna nei kei un, ahi hangin nomau na ki-it bangun na vengte uh it un. Keimah TOPA ka hi hi.

¹⁹"‘Ka thukipte zui in, "‘Ganhing a nam kibang lote ah bah kei un. "‘Na lo lai-uah khaici nam nih cingkhawm kei un. "‘Khau namnih kigankhawm puan silh kei un.

²⁰"‘Pasal khat in midang khat tawh kiciam khin napi a kitankhia nai loin a suakta nai lo a sila numei khat a luppih leh a kituak zah dan kipia ding hi. Thah ding ahi nai kei hi, bang hang hiam cih leh tuanu a kisuaktasak nai kei hi.

²¹Bangbang ahi zongin tuapa in Kikhopna Puanbuk lutna-a TOPA tungah khialhna hanga biak nading tuutal khat a puak pelmawh ding hi.

²²Ama khialhna hanga biakna tuutal tawh a bawlsa a mawhna tangin, siampipa in TOPA mai-ah thoihdamna bawlsak dinga, tua ciangin ama mawhna kimaisak ding hi.

²³"‘Tua gamah lutin sing nam khat peuh na suan uh ciangin agah a kikham a[41] in ngaihsun un. Kum thum sung a kikham b[42]in na ngaihsun ding uh hi; tuate a kine peuhmah kei ding hi.

²⁴A kum lina kumin a siangtho hi dinga, TOPA mai-ah phatna-a biakna khat ahi hi.

²⁵Ahi hangin a kum ngana kumin a gah na ne thei ding uh hi. Hici bangin na khawhsate uh gah a khang ding hi. Keimah TOPA note Pasian ka hi hi.

²⁶"‘Sa khatpeuh a sunga sisan omlai pi-in ne kei un. "‘Aisanna ahikeh bumna nasepin nei kei un.

²⁷"‘Note in na basam uh met kei un, ahikeh na khamul mongte uh zong na theu kei ding uh hi.

²⁸"‘Misite hangin na pumpi uh kuikek ahikeh na citung uh gialsak kei un. Keima TOPA ka hi hi.

²⁹"‘Na tanute uh kizuaksakin a vaang uh kiamsak kei un; tua hi kei leh tua gam kizuakna suak dinga gitlohna tawh a dim ding hi.

³⁰"‘Ka Sabbatth-te tang unla ka mun siangtho zahtak un. Keimah TOPA ka hi hi.

³¹"‘Ai siamte zuan kei un, ahikeh dawi lawm zong kei un, ahang in, tuate-in na kibuahsak kha ding uh hi. Keimah TOPA note Pasian ka hi hi.

³²"‘A teekte mai-ah ding unla, a upazaw peuhmah zahtakna lakin, na Pasian uh zahtak un. Keimah TOPA ka hi hi.

³³"‘Na gamuah pemta khatin nang hong belh ciangin amah bawlsia kei in.

³⁴No tawh a tengkhawm pemta khat, no tualsuakte khatmah bangin kibawl pelmawh ding hi. Nangmah na ki-it bangin amah it in; ahang in note zong Egypt ah pemta na hi uh hi. Keimah TOPA note Pasian ka hi hi.

³⁵"‘A sau tehna, a gik khaina ahikeh a lian tehna na teh uh ciangin thumaan loin hih kei un.

³⁶Amaan-a tehna, a maan-a khaina ephah c[43] maan le hin d[44] maan zang un. Keimah TOPA note Pasian Egypt pana hong paikhiatpihpa ka hi hi.

³⁷"‘Ka thukip khempeuh le ka thukham khempeuh zui-in tangun. Keimah TOPA ka hi hi, ci hi,’ ci un," a ci hi.