Read Zokam Siampi Laibu 2 Bible Online

Siampi Laibu 2 - Zokam bible

Siampi Laibu 2

¹"‘Mi khatpeuh in TOPA tungah an-a biakna a piak ciangin ama biakna pen annel limci hi ding hi. Amah in tua tungah sathau buak dinga, a tungah gim namtui koihin

²Aaron tapa siampite kiangah tawi ding hi. Siampipa in annel le sathau gim namtui khempeuh tawh khut dim khat pham khawm dinga, TOPA a lungkimsak mei-a meihal biakna khat phawkna-in biakna-tau tungah a hal ding hi.

³An-a biakna a omlai teng Aaron le a tapate aa hi a; tua in TOPA tungah mei-a hal biaknate lakah a siangthopen khen ahi hi.

⁴"‘Thuk sunga ki-em an-a biakna nong tawi uh leh annel limci hi ding hi: silngo sawh loh sathau tawh a kipawi mohpheng, ahikeh c[3] silngo sawh loh sathau ki-zut mohnip hi ding hi.

⁵An-a na biakna uh belpei tunga kikang ahileh silngo sawh loh sathau tawh kipawi annel limci hi ding hi.

⁶Nuai zan inla a tungah sathau buak in; tua in an-a biakna khat ahi hi.

⁷An-a na biakna uh sikbela kihuan ahileh tua pen annel limci le sathau kibawl khawm hi ding hi.

⁸Hih banga kibawl an-a biaknate TOPA tungah hong puak un; biakna-tau tunga a pia ding siampipa tungah hong puak un.

⁹Amah in an-a biakna panin phawkna an phamkhia dinga, mei tawh kihal an-a biakna, TOPA a lungkimsak gim namtui khat ahi dingin biakna-tau tungah a hal ding hi.

¹⁰An-a biaknate a omlai teng Aaron le a tapate aa hi a; tua in TOPA tunga mei-a hal biaknate pan a siangthopen ahi hi.

¹¹"‘TOPA tunga na puak uh an-a biakna peuhmah silngo kisawh lo ding hi; ahang in, TOPA tungah mei-a hal biakna na piak uh ciangin silngo le khuaizu khatpeuh na hel kei ding uh hi.

¹²TOPA tungah gahmasa biakna-in tuate na pia thei uh hi. Ahi hangin tuate lungkimsakna gimnamtui dingin biakna-tau tungah a kipia kei ding hi.

¹³An-a biakna khempeuh ci sawh in. An-a na biaknate na Pasian tawh thukhun ci sawh loin om kei in; na biaknate khempeuh ci sawh in.

¹⁴"‘TOPA tungah gahmasa-a an-a biakna na piak uh leh buhvui thak kisu mei-a ki-em na pia ding hi.

¹⁵A tungah sathau le gimnamtui nuh in; tua in an-a biakna khat ahi hi.

¹⁶Siampipa in a kigawisa an le sathau lak panin phawkna satanh le gim namtui khempeuh gawmin TOPA tungah biakna piakna-in a haltum ding hi.