Read Zokam Siampi Laibu 20 Bible Online

Siampi Laibu 20 - Zokam bible

Siampi Laibu 20

¹TOPA in Moses tungah,

²"Israel-te tungah, ‘Israel-te ahikeh Israel-te gam sunga teng pemtate, Molech tunga a tate a pia e[45] peuhmah pel loin kithat ding hi. Mi honpi in amah suangin deng ding uh hi.

³Tua mipa ka maigumsan dinga, a mipihte panin ka khenkhia ding hi; ahang in, amah in a tate Molech pia-in, ka mun siangtho buahsak a, ka min siangtho a daisak hi.

⁴Tua mipa in Molech tungah a tate khat a piak ciangin ama mipih honpi in mitsi-in amah a thah kei uh leh

⁵tua mipa le a innkuanpihte ka maigumsan dinga, Molech tunga kizuak amah le amah hih bang zui-a a va kizuakte khempeuh a mipihte panin a kikhen-khia ding hi.

⁶"‘Ai siamte le dawi lawm neite thu umin amau le amau a va kitahte ka maigumsan dinga ama mipihte panin ka khenkhia ding hi.

⁷"‘Note ki-apin siangtho un; bang hang hiam cih leh keimah TOPA note Pasian ka hi hi.

⁸Ka thukipte zui-in tang un. Keimah TOPA no hong siangthosakpa f[46] ka hi hi.

⁹"‘Mi khatpeuh in a nu ahikeh a pa a hamsiat leh amah kithat pelmawh ding hi. Amah in a nu ahikeh a pa hamsiat khin ahi manin ama sisan ama lutung mah tu ding hi.

¹⁰"‘Pasal khat in midang khat zi - a vengpa zi tawh ang a kikawm uh leh angkawmnu le angkawmpa kithat pelmawh ding hi.

¹¹"‘Pasal khat in a pa zi a luppih leh a pa selpho ahi hi. Tuapa le tuanu kithat khawm pelmawh ding hi; amaute sisan amau lutung mah tu ding hi.

¹²"‘Pisal khat a monu tawh a lupkhawm leh a nih un thah pelmawh ding ahi hi. Amau gamtatnasa pen lehtatna hi a; amau sisan amau tung mah tu ding hi.

¹³"‘Pasal khat in numei luppih bangin pasal khat a luppih leh a nih un a kihhuai-a gamta khin uh ahi hi. Amaute kithat pelmawh ding hi; amau sisan amau lutungah tu ding hi.

¹⁴"Pasal khat in numei khat le tuanu’nu a tenpih leh kheltatna ahi hi. Note lakah kheltatna a om loh nadingin amah le amaute pel loin mei tawh kihal khawm ding hi.

¹⁵"‘Pasal khat in ganhing khat a luppih leh amah kithat pelmawh dinga, a ganhing zong kithat pelmawh ding hi.

¹⁶"‘Numei khat in a kiluppihsak dingin ganhing khat a va naih leh tua numei le a ganhing that un. Amaute kithat pelmawh ding hi; amaute sisan amau lutung mah ah tu ding hi.

¹⁷"Pasal khat in a sanggamnu, a pa tanu ahikeh a nu tanu khat zawsang tenpih-a, a kiluppih uh leh tua pen a zumhuai mahmah ahi hi. A mipihte uh mitmuh in amaute kithat pelmawh ding hi; amah in a sanggamnu a selpho hi a, amah siakhu ding hi.

¹⁸"‘Pasal khat in numei khat a khasim nin neih hunin a luppih leh a siluanna a hawksak suaka, a numei in zong a hawkkhia mah ahi hi. Amaute gel amau mipihte panin kikhenkhia ding hi.

¹⁹"‘Na nu sanggamnu ahikeh na pa sanggamnu luppih kei un; ahang in, tua in kitanauna daisak hi; note gel na siakhu tuak ding uh hi.

²⁰"‘Pasal khat in a nuno a luppih leh a pano a selpho ahi hi. Amaute gel siakhu ding uh a, ta nei loin a si ding uh hi.

²¹"‘Pasal khat in a sanggampa zi a tenpih leh a nin gamtatna khat hi-a, a sanggampa a selpho ahi hi. Amaute in ta a nei kei ding uh hi.

²²"‘Note ten nadinga kong puak nading leitang in note hong luakkhiat theih loh nadingin ka thukipte le ka thukhamte khempeuh zui-in tang un.

²³Note mai-a ka hawlkhiat ding minamte tat ngeina bangin na nungta peuhmah kei ding uh hi. Bang hang hiam cih leh amaute in hih nate khempeuh hih uh a, amaute ka kih hi.

²⁴Ahi hangin note kiangah, "Note in amau leitang na tang ding uh hi; bawngnawi le khuaizu a luanna gam note luah dingin kong pia ding hi," kong ci hi. Keimah TOPA note Pasian, tua minamte pana hong tuamkoihpa ka hi hi.

²⁵"‘Tua ahi manin note in asiang le asianglo ganhingte le asiang le a sianglo vasate na khenpelmawh ding uh hi. Note adingin a sianglo a ka sehtuam gamsa, vasa khatpeuh ahikeh a bokvak na khatpeuhin no le no kibuahsak kei un.

²⁶Kei a[47] adingin note a siangtho tuam na hi un; bang hang hiam cih leh keimah TOPA ka siangtho a, keimah in minamte panin kei aa tuam dingin note kong seh tuam hi.

²⁷"‘Note lakah numei ahikeh pasal, aisiam ahikeh dawi lawm neite thah pelmawh ding ahi hi. Amaute suangin na deng ding uh hi; amau sisan amau lutungah tu ding hi,’ ci in," a ci hi.