Read Zokam Siampi Laibu 23 Bible Online

Siampi Laibu 23 - Zokam bible

Siampi Laibu 23

¹TOPA in Moses tungah,

²"Israel-te hopih inla amaute tungah: ‘Hihte in ka sehsa pawite, mipi kikhopna siangtho hi, ci-a na tangko ding uh TOPA sehsa pawite ahi hi.

³"‘Na nasep theih nading uh niguk sung hi a, ahi hangin a ni sagih ni, Sabbath khawlni; a siangtho kikhopni khat ahi hi. Nasep khatpeuh na sem kei ding uh hi; na tenna peuhpeuh uhah tua in TOPA Sabbath ahi hi.

⁴"‘Hihte in a kiseh hunte a na tangko ding uh a siangtho kikhopna TOPA sehsa pawite ahi hi.

⁵TOPA Paisan ni pen a kha masa a ni sawmleli ni khuamui a kipan ahi hi.

⁶Tua kha a ni sawm le nga ni-in Silngo sawhloh TOPA Pawi a kipan hi; ni sagih sung silngo kisawh lo anlum na ne pelmawh ding uh hi.

⁷A ni masa ni-in a siangtho kikhopna khat bawl unla na nasep ngeite uh sem kei un.

⁸TOPA tungah ni sagih sung mei-a hal biakna pia un. Tua ciangin a ni sagih ni-in a siangtho kikhopna khat bawl unla na nasep ngeite uh sem kei un,’ ci in," a ci hi.

⁹TOPA in Moses tungah,

¹⁰"Israel-te hopih inla amaute tungah: ‘Note kong piak ding gamah na lut uh ciangin tua gama ante la un; siampipa tungah na anlakte uh anpal lom khat puak un.

¹¹Amah in note tanga kisang thei dingin TOPA mai-ah tua buhphal a vei ding hi; Siampipa in Sabbath ni a zing ciangin a vei ding hi.

¹²Tua buhphal na vei ni-un TOPA tungah poina a nei lo kumkhat a pha tuuno khat meihal biakna-in na pia pelmawh ding uh hi;

¹³tuate tawh an-a biakna in annel limci sathau tawh helsa ephah a[59] khat sehsawm suah sehnih - TOPA tungah mei-a hal biakna lungkimsakna gimnamtui - le dawntheih biakna zu hin b[60] khat sehli suah sehkhat tawh na piakhawm ding uh hi.

¹⁴Na Pasian uh tungah hih biakna na piak tektek ni matengun anlum ahikeh a ki-em ahikeh anthak khatpeuh na ne peuhmah kei ding uh hi. Hih in na tenna peuhpeuhuah khang sawnsawnte dongin a kip tawntung thuzek hi ding hi.

¹⁵"‘Vei-a biakna-in buhphal na puak ni uh Sabbath ni zingcianga kipan nipikal sagih simto un.

¹⁶A Sabbath sagihna ni zingciang dong ni sawmnga sim tektek unla, tua ciangin TOPA tungah anthak-a biakna pia un.

¹⁷Note tenna peuhpeuh ah, annel limci ephah khat sehsawm suah sehnih tawh kibawl silngo kisawh a ki-em anlum nih, TOPA tungah vei-a biakna-in gahmasate hong paipih un.

¹⁸Hih anlum tawh, poina a nei lo kum khat tek a pha tuuno apa sagih, bawngtalno khat le tuutal nih piakhawm un. Tuate TOPA tungah meihal biakna-a piak ding hi a, an-a biakna le dawntheih biakna - mei-a hal biakna, TOPA tungah lungkimsakna gimnamtui tawh pia khawm un.

¹⁹Tua khit ciangin mawhna hanga biakpiakna dingin keel a pa khat le kilawmtakna biakna c[61] dingin kum khat tuak a pha tuuno nih pia un.

²⁰Siampipa in gahmasa tawh kibawl anlum-a kibawlte tawh vei-a biakna-in tuutalte gel TOPA mai-ah a veikhawm ding hi. Siampipa adingin tuate TOPA tungah biakna siangtho ahi hi.

²¹Tua ni mah in note in a siangtho kikhopna khat bawl dingin na tangko ding uh a nasep ngeinate na sem kei ding uh hi. Hih in na tenna peuhpeuhuah khang sawnsawnte dongin a kipden thuzek ahi ding hi.

²²"‘Na leitang-uah an na lak uh ciangin lonawl cin dong la tektek loin ansangh zong kaikhawm kei un. Tuate mizawngte ading le pemtate adingin sit un. Keimah TOPA note Pasian ka hi hi,’ ci in," a ci hi.

²³TOPA in Moses tungah,

²⁴"Israel-te tungah: ‘A kha sagihna, a ni masa ni-in ni khat khawl, pengkul mutna tawh phawkna, kikhopna siangtho khat na nei ding uh hi.

²⁵Na nasep ngei uh sem kei un, ahi hangin mei-a hal biakna TOPA tungah pia un,’ ci-in," a ci hi.

²⁶TOPA in Moses tungah,

²⁷"Hih a kha sagihna a nisawmna ni pen Thoihdamna Ni ahi hi. A siangtho kikhopna khat bawl unla no le no kidekin d[62]TOPA tungah mei-a hal biakna pia un.

²⁸TOPA note Pasian mai-ah no adingin thoihdamna a kibawl ciangin tua ni Thoihdam Ni ahi manin na sem kei un.

²⁹Tua ni-a amah le amah a kidek lo peuhmah a mipihte panin ka khenkhia ding hi.

³⁰Tua ni-a nasem peuhmah a mipihte lak panin ka sumang ding hi.

³¹Na na sem peuhmah kei ding uh hi. Hih in na tenna peuhpeuh uah khang sawnsawn dongin a kipden thuzek hi ding hi.

³²Tua in no adingin sabbath khawl ni hi a, pel loin no le no na kidek ding uh hi. Tua kha a ni kua ni nitaka kipan a zingciang nitak dong na sabbath uh na tang ding uh hi," a ci hi.

³³TOPA in Moses tungah,

³⁴"Israel-te tungah: ‘A kha sagihna a ni sawm le ngana ni-in TOPA Biakbuk Pawi kipan-a, ni sagih sung ahi hi.

³⁵A ni masa ni a siangtho kikhop ni ahi hi; nasep ngeite uh bangmah sem kei un.

³⁶Ni sagih sung TOPA tungah mei-a hal biaknate pia unla a nigiat ni-in kikhopna siangtho khat bawl un, TOPA tungah mei-a hal biakna khat pia un. Tua in a tawpkhakna kikhopna ahi hi. Na nasep ngei uh bangmah sem kei un.

³⁷("‘Hihte pen TOPA tungah mei-a hal biakna - meihal biakna le an-a biakna, nisima kisam biaknate le dawntheih-a biaknate piak ni, kikhopna siangtho ni dinga na tangko nadingun TOPA sehsa pawite ahi hi.

³⁸Hih biaknate pen TOPA Sabbath-te behlapna le e[63] na letsongte uh le piak dinga na ciamsate uh le TOPA tunga utthu-a biakna na piakte khempeuh uh behlapna ahi hi.)

³⁹"‘Tua ahi ciangin a kha sagihna, a ni sawm le ngana ni-in kipan unla gam sunga ante na khop khit uh ciangin ni sagih sung TOPA tungah tua pawi bawl un; a ni masa ni khawl ni khat hi-a, a ni giat ni zong khawl ni khat mah ahi hi.

⁴⁰A ni masa ni-in singgahte a kung panin tengin, nisuh teh, a bawkpha singhiangte le gialhekte la-in TOPA note Pasian mai-ah ni sagih sung na gualnuam ding uh hi.

⁴¹Kum simin ni sagih sung TOPA tungah pawi na bawl un. Hih in khang sawnsawnte dongin a kipden thuzek hi ding hi; a kha sagihna sungin na bawl ding uh hi.

⁴²Ni sagih sung bukno sungah teng un. Israel mi a tualsuakte khempeuh bukno sungah a teng ding uh hi.

⁴³Tua pen keimah in amaute Egypt pana ka paikhiatpih lai-in Israel-te bukno sungah ka tensakna na suante un a theih nading ahi hi. Keimah in TOPA note Pasian ka hi hi,’ ci in," a ci hi.

⁴⁴Tua ci-in Moses in Israel-te tungah TOPA sehsa pawite a pulak hi.