Read Zokam Siampi Laibu 24 Bible Online

Siampi Laibu 24 - Zokam bible

Siampi Laibu 24

¹TOPA in Moses tungah,

²"Khuavak dongin meivak a kuan tawntung theih nadingin olive kigawi sathau citak nang hong puak nadingun Israel-te thu pia in.

³Kikhopna Puanbuk sunga Tecipanna puanzak pua-ah, TOPA mai-a meivakte nitak pan zingsang dong a kuang den dingin Aaron in a cing ding hi. Hih in khang sawnsawnte dongin a kipden thuzek hi ding hi.

⁴TOPA mai-a kham citak meivak tunna tunga meivakte pel loin a kicing den ding hi.

⁵"Annel limci la inla, lum khat ciangin ephah a[64] khat sehsawm suah sehnih zangin anlum sawm le nih em in.

⁶TOPA mai-a kham citak sabuai tungah gukta-in gual nihin gual in.

⁷Tua anlumte tanga ding ding le TOPA tungah mei-a hal biakna ahi dingin a gualte tungah phawkna dingin gimnamtui citak koih in.

⁸Hih anlum Sabbath khat khit Sabbath khatin Israel-te tangin TOPA mai-ah a hun simin tawntung thukhun dingin kikoihden ding hi.

⁹Tua pen Aaron le a tapate aa hi a, amaute in mun siangtho sung khatah a ne ding uh hi; bang hang hiam cih leh TOPA mai-ah mei-a hal biaknate panin amaute in a tanh den uh a siangtho pen amau aituam ahi hi," a ci hi.

¹⁰Tu-in a nu Israel-te hi-a, a pa Egypt-te ahi mi khat Israel-te lak panin paikhia-a, tua ciangin amah le Israel-te kikalah kilaina a piang hi.

¹¹Israel numei tapa in tua Min hamsiatin a gendai hi. Tua ciangin amaute in Moses tungah a puak uh hi. (A nu min Shelomith hi a, Dan mi Dibri tanu ahi hi).

¹²Amaute tungah TOPA deihna a kitel matengin amah a khumcip uh hi.

¹³Tua ciangin TOPA in Moses tungah:

¹⁴"Tua Pasian min gendaipa giahphual pualamah paikhiatpih un. Ama kampau a za mi khempeuh in tuapa lutungah a khut uh nga ding uh a, mipi khempeuh in amah suangin a deng ding uh hi.

¹⁵Israel mite kiangah: ‘Mi khatpeuh in a Pasian a hamsiat leh, ama khialhna amah’n khu ding hi.

¹⁶TOPA min a gendai khatpeuh kithat pelmawh ding hi. Amah mihon buppi in deng pelmawh ding uh hi. Pemta ahikeh tualsuak khatpeuh in tua Min a gendai ciangin pel loin amah kithat ding hi.

¹⁷"Mihing nuntakna a beisak peuhmah kithat pelmawh ding hi.

¹⁸Ganhing nuntakna a beisak peuhmah in - nuntakna tangin nuntakna mahin a loh ding hi.

¹⁹Mi khatpeuh in a innvengpa a liamsak leh ama hihsa bangin

²⁰guh kitan tangin guh kitan, mit tangin mit, ha tangin ha-in ama tungah pel loin kithuk ding hi; midang a liamsakte amah zong kiliamsak ding hi.

²¹Ganhing khat a that peuhmah in pel loin a loh ding hi, ahi hangin mi that peuhpeuh thah ding ahi hi.

²²Note, a tualsuakte le pemtate in a kibang thukham na nei uh hi. Keimah TOPA note Pasian ka hi hi,’ a ci hi.

²³Tua ciangin Moses in Israel-te tungah gena amaute in Pasian min gendaipa giahphual pua-ah paikhiatpihin suangin a deng uh hi. TOPA in Moses a thupiak bangin Israel-te in a hih uh hi.