Read Zokam Siampi Laibu 25 Bible Online

Siampi Laibu 25 - Zokam bible

Siampi Laibu 25

²"Israel-te hopih inla amaute tungah, ‘Keimah in note kong piak ding leitangah na lut uh ciangin a leitang mahmah in zong TOPA sabbath a tang ding hi.

³Kum guk sung na lo uh pawi un; kum guk sung mah na lengguite uh heuh unla a gah khawm un.

⁴Ahi hangin a kum sagihna kum TOPA sabbath leitang in sabbath khawlna a nei ding hi. Na lo uh pawi loin na lengguite uh heuh kei un.

⁵Ama thu-a po aliite panin la kei unla na hon loh uh lenggah lo panin a gah lo kei un. Tua leitang kum khat a khawl ding hi.

⁶Tua sabbath kum sunga leitang pana piang gah peuhmah na an ding uh - note, na sila numei, sila pasal-te uh, nasema na cialte uh le note laka hong teng pakte

⁷le na gankhawite uh le na gam sungua om gamsate ading hikhawm hi. Leitang pana piang peuhmah nek theih ahi hi.

⁸"‘Sabbath kum, kum sagih - kum sagih mun sagih - sim un; tua bangin sabbath kum sagih, kum sawmli le kua hun sung hi ding hi.

⁹Tua ciangin a kha sagihna a nisawm ni-in mun khempeuh ah pengkul gingsak un; Thoihdamna Ni-in na gam pumpi-uah pengkul gingsak un.

¹⁰A kum sawmngana kum sehtuamin siangthosak unla gamsung khempeuh a tengte khempeuh tungah suahtakna tang ko un. Tua in note adingin Jubilee ahi hi; note khatpeuh innkuante neihsa le amau beh ciatah a ciah ciat ding uh hi.

¹¹A kum sawmngana kum note adingin Jubilee hi ding hi; lo pawi kei unla ama thu-a po ante panin la loin na cin loh uh lenggui panin lo kei un.

¹²Ahang in, Jubilee khat hi a, no adingin a siangtho hi ding hi, lolai pana kila tektekte bek ne un.

¹³"‘Hih Jubilee kumin a kuamahpeuh amau gam ciatah a ciah ciat ding uh hi.

¹⁴"‘Na gamsung mi khat tungah leitang na zuak ahikeh na lei leh, khat le khat hamphat na kituh kei un.

¹⁵Na gamsung mi khatpeuh tung panin na lei leh Jubilee kum pan a kum phazah tuatin na lei ding hi. Amah in zong an kum bangzah kila thei lai ding hiam cih tuatin nang hong zuak ding hi.

¹⁶A kum a tam ciangin aman na khangsak dinga, a kum a tawm ciangin aman na khiam ding hi; bang hang hiam cih leh amah in nang hong zuak taktak pen a an kila ding zah hizaw hi.

¹⁷Khat le khat hamphat kituh loin na Pasian uh kihta zaw un. Keimah TOPA note Pasian ka hi hi.

¹⁸"‘Ka thukipte zui unla, ka thukhamte limtakin mang un, tua hileh na gamuah lungmuang takin na teng ding uh hi.

¹⁹Tua ciangin leitang in gah gahkhia in gilvahtakin na ne ding uh a, tua lai-ah lungmuang takin na teng ding uh hi.

²⁰Nang, "Lo pawi loin i ante la kei lehang a kum sagihna kumin bang i ne ding hiam?" ci-in nong dong thei hi.

²¹Keimah in kum thum sung nek khop ding a kum gukna kumin leitang in gah a gah nadingin thupha kong puak ding hi.

²²A kum giatna na pawi laitakun kumlui-a ante na ne ding uh a, a kum kuana anlak hun dong na khom ding uh hi.

²³"‘Neih den dingin tua leitang na zuak kei ding uh hi, bang hang hiam cih leh tua leitang kei aa hi a, note pemta, lo khawhlawhte na hi uh hi.

²⁴No neihsa banga na let uh leitang khempeuh ah leitang tatna na bawl pelmawh ding uh hi.

²⁵"‘Note gammi khat zawngin a neihsa pawlkhat a zuak leh ama kitanaupih penpen pai-in tua gammipa zuaksate a tan ding hi.

²⁶Bangbang ahi zongin tua mipa in a tatsak ding mi a neih kei a, amah hau kikin a tan zo dingin a om leh

²⁷a zuak nung kum phazah tuatin a man ding kiciangtan dinga, a val laiteng a zuaknapa tungah a kipia kik ding hi; tua ciangin ama neihsa leitang nei kik thei ding hi.

²⁸Ahi hangin amah in a loh nading acing a neih zawh kei leh tua a mun zuaksa pen a leipa khutah Jubilee Kum dong a om ding hi. Jubilee ciangin amah kipia kik dinga, tua ciangin amah ama munah a ciah kik thei ding hi.

²⁹"‘Mi khat in kulha ki-um khuapi sungah inn a zuak leh, a zuak nung kum khat sung a tat kik theih nading thu a nei hi. Tua hun sungin tankik thei hi.

³⁰Kum khat hul sungin a tat kik kei leh tua kulha ki-um khuapi sunga inn pen a leipa le ama suante in a tangden ding uh hi. Tua pen Jubilee hun ciangin kipia kik lo ding hi.

³¹Ahi hangin kulha ki-um lo khua neute-a innte ahileh gamsung banga kingaihsun ahi hi. Tuate kitan kik thei dinga, Jubilee ciangin kipia kik ding hi.

³²"‘Levi-te in amau Levi khuapi sunga amau neihsa innte a tawntungin tat kik theihna thu a nei uh hi.

³³Tuaci-in Levi-te neihsa kitan thei hi - tua pen, amau let khuapi sunga inn khatpeuh hi a - Jubilee cianga piak kik ding ahi hi, bang hang hiam cih leh Levi-te khuapi sunga innte pen Israel-te laka amau neihsa ahi hi.

³⁴Ahi hangin amau khuapi gantatna gam a kizuak peuhmah kei ding hi; amau neihden ahi hi.

³⁵"‘Na gamsung mi uh no laka teng khat zawngin a kivak zawh kei leh, no lakah a tensuak theih nadingin, pemtate ahikeh hong tam pakte na huh ding bangun huh un.

³⁶Ama tung panin a met a[65] bangmah la kei un. Tua sangsikin na gammipa no lakah a tensuak theih nadingin Pasian kihtazaw un.

³⁷A metin sum na leitawi kei dinga, a metin an na zuak kei ding hi.

³⁸Keimah TOPA note Pasian, Canaan gam hong pia-in note Pasian ahi dingin Egypt pana hong paikhiatpihpa ka hi hi.

³⁹"‘Note lakah gammi khat zawngin note tungah hong kizuak leh sila bangin na semsak kei un.

⁴⁰Amah nasema kicial bang ahikeh no laka inn hong nei pakte bangin na bawl ding uh hi; Jubilee Kum a tun mateng na na uh a sem ding hi.

⁴¹Tua hun ciangin amah le a tate kisuaktasak dinga, amah a behte lakah ciak kikin a pupa gamah a ciah kik ding hi.

⁴²Bang hang hiam cih leh Egypt pana kong paikhiatpih Israel-te ka nasemte ahi hi; amaute sila-in a kizuak peuhmah kei ding hi.

⁴³Amaute ngong uk loin na Pasian uh kihta zaw un.

⁴⁴"‘Na sila numei le pasalte uh note kima minamte pan ahi uh hi; amaute panin sila na lei thei uh hi.

⁴⁵Note in no laka hong teng pakte le no gam sunga suak amau behte na lei thei ding uh a, amaute no neihsa suak ding uh hi.

⁴⁶Note in amaute na tate uh gou na luahsak thei uh a khantawn sila in lah na koih thei uh hi. Ahi hangin na Israel mipihte uh tungah ngong uk kei un.

⁴⁷"‘Note laka teng pak khat ahikeh pemta khat hau-a, no gammi khat a zawna no laka teng pemta khat ahikeh pemta beh a mi khat tungah a kizuak leh

⁴⁸amahmah a kizuak khitin amah kitankhia kik thei ding hi. Ama tanau khat in amah tan thei hi:

⁴⁹A pa sanggampa ahikeh a pa sanggampa tapa ahikeh ama beh sunga sisan a kinaipih khatpeuh in amah tan thei ding hi; tua hi loin amah a hauh leh amah le amah kitan thei ding hi.

⁵⁰Amah le amah a leipa in amah a kizuak kuma kipan Jubilee Kum dong a hun tuat ding uh hi. Amah a kikhahkhiat nading sum pen, tua kum sungteng a kicial mipa thaman bulphuhin kituat hi ding hi.

⁵¹Kum tampi in a sap lai leh ama kitatna man ding zah sanga tamzaw a pia ding hi.

⁵²Jubilee Kum ma kum tawmno in a sap lai leh tua pen tuat khia in a kitatna sum ding a pia ding hi.

⁵³Amah pen a kumkuma kicialtawm mite banga bawl ding ahi hi; amah a neipa in amah a ngong uk ding na vil pelmawh ding hi.

⁵⁴"‘Hici bang zia-in amah a kitat kei leh zong, Jubilee Kum in amah le a tate a kikhahkhia ding hi;

⁵⁵ahang in, Israel-te pen keima nasem bang ahi hi. Amaute Egypt pana ka paikhiatpih ka nasemte ahi uh hi. Keimah TOPA note Pasian ka hi hi.